Nditan̄ Mme Owo Ẹtode Kpukpru Usem Mbok
1 Ikọ Abasi ke osu! Mme owo ẹtode “kpukpru usem mme idụt” ke ẹnyịme utuakibuot akpanikọ. (Zech. 8:23) Didie ke Mme Ntiense Jehovah ẹn̄wam mme owo ke kpukpru ‘esien, idụt, ye usem’ ẹdinyene edisana idaha ke iso Jehovah, man ẹkpebọhọ “akwa ukụt”?—Edi. 7:9, 14.
2 Esop Abasi Anam N̄kpọ Aban̄a: Otu Ukara anam ndutịm man ẹnam mme n̄wed Bible ẹdu ke n̄kpọ nte usem 380 man mme owo ke ofụri isọn̄ ẹkeme nditịm mfiọk nte eti mbụk edide akpan n̄kpọ. Nditịm nnyụn̄ mmịn̄ mme n̄wed ke ediwak usem edi akamba utom. Enye abuana nditịm mme akabade n̄wed emi ẹdotde ndọn̄ ke mme otu nnyụn̄ nnọ mmọ un̄wam oro mmọ ẹyomde man ẹkabade mme n̄wed nnyịn ẹsịn ke kpukpru mme usem emi, ọkọrọ ye edinam ndutịm man ẹmịn̄ ẹnyụn̄ ẹnọ mme n̄wed emi ẹwọrọ. Nte ededi, mme owo oro ẹnyenede akpan udeme ke utom emi ẹdi mme asuanetop Obio Ubọn̄ kiet kiet, oro ẹdade etop unyan̄a uwem Bible emi ẹsọk mme owo.
3 Ndinyịme N̄kpọ-Ata Emi: Ke Nigeria nnyịn imenyene ediwak owo oro mîdụn̄ke ke obio emana mmọ. Man ẹnọ mbon emi eti mbụk, ndusụk mme asan̄autom Abasi ke ẹdomo ndikpep mbufa usem oro ẹsemde ke ebiet oro mmọ ẹdụn̄de. Ediwak owo ke ẹkpep Usem Idiọn̄ọ Mbon America man ẹsịm mbon oro ẹdide inan. Nnyịn imenyene ediwak otu mme esem usem idiọn̄ọ ke idụt emi. Ke ẹsiode Ikọmbakara ẹfep, mme n̄wed nnyịn ẹdu ke se iwakde ibe usem duop ke Nigeria. Ndusụk mbon oro akanam mîkopke iban̄a Jehovah m̀mê ndifiọk n̄kpọ ndomokiet mban̄a Bible ke ẹkpep ẹnyụn̄ ẹnyịme akpanikọ eke Ikọ Abasi.—Rome 15:21.
4 Nte nnyịn imekeme ndisịn idem ọyọhọ ọyọhọ ke nditan̄a eti mbụk nnọ mme owo oro ẹtode idụt efen ke efakutom nnyịn? (Col. 1:25) Ndusụk esop ke ẹnam ndutịm ẹnọ utom edikwọrọ ikọ ke n̄kann̄kụk oro mbon esenidụt ẹdụn̄ọde. Mme asuanetop ẹsibem iso ẹkpep usem oro nte ekemde ndida nnyene mmemmem nneme utọ nte: “Mmọkọm-o. Mmenyene eti mbụk nnọ fi. [Ekem ẹnọ tract m̀mê ediye uduot ekpri n̄wed emi odude ke usem oro.] Tie sụn̄-o.” Ke akpanikọ Jehovah ke ọdiọn̄ mme utọ ekpri ntọn̄ọ ntre!
5 Etop Obio Ubọn̄ ke edemede udọn̄ mme owo oro ẹtode kpukpru idaha ke uwem ẹnyụn̄ ẹsemde nsio nsio usem. Ẹyak nnyịn ida ifet oro ebererede ibuana enye ye mmọ.