San̄asan̄a Nsịnudọn̄ Edem Mbiba
1 Idụhe usen emi ikọt Jehovah mîsisoboke mme idomo mbuọtidem. Ke ọfiọkde ete ke ini imọ edi ibio, Devil ke an̄wana akpatre en̄wan ndibiat nsọn̄ọnda nnyịn ye Jehovah. (Edi. 12:12) Edi akpan n̄kpọ nnyịn ndika iso ‘nsọn̄ọ idem ke Ọbọn̄ ye ke ọkpọsọn̄ odudu Esie’ man nnyịn ‘idikeme ndisọn̄ọ nda ke usen idiọk, nnyụn̄ nsọn̄ọ nda ke ẹma ẹkenam kpukpru n̄kpọ.’—Eph. 6:10, 13.
2 Edisop idem ye ekemmọ mme andinịm ke akpanikọ edi ndutịm emi Jehovah anamde man an̄wam nnyịn ndikop odudu. Apostle Paul ama ọfiọk emi. Ama ọdọn̄ enye ndibuana ye nditọete Christian esie man otodo ẹkeme ‘ndidọn̄ kiet eken esịt’ nnyụn̄ nnam mmọ ‘ẹsọn̄ọ ẹda.’ (Rome 1:11, 12) Man ẹsọn̄ọ nnyịn idem ndinam uduak Abasi, Otu Ukara anam ima ima ndutịm man nnyịn inyene ifet ndibọ ufọn nto nsịnudọn̄ edem mbiba ke Mbono District “Ifịk Ifịk Mme Anditan̄a Obio Ubọn̄” oro edide.
3 Dụk Man Ọbọ Ufọn: Nam edi utịtmbuba fo ndidụk ofụri usen ita. Nnyịn iyenyene “udori” ke ndisịm mbemiso akpa ikwọ nnyụn̄ ndu nsịm ini ẹdidọhọde “Amen” ke ofụri esịt ke akam ediberi. (Isa. 48:17, 18) Oyoyom ediwak owo ẹnam ndutịm ke anyan ini man mmọ ẹkeme ndidụk ofụri usen ita oro. Edi akpanikọ, ekeme ndidi idimemke ndidọhọ eteutom fo ọnọ fi ini nduọkodudu, edi Jehovah ọsọn̄ọ ọnọ nnyịn nte ke imọ iyan̄wam nnyịn ndinam uduak esie. (1 John 5:14, 15) Edieke nnyịn mîkanamke oro kan̄a, ini edi emi ndinam enyene-iwụk ndutịm nnọ n̄kpọisan̄ ye itieidụn̄, itrede ndibiat ini ke n̄kpọ ekededi. Nnyịn imekeme ndinyene mbuọtidem nte ke Jehovah ọyọdiọn̄ ukeme oro nnyịn isịnde ndidụk ofụri usen ita oro.—N̄ke 10:22.
4 Dori Enyịn Ndibọ Nsịnudọn̄: Nte akanam afo ọmọdọhọ ke ọnyọn̄de mbono district edi ete: “Oro ekedi mfọnn̄kan mbono oro akanam ndụkde”? Ntak emi eketiede fi ke idem ntre? Emi edi koro nte mme anana-mfọnmma owo nnyịn imekeme nditọn̄ọ ndikpa mba, iyomde nsịnudọn̄ eke spirit. (Isa. 40:30) Eyenete an̄wan kiet ama ọdọhọ ete: “Editịm n̄kpọ emi anam mi n̄kpa mba, ndien ikpọ mbono ẹsinam mi mfiak n̄wụk ntịn̄enyịn ke idaha eke spirit mi, ẹnọde mi nsịnudọn̄ oro nyomde ke n̄kan̄ eke spirit. Etie nte nsịnudọn̄ oro esidi ke nnennen ini oro nnen̄erede nyom enye.” Eyedi esitie fi ke idem ntre.
5 Nnyịn imesibọ nsịnudọn̄ emi iyomde ito mme utịn̄ikọ ye mme ndụn̄ọde inyụn̄ ibọ n̄ko ebe ke nti ikpehe eken ke ikpọ mbono nnyịn. Eyenete kiet ọkọdọhọ ete: “Se nsinen̄erede mma edi in̄wan̄-in̄wan̄ usụn̄ oro ẹsiwụtde nte edida mme edumbet Bible nsịn ke edinam enyenede ufọn. Nte ededi, mme drama ẹsinyene ata akamba ufọn ke ndiwụt nnyịn nte ikemede ndibọ ufọn nto mme uwụtn̄kpọ eset, ẹdide nti m̀mê ndiọi. Mmesidori enyịn kpukpru ini ndibọ mbufa n̄wed oro ẹdisiode, ndien mmesikot mmọ ke mma n̄kesịm ufọk.”
6 Ikpọ mbono ẹdi akpan ndutịm oro Jehovah anamde ke “ndiọk eyo” emi. (2 Tim. 3:1) Mmọ ẹn̄wam nnyịn inam item odudu spirit emi: “Ẹdu ke ukpeme; ẹsọn̄ọ ẹda ke mbuọtidem; ẹnam n̄kpọ nte irenowo; ẹkop odudu.” (1 Cor. 16:13) Mmọdo, ẹyak nnyịn ibiere ndidụk kpukpru ikpehe nnyụn̄ mbọ ekese nsịnudọn̄ edem mbiba ke Mbono District “Ifịk Ifịk Mme Anditan̄a Obio Ubọn̄” nnyịn!
[Ekebe ke page 3]
Nam Ndutịm Ndidụk Ofụri Usen Ita
■ Ben̄e ini nduọkodudu ke itieutom.
■ Bọ ufọkidụn̄ ke obio mbono.
■ Nam ndutịm ban̄a n̄kpọisan̄ oro edidade aka mbono.