“Nnyịn Imanam Utom Ediwak Ini ke Efakutom Nnyịn!”
1 Nte akanam afo emekere ete ke ẹnam utom ke efakutom mbufo ata ediwak ini tutu mbon mbieterọn̄ ndomokiet idụhe ke esịt? Eyedi afo emekere ete: ‘Mmọdiọn̄ọ nte mme owo ẹdinamde n̄kpọ. Ntak mfiakde n̄ka mbịne mbon oro mînyeneke udọn̄?’ Edi akpanikọ nte ke ẹnam utom ediwak ini ke ediwak efakutom. Nte ededi, ẹkpenyene ndikere mban̄a n̄kpọ emi in̄wan̄-in̄wan̄, idịghe etikwo etikwo. Ntak edide ntre? Kere ban̄a ntak inan̄ emi ẹnọde ke idak emi.
2 Ẹbọrọ Akam Nnyịn: Jesus ọkọdọhọ ete: “Ke akpanikọ idọk okpon, edi mme anam-utom iwakke; ẹben̄e ndien Enyene-idọk, ẹte, Enye osio mme anam-utom ọdọn̄ ẹdi ke idọk Esie.” (Luke 10:2) Ke ediwak iduọk isua, nnyịn imeben̄e Jehovah un̄wam efen efen. Ke ediwak itie, idahaemi nnyịn imenyene mme anamutom efen efen oro ẹyomde, ndien nnyịn ke ikụre ediwak efakutom ndien ndien. Nte akpanikọ oro nte ke Jehovah ọbọrọ akam nnyịn ikpanamke nnyịn idat esịt?
3 Edisọn̄ọ Nyịre On̄wụm Eti Mfri: Idem ke mme efakutom oro ẹnamde utom ndien ndien, mme owo ke ẹkpan̄ utọn̄ ẹnọ etop Obio Ubọn̄, ke ẹnyụn̄ ẹdi ẹdinyene ifiọk akpanikọ. Ke ntre, nnyịn ikpenyene ndika iso n̄ka mbịne mmọ ndien ndien ye idotenyịn edikụt mbon esịt akpanikọ efen efen. (Isa. 6:8-11) Nte mme akpa mbet Jesus ẹkenamde, “ẹka iso ẹtiene” mme owo ke efakutom ẹdemede ẹnọ mbufo, ẹdomode ndidemede udọn̄ mmọ kaban̄a Obio Ubọn̄ Abasi.—Matt. 10:6, 7, NW.
4 Ke Portugal ediwak esop ẹkụre efakutom mmọ kpukpru urua, edi mmọ ke ẹsụk ẹyeyom mbon mbieterọn̄. Eyenete an̄wan kiet enen̄ede enyene ata in̄wan̄-in̄wan̄ edu. Enye ọdọhọ ete: “Mbemiso n̄wọrọde n̄ka utom ukwọrọ ikọ kpukpru usenubọk, mmesibọn̄ akam nnọ Jehovah nte an̄wam mi n̄kụt owo emi enyenede udọn̄ ndikpep Bible.” Usen kiet enye ama anam ndutịm ndikpep n̄kpọ ye mme anamutom ke itie unam idet. Nte ededi, owo kiet ikpọn̄ ekedi edikpep n̄kpọ. Owo oro ọkọdọhọ ete: “Mbon eken inyeneke udọn̄, edi ami mmenyene.” Ke ufan̄ ọfiọn̄ kiet enye ama enịm ukpepn̄kpọ Bible iba ke idemesie. Ibịghike ke oro ebede enye ama ana baptism, ndien ekem odụk utom usiakusụn̄!
5 Ẹnam Utom Emi: Ẹkwọrọ eti mbụk emi, kpa nte Jesus ekebemde iso etịn̄. (Matt. 24:14) Idem ke mme ebiet emi mme owo “mînyịmeke ndikop uyo [nnyịn],” ẹda utom ukwọrọikọ emi ẹnọ mmọ ntọt. Nnyịn imodori enyịn ndusụk owo nditre ndikop m̀mê ndibiọn̄ọ akpanikọ. Kpa ye oro, ẹnyene ndinen̄ede ntọt utọ mbon oro mban̄a edidi ubiereikpe Jehovah.—Ezek. 2:4, 5; 3:7, 8, 19.
6 Nnyịn Ikụreke Kan̄a: Idịghe nnyịn inyene ndibiere ini emi ẹditrede utom ukwọrọikọ emi. Jehovah ọfiọk nnennen ini emi ẹkpetrede. Enye ọfiọk m̀mê mme owo ẹdu ke efakutom nnyịn oro mînamke n̄kpọ iban̄a eti mbụk. Mfịn, ndusụk owo ẹdọhọ ke mmimọ inyeneke udọn̄, edi akwa ukpụhọde ke uwem—editaba utom, ọkpọsọn̄ udọn̄ọ, n̄kpa owo ima—ekeme ndinam mmọ ẹnen̄ede ẹkpan̄ utọn̄ ini efen. Ke ntak asari m̀mê ediyọhọ ye utom n̄kaha mîyakke ẹnọ n̄kpan̄utọn̄, ediwak owo akananam inen̄ekede ikop ukwọrọikọ nnyịn. Nnyịn ndika mbịne mmọ ndien ndien ke mfọnido ekeme ndinam mmọ ẹnọ ntịn̄enyịn ẹnyụn̄ ẹkpan̄ utọn̄.
7 Mbon oro ẹkọride ẹkponi ke mme isua ndondo emi, oro ẹnyụn̄ ẹnyenede mme ubon idemmọ ẹnen̄ede ẹda uwem ke akpan n̄kpọ ẹnyụn̄ ẹbụp mme mbụme oro Ikọ Abasi kpọt ekemede ndibọrọ. Eka kiet edide n̄kaiferi ama okot Ntiense iba ufọk onyụn̄ ọdọhọ ete: “Nte ekpri eyenan̄wan, akananam ami n̄kọfiọkke ntak emi eka mi ekesibịnde Mme Ntiense onyụn̄ ọdọhọde mmọ ke imọ inyeneke udọn̄, ke ini ofụri se mmọ ẹkeyomde ndinam ekedide ndineme mban̄a Bible. Do mma mbiere ke esịt mi nte ke mma n̄kpon, ndọ ndọ nnyụn̄ nnyene ufọk idemmi, ke nyokot Mme Ntiense Jehovah ẹdi ẹdinam Bible an̄wan̄a mi.” Enye ama anam emi, anamde Mme Ntiense oro ẹkekade ẹbịne enye ẹkop idatesịt.
8 Nte Afo Emekeme Nditịm Nnyene Uforo? Isinen̄ekede idi mbon oro nnyịn ikade ibịne kpukpru ini ẹsinam edi ọkpọsọn̄ n̄kpọ ndinam utom ndien ndien ke efakutom. Ndusụk ini esidi nnyịn ke idem nnyịn. Nte nnyịn isitọn̄ọ ye etikwo etikwo ekikere? Oro ekeme nditụk edu nnyịn, uyoikọ, ye nte inịmde iso. Wụt in̄wan̄-in̄wan̄ edu nyụn̄ tie inemesịt inemesịt. Domo ndida obufa usụn̄ nneme. Kpụhọde nneme fo, nyụn̄ domo ndifori enye. Ndusụk afo emekeme ndikpụhọde mbụme oro adade ọtọn̄ọ mîdịghe ada itien̄wed Abasi efen anam n̄kpọ ke nneme fo. Bụp nditọete iren ye iban eken se mmọ ẹkụtde nte enyenede ufọn ndinam utom ke efakutom emi. San̄a ke an̄wautom ye nsio nsio asuanetop ye mme asiakusụn̄, tịm fiọk se inamde utom ukwọrọikọ mmọ enyene uforo.
9 Utom ukwọrọikọ Obio Ubọn̄ enyene unyịme ye edidiọn̄ Jehovah, ndien nnyịn nditiene mbuana owụt ke nnyịn imama enye ye mbọhọidụn̄ nnyịn. (Matt. 22:37-39) Ntre ẹyak nnyịn inam utom nnyịn ima, ikûkpa mba ndinam utom ke efakutom emi ndien ndien.