Nte Afo Omoyom Ndinam Ekese?
1 Jesus ekemen Obio Ubọn̄ odomo ye ọsọn̄urua inyene. (Matt. 13:44-46) Utom usuan mbụk Obio Ubọn̄ edi ọsọn̄urua inyene n̄ko. Odot inịm utom ukwọrọikọ akpa ke otu ebeiso n̄kpọ ke uwem nnyịn, idem ọkpọkọm edinyene ọyọhọ udeme ke enye ayabuana ndusụk udomo n̄waidem. (Matt. 6:19-21) Nte afo omoyom ndinam ekese ke utom Obio Ubọn̄?
2 Kere Ban̄a Mme Akpan N̄kpọ Emi: Ẹyom ediwak n̄kpọ man itat ọkpọkpọ udeme nnyịn ke utom ukwọrọikọ: (1) ndibiere ndinịm mme ufọn n̄kpọ Obio Ubọn̄ akpa ke uwem (Matt. 6:33); (2) ndikọn̄ mbuọtidem nnyụn̄ mberi edem ke Jehovah (2 Cor. 4:1, 7); (3) ndiyom un̄wam Abasi ebe ke edikọbọ ke akam ofụri esịt (Luke 11:8-10); (4) ndinam n̄kpọ mban̄a nnyụn̄ ndu uwem ke n̄kemuyo ye akam nnyịn.—Jas. 2:14, 17.
3 Mme Usụn̄ Nditat Utom Ukwọrọikọ Nnyịn: Kpukpru nnyịn imekeme ndinịm akpan utịtmbuba ndibiat ndusụk ini ke utom an̄wautom nnyịn kpukpru ini ke ọfiọn̄ kiet kiet. Edi nte emesikere n̄ko aban̄a edida kpukpru ifet oro ebererede nnọ ikọ ntiense ido nneme, ndomo ndinam mme nneme fo ẹnyene ufọn, nnam mme mfiakn̄ka fo ẹnyene uforo, nnyụn̄ ndomo ndinịm mme ukpepn̄kpọ Bible oro ẹnyenede uforo? Nte afo eyekeme ndinam utom usiakusụn̄ unọ un̄wam m̀mê eke ofụri ini m̀mê ndinam utom ke ebiet oro udọn̄ okponde akan? Edieke afo edide eyenete emi ama akana baptism, nte afo emekeme ndinyanade mbịne ndidot nte asan̄autom unamutom m̀mê ebiowo? (1 Tim. 3:1, 10) Nte afo emekeme nditat utom ukwọrọikọ fo ebe ke ndisịn n̄wed eben̄e kaban̄a utom Bethel m̀mê ndidụk Ufọkn̄wed Unọ Mme Asan̄autom Ukpep?—Luke 10:2.
4 Ẹma ẹsịn udọn̄ ẹnọ eyenete eren kiet emi ekenyenede utom idịbi udia uyọhọ ini esinyụn̄ abiatde ediwak ini ke mme edinam mbre mbuba ndikabade ndi asiakusụn̄ ofụri ini. Enye ama ọtọn̄ọ usiakusụn̄ unọ un̄wam ekem anam ukpụhọde ke mme idaha esie man odụk utom ukwọrọikọ uyọhọ ini. Ke ukperedem enye ama odụk Ufọkn̄wed Unọ Mme Asan̄autom Ukpep, emi akan̄wamde nditịm enye idem nnọ utom oro enye anamde idahaemi nte esenyịn circuit. Enye enen̄ede okop inemesịt nte ke imọ ima inam n̄kpọ iban̄a nsịnudọn̄ oro ikọbọde, ndien enye enyene mbuọtidem nte ke imọ imenen̄ede ikop inemesịt ke ntak ubiere imọ ndinam ekese ke utom Obio Ubọn̄.
5 Jehovah ọdiọn̄ mbon oro ẹnọde idemmọ unyịme unyịme. (Isa. 6:8) Kûyak n̄kpọ ndomokiet ọbiọn̄ọ fi nditat utom ukwọrọikọ fo nnyụn̄ nnyene akwa uyụhọ ye nduọkodudu nte utịp.