Se Ẹyomde—Mme Asiakusụn̄ Unọ Un̄wam 30,000
Nte Afo Emekeme Ndinam Usiakusụn̄ Unọ Un̄wam ke March? April? May?
1 “Ẹyom Mme Ọkwọrọikọ 1,000” ekedi enyịn̄ ibuotikọ oro ẹkemịn̄de ke nsiondi Enyọn̄-Ukpeme (Ikọmbakara) eke April 1881. Enye ama esịne eben̄e emi ẹkeben̄ede kpukpru iren ye iban ẹmi ẹyakde idem ẹnọ, “emi Ọbọn̄ ọnọde ifiọk akpanikọ Esie,” ndida ini ekededi oro mmọ ẹkemede mbuana ke ndisuan akpanikọ Bible. Ẹma ẹsịn udọn̄ ẹnọ mbon oro ẹkemede ndinọ ubak ini mmọ m̀mê se ikande oro ofụri ofụri ke utom Ọbọn̄ ndinọ idem unyịme unyịme nte mme ọkwọrọikọ colporteur—mme andibem iso nnọ mme asiakusụn̄ eyomfịn.
2 Okposụkedi mme ini ẹkpụhọrede toto ke iduọkisua 1800, akpan n̄kpọ kiet osụk edi ukem—mme asan̄autom Abasi ẹmi ẹyakde idem ẹnọ ẹyom ndika iso nda ekese ini nte ẹkekeme ke ndisuan eti mbụk. Ndinam utom nte mme asiakusụn̄ unọ un̄wam an̄wam mme asuanetop esop ndikọri uforo mmọ nte mmọ ẹsịnde ini efen efen ke utom ukwọrọikọ Obio Ubọn̄.—Col. 4:17; 2 Tim. 4:5.
3 Toto nte ẹketọn̄ọ enye, ediwak tọsịn nditọete iren ye iban ke mme itie ikie ẹkop inem utom usiakusụn̄ unọ un̄wam. Ifiopesịt ke ikpehe utom usiakusụn̄ emi ama ọkọri tutu esịm udomo oro ẹkesịmde n̄wakn̄kan ibat emi ekebede mme asiakusụn̄ unọ un̄wam 22,000 ke efakutom n̄kọk itieutom Nigeria ke April 1990! Ke akpanikọ idotenyịn odu ndisịm obufa n̄wakn̄kan ibat 30,000 ke 1997.
4 Nnyịn imesịn udọn̄ inọ mbufo ndinyene utịtmbuba usiakusụn̄ unọ un̄wam ke ọfiọn̄ kiet m̀mê akande oro ke March, April, ye May. Ntak ẹsịnde March? Koro isua emi Editi n̄kpa Christ edidi ke Sunday, March 23. Idụhe usụn̄ efen emi nnyịn ikemede ndibiat mme urua ẹbemde Editi iso akan ke ndibuana ke utom ukwọrọikọ Obio Ubọn̄ oro Ọbọn̄ ye Andinyan̄a nnyịn, Jesus Christ, ekenịmde. Ye akwa eboho ntiense oro ẹnọde ke March, nnyịn imekeme ndikot ediwak owo ẹmi ẹnyenede udọn̄ ndidiana ye nnyịn ke editi n̄kpa Christ. March edidi san̄asan̄a n̄ko koro, ke akpa ini, nnyịn idinọ obufa n̄wed oro, Ukpọhọde Inemesịt Ubon. Ke adianade do, ọfiọn̄ March esịne Saturday ition ye Sunday ition, ayakde ẹnam utom utịturua ọyọhọ ọyọhọ ke an̄wautom. Nte ededi, ke ọfiọn̄ April ye May, n̄kaiso ifịk ifịk ukeme oro isịnde ke an̄wautom ayanam nnyịn ika ibịne udọn̄ oro ikokụtde inyụn̄ itọn̄ọ mbufa ukpepn̄kpọ Bible, ikamade ediye uduot ekpri n̄wed oro Nso ke Abasi Oyom Oto Nnyịn? Nnyịn iyada n̄ko mme ekemini nsiondi Enyọn̄-Ukpeme ye Awake! eke ndondo emi ikụre efakutom nnyịn mfọn mfọn, akpan akpan ke mme utịturua.
5 Anie Odot Ndinam Usiakusụn̄ Unọ Un̄wam?: Ẹtịm Man Inam Utom Nnyịn Ima, page 114, anam an̄wan̄a ete: “Sededi mme ọkpọkpọ idaha fo edide, edieke edide afo ama ana baptism, enyenede eti idaha ido uwem, ekemede ndinam ndutịm man osịm se ẹyomde emi edide edibiat hour 60 ke ọfiọn̄ ke an̄wautom onyụn̄ onịmde ete ke imọ imekeme ndinam utom ke ọfiọn̄ kiet m̀mê awakde akan oro nte asiakusụn̄ unọ un̄wam, mbiowo esop ẹyedat esịt ndikere mban̄a eben̄e fo kaban̄a ifetutom emi.” Nte afo emekeme ndifet ufan̄ nnọ ifetutom emi ke March? April? May?
6 In̄wan̄în̄wan̄ edu ke n̄kan̄ otu mbiowo ọkọrọ ye un̄wam ofụri esịt emi mme asuanetop eken ẹnọde ekpenyene ndinam nte ẹnamde n̄kpọ ẹban̄a ediyom oro ẹyomde asiakusụn̄ 30,000 okụt ọyọhọ unen. (Heb. 13:7) Ẹsịn udọn̄ ẹnọ kpukpru mme ibuotufọk ndifiọk m̀mê owo ifan̄ ke ubon esie ẹdidụk udịm mme asiakusụn̄ unọ un̄wam ke ọfiọn̄ kiet m̀mê akande oro ke mme ọfiọn̄ ẹdide.—Ps. 148:12, 13; men Utom 21:8, 9 domo.
7 Kûsọsọp ubiere nte ke imọ ikemeke ndinam usiakusụn̄ unọ un̄wam ke ntak utom idịbi udia uyọhọ ini, ndutịm ufọkn̄wed, mme mbiomo ubon, m̀mê mbiomo N̄wed Abasi imọ eken. Ekeme ndidi ididịghe mmemmem n̄kpọ inọ ndusụk owo ndibuana; nte ededi, oto eti ndutịm ye edidiọn̄ Jehovah, mmọ ẹkeme ndikụt unen. (Ps. 37:5; N̄ke 16:3) Yak udọn̄ ndibuana ke utom usiakusụn̄ akara mme idaha fo; kûyak mme idaha fo ẹkara udọn̄ fo ndisiak usụn̄. (N̄ke 13:19a) Ntem, ye ọkpọsọn̄ ima oro ẹnyenede ẹnọ Jehovah ye ekemmọ owo, ediwak owo ẹnam mme ukpụhọde ke edinam uwem ofụri ini mmọ eke urua ke urua man ẹkeme nditat utom ukwọrọikọ mmọ ke ọfiọn̄ kiet ke ndusụk ini. (Luke 10:27, 28) Ediwak edidiọn̄ ke ẹna ẹbet mbon ẹmi ẹsịnde idemmọ ifịk ifịk ke utom Obio Ubọn̄.—1 Tim. 4:10.
8 Se Usiakusụn̄ Unọ Un̄wam Anamde: Ukeme ofụri ukpọn̄ oro ediwak tọsịn mme asan̄autom Abasi ẹsịnde man ẹnam usiakusụn̄ unọ un̄wam esisụn̄ọ ke akwa edifiori n̄kpo itoro nnọ Jehovah. Nte mme anditan̄a Obio Ubọn̄ ẹmi ẹsịnde idem ke ndisuan eti mbụk nnọ ekese owo, mmọ ẹkpere Jehovah ke idemmọ ẹkan koro mmọ ẹkpep ndinen̄ede mberi edem ke enye nyom spirit ye edidiọn̄ esie.
9 Ndinyene mme asiakusụn̄ unọ un̄wam, mme asiakusụn̄ ofụri ini, ye mme akpan asiakusụn̄ ẹsịnde idem ke otu nnyịn esinọ obufa odudu ke esop. Ifiopesịt mmọ esibebe owo nte mmọ ẹnemede ẹban̄a mme ifiọkutom an̄wautom mmọ. Emi esinụk mmọ en̄wen ndifiak ndụn̄ọde se idide ebeiso n̄kpọ inọ mmọ ye ifet ndinyene ntatara ebuana ke akakan utom ukwọrọikọ emi. Eyenete an̄wan emi akanade baptism ke isua 70 ama ọtọn̄ọ inikiet inikiet ndinam usiakusụn̄ unọ un̄wam ye unana editre. Ke ẹbụpde enye ndusụk isua ke ukperedem ntak enye okosụk esịnde idem ntre ke utom ukwọrọikọ nte asiakusụn̄ unọ un̄wam kpukpru ọfiọn̄ ke utọ idaha isua emana esie oro, enye ọkọdọhọ ke eketie nte n̄kpọ eke imọ ikabiatde-biat akpa isua uwem 70 imọ, ndien ke imọ ikoyomke ndibiat isua uwem imọ ekededi oro osụhọde!
10 Andibuana kiet kiet ke utom usiakusụn̄ unọ un̄wam esikọri usọ oro enyenede uforo ke utom ukwọrọikọ. Ntiense kiet edide uyen ama enyịme ete: ‘Mma nsisan̄a ye ete ye eka mi n̄ka utom ukwọrọikọ ke ini n̄kedide eyenọwọn̄. An̄wautom ekenen̄ede edi n̄kpọ inemesịt. Nte ededi, nte ini akade, ama ana in̄wan̄în̄wan̄ nte ke ami n̄kedi isio ye mmọ eken. Do enye ama akabade etie mi etikwo etikwo ndinyene nneme ye nditọ ufọkn̄wed eken mban̄a akpanikọ. Ke ini n̄kwọrọde ikọ ke ufọk ke ufọk, mma ntọn̄ọ ndikop ndịk mban̄a ekikere edikụt owo ekededi oro n̄kọdiọn̄ọde ke ufọkn̄wed. N̄kere ke mfịna ekịm ekedi uten̄e owo. [N̄ke 29:25] Ke mma n̄kokụre n̄wed, mma mbiere ndidomo utom usiakusụn̄ ke ibio ini nse. Nte utịp, utom ukwọrọikọ ama enem mi ke usụn̄ oro akananam mînemke. Ami n̄kadaha enye aba nte n̄kpọ mbubru, ikonyụn̄ idịghe ekikak mbiomo. Ke n̄kụtde nditọ ukpepn̄kpọ Bible mi ẹnamde n̄kọri ke akpanikọ, mma nsikop ntotụn̄ọ uyụhọ ke uyarade oro nte ke Jehovah Abasi ke ọnọ mme ukeme mi ibetedem.’ Uyen emi ama aka iso ke ndinam utom nte asiakusụn̄ ofụri ini.
11 Ke ndise ke ataata usụn̄, ke ini ediwak owo ẹnamde utom nte mme asiakusụn̄ unọ un̄wam ke esop, edikụre efakutom mfọn mfọn esidi utịp. Eyenete emi esede aban̄a edinọ mme efakutom ekeme ndiyom un̄wam nto mme asiakusụn̄ unọ un̄wam ke ndikụre mme ikpehe oro owo mîsinamke utom ndien ndien. Ndikama udia nnyụn̄ nsịn ofụri usen ke utom ayanam ẹkeme ndinam utom idem ke mme itie oro oyomde usụn̄ ke efakutom oro.
12 Oyom Mbiowo Ẹnam Mbemiso Ntịmidem: Ke ofụri ọfiọn̄ ita efen, ẹkpenyene ndinam ndutịm man ẹdiomi nsio nsio orụk utom unọ ikọ ntiense ke nsio nsio ini ke urua, esịnede utịt utịt uwemeyo ye ntọn̄ọ ntọn̄ọ mbubịteyo, man otodo ediwak owo nte ẹkekeme ẹkeme ndibuana. Ke adianade ye edinam eke utom ufọk ke ufọk ofụri ini, esịne mme ini unọ ikọ ntiense efak, edinam utom ke mme efakutom mbubehe, ye ediwaha mme itie owo mîkodụhe ke ufọk. Ke ndinam ntre, mbiowo ẹn̄wam mbon ẹmi ẹsiakde usụn̄ ndibuana ke utom ye esop ke ini oro ọfọnde akan ọnọ mme asiakusụn̄. Ẹkpenyene ndinam esop etịm ọfiọk aban̄a kpukpru ndutịm an̄wautom. Ẹkpenyene nditịm mme mbono an̄wautom nte ọfọnde. Ke adianade do, ẹkpenyene ndinam efakutom oro ekemde odu ẹkpenyụn̄ ẹnyene nditobo ediwak magazine ye mme n̄wed eken ye unana ubiatini.
13 Diomi Ọkpọkpọ Ndutịm Utom Fo: Eyenete eren kiet, emi okokopde ndịk aban̄a utom usiakusụn̄ unọ un̄wam, ọkọdọhọ ete: “Enye enen̄ede emem utom akan nte n̄kekerede. Enye oyom sụk eti ndutịm.” Nte afo omokụt uwụtn̄kpọ ndutịm usiakusụn̄ unọ un̄wam emi edinyenede ufọn ọnọ fi ke edem esịne-esịt emi? Hour 15 ke urua kiet kiet edi ofụri ini oro ẹyomde ẹto mme asiakusụn̄ unọ un̄wam.
14 Man ẹnam utom nte mme asiakusụn̄ unọ un̄wam, ibanndọ ye mme aka utom uwemeyo ẹkeme ndidiomi usenubọk mmọ nnọ utom an̄wautom. Nditọ ufọkn̄wed ye mme aka utom okoneyo ke ofụri ofụri ẹkeme ndisịn uwemeyo ke utom ukwọrọikọ. Mme anamutom idịbi udia uyọhọ ini ẹkụt ke ẹkeme ndibọ nduọkodudu usen kiet ke urua kiet ke itieutom mîdịghe ẹyak ofụri utịturua ẹsịn ke utom ukwọrọikọ, ke adianade ye edinọ ikọ ntiense mbubịteyo. Ediwak mbon oro utom an̄wautom mmọ awakde ndidi ke utịturua kpọt ẹsimek mme ọfiọn̄ ẹmi ẹsịnede ọyọhọ ọyọhọ utịturua ition. Isua emi, oro edi ntre ke March, ọkọrọ ye August ye November. Ke akamade ndutịm emi owo mîwetke n̄kpọ isịn ke page 6 emi ẹnọde nte ndausụn̄, kere ke ntịn̄enyịn ye ke akam ban̄a ọkpọkpọ ndutịm utom emi edifọnde ye idaha fo.
15 Ufọn kiet odude ke ndutịm usiakusụn̄ unọ un̄wam edi ukeme ndikpụhọde. Afo emekeme ndimek mme ọfiọn̄ oro afo edisiakde usụn̄, ndien afo emekeme ndinam utom ediwak ini nte afo amade. Edieke afo akpamade ndinam usiakusụn̄ unọ un̄wam ye unana editre edi ukemeke ndinam ntre, ndi afo emekere aban̄a edisịn enyịn̄ ke ọfiọn̄ kiet kiet ebede ke ofụri isua oro? Ke n̄kan̄ eken, ndusụk owo ẹkeme ndika iso nnam utom usiakusụn̄ unọ un̄wam ke anyanini.
16Mben̄eidem Kaban̄a Usiakusụn̄ Uyọhọ Ini: Ediwak owo ẹmi ẹnyenede edu usiakusụn̄ ẹyema ndinam utom nte mme asiakusụn̄ ofụri ini, edi ẹyịk m̀mê mmimọ imenyene ini, mme idaha, mîdịghe ukeme ndinam oro. Nte eyịghe mîdụhe ediwak mbon oro ẹsiakde usụn̄ ofụri ini idahaemi ẹkebem iso ẹda utom usiakusụn̄ unọ un̄wam nte n̄kpọ ndida mben̄e idem nnọ utom uyọhọ ini. Ebede ke owo ndidian n̄kpasịp hour kiet ke usen ke ndutịm usiakusụn̄ unọ un̄wam, m̀mê ofụri usen kiet ke urua kiet, enye ekeme ndinam ndutịm usiakusụn̄ ofụri ini okụt unen. Man okụt m̀mê afo emekeme ndinam oro, ntak mûdomoke ndisịn hour 90 ke utom ukwọrọikọ ke ọfiọn̄ usiakusụn̄ unọ un̄wam kiet m̀mê akande oro? Ke ukem ini oro, afo eyenyene mme mfiakn̄ka ye mme ukpepn̄kpọ Bible, ẹmi ẹdiyakde fi adara utom usiakusụn̄ oro adade ukem ukem.
17 Eyenete n̄wan kiet ama adara edinam utom usiakusụn̄ unọ un̄wam ye unana editre ke isua itiokiet. Ekedi udọn̄ esie ke kpukpru ini oro ndidụk utom usiakusụn̄ ofụri ini. Ye oro ke ekikere, enye ama odomo nsio nsio utom idịbi udia inan̄ ye idotenyịn ndinam idaha odu ọnọ enye ndisịm hour 90 emi ẹyomde ẹto mme asiakusụn̄ ofụri ini. Ọfiọn̄ kiet kiet, enye ama esinam ndutịm kiet m̀mê iba man otodo abat ese m̀mê ekeme ndidi mmemmem. Edi ke ndidụn̄ọde mmọ, ama etie enye nte ke utom ukwọrọikọ uyọhọ ini akan ukeme esie. Edi, enye ama aka iso eben̄e Jehovah ndausụn̄ esie. Ekem usen kiet ke adan̄aemi eketịmde idem ọnọ Esoputom, enye ama okot ibuotikọ kiet ke Utom Obio Ubọn̄ Nnyịn eke December 1991 oro ọkọdọhọde ete: “Utu ke ndidori nsọn̄uyo oro mîfọnke ke ibat hour oro ẹyomde, ntak mûwụkke ntịn̄enyịn ke ifet efen efen oro enyenede ndibuana ke utom editan̄ mbok? (John 4:35, 36)” Enye obụk ete: “Mma mfiak n̄kot udịmikọ emi utịm ikotion m̀mê ikotiokiet, nnyụn̄ ntịm nnịm ke akpanikọ nte ke emi ekedi ibọrọ Jehovah. Ke ebe oro mma nnam ubiere ndidụk utom usiakusụn̄ ofụri ini.” Okposụkedi ndutịm utom idịbi udia esie mîkọfọnke, enye ama esịn eben̄e esie ndinam utom usiakusụn̄ ofụri ini. Urua kiet ke ukperedem ndutịm esie ama okpụhọde, ndien ẹma ẹnọ enye ini utom idịbi udia oro ọkọfọnde ye enye. Enye ama eberi ete, “Nte Jehovah enyene ubọk ke emi, m̀mê inyeneke?,” onyụn̄ adian do ete: “Ke ini obụpde Jehovah ndausụn̄ onyụn̄ ọbọde enye, kûsịn enye—nyịme enye.” Edieke edide uduak ofụri esịt fo ndinam usiakusụn̄ ofụri ini, eyedi afo eyenịm ke akpanikọ ke imọ n̄ko imekeme ndikụt unen ke utom uyọhọ ini ke ama akanam utom usiakusụn̄ unọ un̄wam ọfiọn̄ ita okụre ke March, April, ye May, emi.
18 Nnyịn imenịm ke akpanikọ ite ke Jehovah ọyọdiọn̄ ifịk oro onyụn̄ ọnọ ibetedem ke mme ukeme oro ikọt esie ẹsịnde nte mmọ ẹsuande eti mbụk edinyan̄a ke akpan ini utom emi. (Isa. 52:7; Rome 10:15) Ndi afo eyeyere ikot ediyom oro ẹyomde mme asiakusụn̄ unọ un̄wam 30,000 ebe ke ndinyene ebuana ke March? April? May?
[Ekebe ke page 3]
Nte Ẹkemede Ndikụt Unen nte Asiakusụn̄ Unọ Un̄wam
■ Nyene in̄wan̄în̄wan̄ edu ban̄a mme idotenyịn fo
■ Bọn̄ akam nọ Jehovah ete ọdiọn̄ mme ukeme fo
■ Nọ asuanetop efen ikot ndinam utom usiakusụn̄ ye afo
■ Diomi ndutịm utom oro ọfọnde
■ Tobo magazine oro awakde ekem
■ Nọ ndutịm utom oro esop anamde ibetedem
■ Yom mme ifet ndinọ ikọ ntiense ido nneme