Nte Esop Mbufo Enyene Akamba Efakutom?
1 Ọtọn̄ọde ke ikpọ obio Judea tutu esịm mme obio-in̄wan̄ Galilee, Jesus ama ọnọ ntatara ikọ ntiense ke ofụri akamba efakutom Israel eset. (Mark 1:38, 39; Luke 23:5) Nnyịn n̄ko ikpenyene ndinam eti mbụk esịm adan̄a ediwak owo nte ikekeme. (Mark 13:10) Nte ededi, emi ekeme ndidi ọkpọsọn̄ n̄kpọ. Ntak-a?
2 Ediwak esop ke Nigeria ẹnyene ata akamba efakutom oro ẹdide obio-in̄wan̄, ẹkponde ẹsịm ediwak kilomita. Nso ke nnyịn ikeme ndinam ndin̄wam mme owo oro ẹdụn̄de ke utọ ikpọ efakutom ntre ndikpep akpanikọ aban̄ade Jehovah, Jesus, ye Obio Ubọn̄?
3 Tịm Nam Ndutịm: Esenyịn utom ye asan̄autom esede aban̄a efakutom ẹnyene ndinam ndutịm man esop esịn ukeme oro edidade akwa ufọn idi. Eyedi ẹkeme ndinam ndutịm nnọ mme san̄asan̄a Saturday ke ini ata ediwak owo ẹdikemede ndinam utom ofụri usen. Ke ini anamde utom ke mme nsannsan efakutom, nam ndutịm ndibiat ediwak hour ke an̄wautom edieke ekemede, adade udia oro edidiade ke uwemeyo. Mbufo ẹmekeme ndibak nnịm mbono an̄wautom n̄kan nte esidide man ini odu ndinam isan̄ n̄ka efakutom oro, mîdịghe ẹmekeme ndinịm mbono an̄wautom ekpere ebiet oro ẹdinamde utom. Nam mme otu an̄wautom ẹdi n̄kpri n̄kpri man kpukpru owo ẹnyene ediwak ufọk ndinam utom. Nam ndutịm ndinam utom ke mme obio-in̄wan̄ ke ini idaha eyo ye usụn̄ ẹfọnde. Tịm mme efakutom man otu an̄wautom kiet ekeme ndinam utom ke kpukpru ufọk ke ofụri ikpehe.
4 Kụt ete ke imakama n̄wed oro ekemde. Edieke owo mîsisọpke ndinam utom ke efakutom emi, ọkpọfọn ndikpọn̄ tract m̀mê akani magazine kiet ke ufọk oro owo mîdụhe. Edieke tract oro Nte Afo Akpama Ndifiọk N̄kpọ Efen Efen Mban̄a Bible? odude, deme enye nọ kpukpru owo oro afo osobode ndien nịm kiet ke ufọk oro owo mîdụhe.
5 Nọ Ọyọhọ Ibetedem: Ndinam utom ke akamba efakutom oyom edidianakiet oto kpukpru owo ke esop. Ke ini oyomde ẹwat oyom usụn̄, mbon oro ẹbuanade ke isan̄ oro ẹkeme nditịp okụk aran uwat. Oyom ẹwụt mbufiọk ke ini ẹkụtde mme enyeneufọk oro ẹnyịmede ndineme nneme. Fiọk ete ke oyom ẹsịm kpukpru owo ke efakutom oro. Edieke oyomde ndika iso ke anyan nneme ye owo emi enyenede udọn̄, nte emekeme ndinam ndutịm ndifiak n̄ka ke ama okokụre efakutom oro ẹkedemede ẹnọ fi?
6 Diomi ndinam n̄kpọ mban̄a kpukpru udọn̄ oro ẹwụtde. Ke ẹsiode adres ẹfep, domo ndibọ nọmba urụk ukopikọ owo oro enyenede udọn̄ man ekeme ndikot nnyụn̄ n̄ka iso nnọ ikọ ntiense ke urụk ukopikọ. Edieke mme usụn̄ obio-in̄wan̄ mînyeneke enyịn̄ m̀mê mme ufọk ndinyene nọmba, tịm wet n̄wed ndise obio mîdịghe wet nte edisan̄ade okokụt owo emi ekenyenede udọn̄ ke ini afiakde aka.
7 Nso akwa ifet ke nnyịn inyene ntem ndinam mme item Jesus emi: “Obio ekededi m̀mê obio-in̄wan̄ ekededi eke mbufo ẹdidụkde, ẹyom owo eke odotde ke esịt”! (Matt. 10:11) Ke akpanikọ Jehovah ọyọdiọn̄ ukeme mbufo nte mbufo ẹnọde idem unyịme unyịme ke utom emi ọnọde uyụhọ akan mi!