Odudu Oro Mme Vidio Ẹnyenede ke Ndinọ Ikọ Ntiense
1 “Eyeneren nnyịn ama ese vidio emi anyan ini mbemiso enye ekekemede ndisan̄a isan̄. Enye ama esise enye ekese ini. Enem didie ntem ndinyene mme n̄kpọ oro ẹkemede ndisịn ima Jehovah ke esịt nditọ nnyịn!” Ewe vidio ke ete emi edide Christian mi eketịn̄ aban̄a? Enye oro ẹkotde Noah—He Walked With God. Eka kiet oro mîdịghe Ntiense emi eyen esie eren ekesede vidio Noah ke ufọk owo ama ọnọ etịbe oro edide ukem ye ₦10,458 ẹsọk ọfis n̄kọk itieutom onyụn̄ obụp m̀mê nnyịn imenyene vidio efen inọ nditọwọn̄. Mme vidio oro esop Jehovah etịmde ke ẹnyene ọkpọsọn̄ odudu ke idem n̄kpri ye ikpọ owo.
2 Ke Ubon: Ke ubon Ntiense kiet ama ekese Jehovah’s Witnesses Stand Firm Against Nazi Assault, eka mmọ ọkọdọhọ ete: “Mmetie ofụri usen n̄kere nte Jehovah akanamde mme ikpîkpu owo ẹkeme ndiyọ n̄kpọsọn̄ idaha! Ndikere mban̄a oro eti mi nte mme mfịna mi ẹkpride ke ndimen ndomo. Nditie ye nditọ nnyịn nse vidio emi an̄wam mmọ ndikụt ata in̄wan̄-in̄wan̄ nte ke oyom ẹberi edem ke Jehovah. Ebede ke ndineme enye ye mmọ ke ima ikese ikụre, nnyịn iman̄wam nditọ nnyịn iban ndinen̄ede ntịm idem ndiyọ mfịghe ye ukọbọ ekededi oro mmọ ẹkemede ndisobo.”
3 Ke Ufọkn̄wed: Ẹtọt nte ke uyen kiet emi edide Ntiense ama ekeme ndiwụt otu nditọ ubet ukpepn̄kpọ esie vidio Stand Firm ubak ubak. Ke mbemiso, andikpep mmọ ọkọdọhọ ete ke imọ imaha Mme Ntiense. Ke ama ekese vidio emi okụre, enye ama ọdọhọ ete: “Emi okpụhọ usụn̄ oro n̄kesisede Mme Ntiense Jehovah ofụri ofụri. Mmọn̄wọn̄ọ nte ke ini efen oro mmọ ẹdidide enyịnusụn̄ mi, nyakpan̄ utọn̄ nnọ mmọ nnyụn̄ ntọn̄ọ ndikpep Bible ye mmọ!” Nso ikokpụhọde ekikere esie kaban̄a nnyịn? Enye ọkọdọhọ ke ekedi “ata ima ye nsọn̄ọnda” nnyịn.
4 Ke An̄wautom: Eyenete an̄wan kiet ama osobo ye n̄wan oro ekesịnde ndibọ n̄wed, okposụkedi enye ekenyenede mme mbụme ndibụp mban̄a nnyịn ye mme edinịm ke akpanikọ nnyịn. Eyenete an̄wan emi ama ada vidio Jehovah’s Witnesses—The Organization Behind the Name ekebre owụt n̄wan oro ye ebe esie. Emi ama enen̄ede otụk mmọ mbiba ndien mmọ ẹma ẹnyịme ndikpep Bible. Nte utịp eti ikọ ntiense oro ẹkenọde mmọ, mmọ ẹma ẹtọn̄ọ ndidu uwem ekekem ye uduak Abasi.
5 Nte afo ke ada mme vidio nnyịn anam n̄kpọ ke usụn̄ oro ekemede ndida mfọnn̄kan utịp ndi?