Nte Nnyịn Iyafiak Inam?—Ikot En̄wen Kaban̄a Mme Asiakusụn̄ Unọ Un̄wam
1 Nte nnyịn iyafiak inam nso? Nte nnyịn iyanam usiakusụn̄ unọ un̄wam ke ini Editi? Esịne-esịt Utom Obio Ubọn̄ Nnyịn eke February 1997 ama omụm ntịn̄enyịn nnyịn ye ibuotikọ ẹdade ndodobi abisi ẹwet do: “Se Ẹyomde—Mme Asiakusụn̄ Unọ Un̄wam 30,000.” Nnyịn ima inịm ke akpanikọ nte ke afo ama ada ikot oro ke akpan n̄kpọ. Ke ini ẹketịmde ibatutom March 1997, okposụkedi nnyịn mîkekemeke ndisịm utịtmbuba eke 30,000, nnyịn ima ikop idatesịt ndifiọk nte ke 19,218 ẹma ẹsịn enyịn̄ ke utom usiakusụn̄ unọ un̄wam! Edieke nnyịn idiande mme asiakusụn̄ ofụri ini 19,295 ye mme akpan asiakusụn̄ 398 ẹmi ẹketọtde ibatutom ọfiọn̄ oro, ke ibat oro, nnyịn ikụt ite se ikperede ndisịm mbahade 20 eke ikie ke kpukpru mme asuanetop ẹkedu ke utom usiakusụn̄.
2 Nnyịn imotoro kpukpru owo oro ẹkesịnde ukeme efen efen ndifori utom an̄wautom mmọ isua oko, ufiop ufiop. Nte an̄wan̄ade, ima unana ibụk oro ẹnyenede ẹnọ Jehovah Abasi ye mbọhọidụn̄ okonụk kpukpru mbufo. (Luke 10:27; 2 Pet. 1:5-8) Mme asuanetop ke nsio nsio idaha ke uwem ẹma ẹfak ifet ẹnọ usiakusụn̄ unọ un̄wam. Ke esop kiet, asuanetop 51 ẹma ẹnam usiakusụn̄ ọtọkiet ke ukem ọfiọn̄, ẹsịnede ata ediwak ke otu mbiowo, eka kiet ye nsekeyen an̄wan edide ọfiọn̄ 15, eyenete an̄wan emi ọkọkpọn̄de utom esie onyụn̄ anamde utom ubak ini man ekeme ndinam usiakusụn̄, ye akani eyenete an̄wan emi akananam mîsiakke usụn̄. Esenyịn circuit ekewet ete: “Ẹsịn akwa ukeme ke utom ukwọrọikọ. . . . Ikụreke ke emi ndinyene utịp ke efakutom edi mme esop ẹyọhọ ye ifiopesịt. Nditọete ẹdara ndidiọn̄ọ kiet eken etịm ọfọn ọkọrọ ye edikụt nti utịp ke utom ukwọrọikọ.”
3 Owo ikosioho n̄kparawa owo ifep isua oko. Asuanetop kiet oro mînaha baptism edide isua 13 ama esikere aban̄a ini emi enye edikemede ndiyarade uyakidem esie nnọ Jehovah. Ke ama akana baptism ke February, enye ama ewet aban̄a udọn̄ esie ndinam usiakusụn̄ unọ un̄wam ke March ete: “Ye unana n̄kpọ ndomokiet ndibiọn̄ọ mi idahaemi, mma nsọsọp nyak n̄wed eben̄e mi nnọ. . . . Ediwak utịbe utịbe ifiọkutom oro ikadarade ikpekedịghe ata idem n̄kpọ ye unana ima ima ikot mbufo kaban̄a usiakusụn̄. Mmọkọm Jehovah ke ndikenyene ifet emi ndisịne ke otu mbon oro ẹkeyerede ikot oro.” Enye emenịm utịtmbuba ndifiak nnam.
4 Ekeme ndidi afo ama odu ke otu 19,218 ẹmi ẹkebuanade ke utom usiakusụn̄ unọ un̄wam ke March, m̀mê 18,662 ke April, m̀mê 13,434 ke May isua oko. Nte afo ayafiak anam isua emi? Edieke afo mûkekemeke ndisiak usụn̄ isua oko, nte afo emekeme ndinam isua emi? Nte nnyịn imekeme ndibe 22,199, ibat mbon oro ẹkenamde usiakusụn̄ unọ un̄wam ke April 1990 inyụn̄ ikeme ndisịm utịtmbuba edide 30,000 isua emi? Ibat eke 1990 ekedi n̄wakn̄kan ibat mme asiakusụn̄ unọ un̄wam ke ọfiọn̄ kiet ekededi ke Nigeria.
5 Wụk Ntịn̄enyịn ke April ye May: Isua emi, Editi ọduọ ke Saturday, April 11, anamde April edi ata eti ọfiọn̄ kaban̄a n̄kọri ke utom ukwọrọikọ. (2 Cor. 5:14, 15) Ke akpa usen 11 ke ọfiọn̄ oro, nnyịn idiwụk ntịn̄enyịn ke ndikot adan̄a ediwak owo oro ẹnyenede udọn̄ nte ikekeme ndidụk Editi. Edieke afo aduakde ndinam usiakusụn̄ unọ un̄wam, mbọk yak n̄wed eben̄e fo nọ ata anyan ini mbemiso usen emi afo oyomde nditọn̄ọ.—1 Cor. 14:40.
6 Sia May enyenede ọyọhọ ọyọhọ utịturua ition, mme asuanetop oro ẹkade ufọkn̄wed m̀mê ẹnamde utom idịbi udia uyọhọ ini ẹkeme ndikụt nte edide mmemmem n̄kpọ ndinam usiakusụn̄ unọ un̄wam ọfiọn̄ oro. Ebede ke ndidiomi hour duop ke utom ukwọrọikọ ke utịturua ition oro, ediyom afo odiomi hour duop efen kpọt ke ọfiọn̄ oro man esịm hour 60 oro ẹyomde.
7 Ke April ye May, nnyịn idinọ mme editobo Enyọn̄-Ukpeme ye Awake! nte mme n̄wed ẹnọde. Emi ekpenyene ndikam nsịn udọn̄ nnọ ediwak nnyịn efen efen ndinyanade mbịne nnyụn̄ nsiak usụn̄. Ntak itịn̄de oro? Mme magazine ẹmem ndinọ ẹnyụn̄ ẹnem ndida nnam utom ke utom ukwọrọikọ. Mmọ ẹdot ye kpukpru ikpehe utom—utom eke ufọk ke ufọk ye to ke ufọkurua sịm ufọkurua, ọkọrọ ye ke ini emi isan̄ade ibịne mme owo ke efak, ke mme itie ubon moto, ye ke mme itie inemesịt ye mme idaha ido nneme eken. Ke edide akpan n̄kpọ akan, Enyọn̄-Ukpeme ye Awake! ẹtan̄a mme akpanikọ Obio Ubọn̄. Mmọ ẹdụri ntịn̄enyịn ẹwụt nte prọfesi Bible osude, ẹsọn̄ọde nte ke Obio Ubọn̄ Abasi ke akara. Mmọ n̄ko ẹtụk uwem mme andikot ebe ke ndinam n̄kpọ mban̄a mme ata udọn̄ mme owo. Edieke nnyịn ikerede nte mme ọsọn̄urua n̄wed ẹmi ẹtụkde uwem nnyịn, oyonụk nnyịn ndibuana ke ndisuan mmọ ata ntatara ntatara ke adan̄a nte ikekeme ke April ye May inyụn̄ isịn udọn̄ inọ adan̄a ediwak owo nte ikekeme nditobo.
8 Ke nditịm idem nnọ ifịk ifịk utom magazine emi, afo ọyọbọ ufọn ke ndidụn̄ọde mme ibuotikọ ẹmi: “Enyọn̄-Ukpeme ye Awake!—Mme Ekemini N̄wedmbụk Akpanikọ” (Enyọn̄-Ukpeme, January 1, 1994), “Da Mme Magazine Nnyịn Nam N̄kpọ ke Mfọnn̄kan Usụn̄” (Utom Obio Ubọn̄ Nnyịn eke March 1996), ye “Tịm Nneme Unọ Magazine eke Idemfo” (Utom Obio Ubọn̄ Nnyịn eke October 1996).
9 Mbiowo Ẹda Usụn̄: Man ẹnọ se ediwak mme asuanetop oro ẹkenamde usiakusụn̄ isua oko ẹkeyomde, mbiowo ke esop kiet ẹma ẹtoro Saturday kiet ke ọfiọn̄ nte akpan usen utom ofụri esop. Ẹma ẹnam ndutịm ndisobo ke nsio nsio ibat ini ke usen oro, ẹnọde kpukpru owo ke esop ifet ndibuana ke nsio nsio ikpehe edinọ ikọ ntiense. Mmọ ẹmi ẹma ẹsịne edinam utom ke mme itieutom mbubehe, edinọ ikọ ntiense ke efak, ediwaha ke ufọk ke ufọk, ye edinam mme mfiakn̄ka. Utịp ekedi n̄wọrọnda, ye mme asuanetop 117 ẹbuanade ke utom an̄wautom ke usen oro. Mmọ ẹma ẹbiat hour 521 ke ofụri ofụri ke utom usen oro ẹnyụn̄ ẹnịm magazine, ndiye uduot n̄kpri n̄wed, ye mme n̄wed 617! Ẹma ẹda nduaidem Saturday oro ẹbe ẹdụk Sunday, ye ibat oro ekperede ndidi akanam owo isịmke ẹdụkde An̄wan̄wa Mbonoesop ye Ukpepn̄kpọ Enyọn̄-Ukpeme.
10 Ke Esoputom kiet kiet ke April ye May, ẹkpenyene nditi esop ini ye ebiet emi ẹdinịmde mme mbono an̄wautom ke urua oro editienede, akpan akpan edieke ẹnamde mme ndutịm efen efen ẹkan se ẹsinamde. Ẹsịn udọn̄ ẹnọ mme asiakusụn̄ ofụri ini ọkọrọ ye mme asuanetop ẹmi mîdịghe mme asiakusụn̄ unọ un̄wam ndinọ mme ndutịm otu ẹmi ibetedem nte mme idaha mmọ ẹyakde.
11 Oyoyom esenyịn utom osobo ye eyenete oro esidemede efakutom man ẹnam ndutịm ndinam utom ke efakutom oro owo mîsikụreke ndien ndien. Ẹkeme ndinọ ntịn̄enyịn efen efen ke mme itie ẹmi mme owo mîdụhe ke ufọk ye ke edinọ ikọ ntiense efak ye to ke ufọkurua sịm ufọkurua. Ẹkeme ndidori nsọn̄uyo ke edinọ ikọ ntiense mbubịteyo ke April. Ẹnyene nditobo magazine oro edikemde nnọ April ye May ke idotenyịn utom efen efen oro.
12 Ediwak Asuanetop Ẹkeme Ndidot: Akpa udịmikọ ke n̄wed eben̄e utom usiakusụn̄ unọ un̄wam ọdọhọ ete: “Ke ntak ima emi nnyenede nnọ Jehovah ye udọn̄ mi ndin̄wam mbon efen ẹkpep ẹban̄a enye ye mme ima ima uduak esie, n̄kpama ndifori udeme mi ke utom ukwọrọikọ ebe ke ndisịn enyịn̄ nte asiakusụn̄ unọ un̄wam.” Ndima Jehovah nnyụn̄ nyom ndin̄wam mbon efen ke n̄kan̄ eke spirit edi akpan n̄kpọ kaban̄a uyakidem nnyịn nnọ. (1 Tim. 4:8, 10) Man odot ke usiakusụn̄ unọ un̄wam, ana owo ana baptism, enyene eti idaha ido uwem, onyụn̄ ekeme ndisịn hour 60 ke utom ukwọrọikọ ke ọfiọn̄ oro. Nte kpukpru nnyịn ikerede iban̄a mme idaha nnyịn, nte ndusụk nnyịn ẹmi akananam mînamke usiakusụn̄ ke mbemiso imekeme ndinam ntre isua emi ke April m̀mê May?
13 Ediwak owo ke esop ẹkeme ndikụt nte ke mmimọ n̄ko imekeme ndinam usiakusụn̄ ke ini mmọ ẹkụtde mbon en̄wen ẹmi ẹnyenede mme ukem idaha mmọ ẹsịnde enyịn̄. Nditọ ufọkn̄wed, mbon usọn̄, mme anamutom idịbi udia uyọhọ ini, esịnede mbiowo ye mme asan̄autom unamutom, ye mbon eken ẹma ẹnam utom usiakusụn̄ unọ un̄wam uforo uforo. N̄wan ufọk ndọ ye eka nditọ iba emi enyenede utom uyọhọ ini ama esịm hour 60, enịm magazine 108, onyụn̄ ọtọn̄ọ ukpepn̄kpọ Bible 3 ke ọfiọn̄ kiet emi akanamde usiakusụn̄ unọ un̄wam. Didie ke enye akanam? Enye akada ini udia uwemeyo esie ke itieutom ndinọ ikọ ntiense ke n̄kpet n̄kpet efakutom, enye ama esinọ ikọ ntiense ebe ke ndiwet leta, ndien enye ama esisịn idem ke edinọ ikọ ntiense itie ubon n̄kpọisan̄ ye eke efak. Enye n̄ko ama esida usen nduọkodudu esie ke urua ke urua anam n̄kpọ ke eti usụn̄ ebe ke ndibuana ye esop ke utom an̄wautom. Okposụkedi enye ekekerede ke akpa ete ke utom usiakusụn̄ unọ un̄wam edi utịtmbuba oro owo mîkemeke ndisịm, ye nsịnudọn̄ otode mbon efen ye eti ndutịm, enye ama akan mme n̄kpọ ubiọn̄ọ oro.
14 Jesus ama ọn̄wọn̄ọ ọnọ mme mbet esie ete: “Ọkpọnọ Mi ememem, mbiomo Mi onyụn̄ efefere.” (Matt. 11:30) Oro ekedi ibuotikọ oro akamade nsịnudọn̄ ke Enyọn̄-Ukpeme, August 15, 1995. Enye etịn̄ aban̄a eyenete an̄wan kiet emi ekenyenede ata akama-mfịghe utom idịbi udia uyọhọ ini. Nte enye ama ekere ke utom usiakusụn̄ unọ un̄wam ikenyeneke imọ? Baba. Ke akpanikọ, enye ama an̄wana ndinam utom usiakusụn̄ unọ un̄wam kpukpru ọfiọn̄. Ntak-a? Koro enye ekekerede ke usiakusụn̄ ama enen̄ede an̄wam imọ ndida ukem ukem. Ndin̄wam mme owo nte mmọ ẹkpepde akpanikọ Bible ndinyụn̄ n̄kụt mmọ ẹkpụhọrede uwem mmọ man ẹnyene unyịme Abasi ekedi akakan ntak idatesịt ke uwem esie oro ọkọyọhọde ye utom.—N̄ke 10:22.
15 Ẹda akpakịp edidiọn̄ oro nnyịn idarade ẹnọ utịp ọkpọkpọ n̄waidem ye mme ukpụhọde oro oyomde owo anam man asiak usụn̄. Eyenete an̄wan kiet ama ewet aban̄a ifiọkutom esie ye utom usiakusụn̄ unọ un̄wam ete: “Enye ama an̄wam mi ndimen ekikere ke idem mi mfep nnyụn̄ n̄wụk ke ndin̄wam mbon efen. . . . Mmotoro enye nnọ mbon oro ẹkemede ndinam enye.”
16 Oyom Eti Ndutịm: Ke akpatre page esịne-esịt emi, imemịn̄ uwụtn̄kpọ ndutịm emi okodude ke Utom Obio Ubọn̄ Nnyịn eke February 1997. Ekeme ndidi kiet ke otu mmọ ẹmi ekem ye idaha fo. Nte afo odụn̄ọrede mmọ, kere ban̄a edinam eke ọfiọn̄ ke ọfiọn̄ ofụri ini fo. Mme utom ewe ke ufọk ke ekeme ndinam mbemiso usiakusụn̄ fo m̀mê ke ekeme ndikpọnọde nnịm kan̄a tutu ke oro ebede? Nte emekeme ndisụhọde ndusụk ini oro afo abiatde ke unọ idem inemesịt, unọ idem nduọkodudu, m̀mê mme orụk nduọkodudu eken? Utu ke ndise ofụri ibat hour 60 oro ẹyomde, diomi ndutịm fo ke usen ke usen m̀mê ke urua ke urua. Hour 2 kpọt ke usen m̀mê hour 15 ke urua ke ẹyom ndinam usiakusụn̄ unọ un̄wam. Se uwụtn̄kpọ ndutịm oro, ndien ye benetap ke ubọk, se se ekemede ndinam kaban̄a ọkpọkpọ ndutịm utom emi enen̄erede ọfọn ye afo ye ubon fo.
17 Eti edinam n̄kpọ mban̄a ye ibetedem efen efen emi esop ẹkenọde utom ukwọrọikọ isua oko ama edemede ifiopesịt asiakusụn̄ ofụri ini kiet emi ekewetde ete: “Ẹsọsọn̄ọ etieti ke ima ima nsịnudọn̄ mbufo ke ndisịn ukeme efen efen ndinọ usiakusụn̄ unọ un̄wam ibetedem. . . . Mme ndutịm oro mbufo ẹkenọde ekikere ẹma ẹn̄wam ediwak owo oro akananam mînamke usiakusụn̄ ndikụt nte ke mmọ ẹkeme ndinam enye. . . . Mmenem esịt etieti ndidi ubak esop Jehovah ndinyụn̄ ntiene ima ima ndausụn̄ idatesịt asan̄autom oro anamde akpanikọ onyụn̄ enyenede ọniọn̄.”
18 Mme N̄ke 21:5 ọsọn̄ọ ọnọ nnyịn ete: “Ekikere mme ọsọp-ubọk ẹkọ uwak ikpọn̄îkpọn̄.” Mme N̄ke 16:3 esịn udọn̄ ọnọ nnyịn ete: “Kan̄a utom fo nọ Jehovah, ndien uduak fo ọyọsọn̄ọ ada.” Ih, ke ndisịn Jehovah ke ubiere nnyịn ebe ke akam nnyụn̄ nsọn̄ọ n̄kọn̄ mbuọtidem nnyịn ke enye ndin̄wam nnyịn ikụt unen, imekeme nditie in̄wan̄în̄wan̄ kaban̄a uduak nnyịn ndinam usiakusụn̄ unọ un̄wam. Ekeme ndidi ke ima ikokụt nte ndutịm nnyịn asan̄ade ọfọn ke ọfiọn̄ kiet m̀mê iba ke usiakusụn̄ unọ un̄wam, nnyịn iyekeme ndisịn idiọn̄ọ ke ekebe ke n̄wed eben̄e utom usiakusụn̄ unọ un̄wam emi ọdọhọde ete: “Check here if you wish to serve continuously as auxiliary pioneer until further notice” (Sịn idiọn̄ọ mi edieke afo oyomde ndika-ka iso nnam utom nte asiakusụn̄ unọ un̄wam tutu ẹfiak ẹkop ẹto fi). Ke usụn̄ ekededi, nnyịn imekeme ndidori enyịn ndifiak nnam usiakusụn̄ unọ un̄wam ke August, ke ini ọyọhọ ọyọhọ utịturua ition ẹdidude. Nte nnyịn idade isua utom ikeberi ke August, ẹyesịn ọkpọsọn̄ ukeme man kpukpru owo ẹbuana ke an̄wautom ọyọhọ ọyọhọ nte ẹkekeme.
19 Jesus ama etịn̄ prọfesi ete: “Owo eke ọbuọtde idem ye Ami oyonyụn̄ anam utom eke Ami nnamde; enye oyonyụn̄ anam utom eke okponde akan oro.” (John 14:12) Edi idara idara ifet nnyịn ndinam utom nte ekemmọ mbonutom Abasi ke ini prọfesi emi enyenede akwa edisu esie. Ini edi emi ndikwọrọ eti mbụk ye n̄kponn̄kan ifịk, idepde ifet ndinam utom emi. (1 Cor. 3:9; Col. 4:5) Ndibuana adan̄a ediwak ini nte ikekeme ke usiakusụn̄ unọ un̄wam edi ata eti usụn̄ ndinam udeme nnyịn nte mme anditan̄a Obio Ubọn̄. Nnyịn ibet ye ọkpọsọn̄ udọn̄ ndikụt nte ikwọ itoro otode mme asiakusụn̄ unọ un̄wam edikponde ke ini Editi emi. (Ps. 27:6) Ke ikerede iban̄a utịp eke isua oko, nnyịn iyịk ite, ‘Nte nnyịn iyanam isua emi?’ Imenịm ke akpanikọ ke iyanam!
[Ekebe ke page 3]
Nte Afo Emekeme Ndinam Usiakusụn̄ Unọ Un̄wam?
“Sededi mme ọkpọkpọ idaha fo edide, edieke edide afo ama ana baptism, enyenede eti idaha ido uwem, ekemede ndinam ndutịm man osịm se ẹyomde emi edide edibiat hour 60 ke ọfiọn̄ kiet ke an̄wautom onyụn̄ enịm ete ke imọ imekeme ndinam utom ke ọfiọn̄ kiet m̀mê awakde akan oro nte asiakusụn̄ unọ un̄wam, mbiowo esop ẹyedat esịt ndikere mban̄a eben̄e fo kaban̄a ifetutom emi.”—Ẹtịm Man Inam Utom Nnyịn Ima, page 114.
[Ekebe ke page 6]
Mme Ndutịm Asiakusụn̄ Unọ Un̄wam
Mme uwụtn̄kpọ ke Nte Ẹkpediomide Hour 15 ke Utom An̄wautom ke Urua Kiet Kiet
Usenubọk—Monday Esịm Saturday
Ẹkeme ndida Sunday n̄kpụhọ ye usen ekededi
Usen Ikpehe Ini Hour
Monday Usenubọk 2 1⁄2
Tuesday Usenubọk 2 1⁄2
Wednesday Usenubọk 2 1⁄2
Thursday Usenubọk 2 1⁄2
Friday Usenubọk 2 1⁄2
Saturday Usenubọk 2 1⁄2
Ofụri Ibat Hour: 15
Ofụri Usen Iba
Ẹkeme ndimek usen iba ekededi ke urua
Usen Ikpehe Ini Hour
Wednesday Ofụri Usen 7 1⁄2
Saturday Ofụri Usen 7 1⁄2
Ofụri Ibat Hour: 15
Mbubịteyo Iba ye Utịturua
Ẹkeme ndimek mbubịteyo usen iba ekededi ke urua
Usen Ikpehe Ini Hour
Monday Mbubịteyo 1 1⁄2
Wednesday Mbubịteyo 1 1⁄2
Saturday Ofụri Usen 8
Sunday Ubak Usen 4
Ofụri Ibat Hour: 15
Uwemeyo Ufọturua ye Saturday
Ẹkeme ndida Sunday n̄kpụhọ ye usen ekededi
Usen Ikpehe Ini Hour
Monday Uwemeyo 2
Tuesday Uwemeyo 2
Wednesday Uwemeyo 2
Thursday Uwemeyo 2
Friday Uwemeyo 2
Saturday Ofụri Usen 5
Ofụri Ibat Hour: 15
Ọkpọkpọ Ndutịm Utom Mi
Biere m̀mê hour ifan̄ ke edinyene ke ikpehe ini kiet kiet
Usen Ikpehe Ini Hour
Monday
Tuesday
Wednesday
Thursday
Friday
Saturday
Sunday
Ofụri Ibat Hour: 15