Ẹti Mbonusọn̄ Emi Ẹnamde Akpanikọ
1 Okposụkedi ekedide ebeakpa, Anna oro ọkọsọn̄de ke isua 84 ‘ikesinanake ke temple.’ Edinam akpanikọ esie ama anam Jehovah ọnọ enye san̄asan̄a edidiọn̄. (Luke 2:36-38) Mfịn, ediwak nditọete iren ye iban ẹnyene edu ebietde eke Anna kpa ye n̄kpọsọn̄ idaha oro mmọ ẹsobode. Ke ini utọ mbon oro ẹn̄wanade ye unana nsọn̄idem m̀mê unana ukeme otode usọn̄, mmọ ẹkeme ndikop mmemidem ndusụk ini. Ẹyak nnyịn ikere iban̄a ndusụk nti usụn̄ oro nnyịn ikemede ndisịn udọn̄ nnọ mmọ nnyụn̄ n̄n̄wam mmọ ndika iso ke eti ndutịm eke spirit.
2 Mme Mbono Esop ye Utom Ukwọrọikọ: Ke ini mbon en̄wen ẹnyịmede ndinam ndutịm n̄kpọisan̄ nnọ ediwak mbonusọn̄ emi ẹnamde akpanikọ mi, ekeme ndinen̄ede ndi mmemmem n̄kpọ ediwak mmọ ndidụk mme mbono esop Christian kpukpru ini. Esinyụn̄ anam mme anam-akpanikọ mbonusọn̄ emi ẹkọri ke n̄kan̄ eke spirit onyụn̄ ada ufọn ọsọk esop n̄ko. Nte afo emesitiene abuana ke eti utom emi?—Heb. 13:16.
3 Ndibuana ke an̄wautom kpukpru ini esinọ mme Christian akpanikọ idatesịt ye uyụhọ. Edi ndinam emi ekeme ndidi ọkpọsọn̄ n̄kpọ nnọ mbonusọn̄ ye mbon n̄kpọnnam. Nte kiet ke otu mbonima emi ekeme ndidi “nsan̄a-utom” fo ke ndusụk ikpehe utom unọ ikọ ntiense? (Rome 16:3, 9, 21) Ndusụk afo emekeme ndinam enye etiene fi abuana ke ndinọ ikọ ntiense ke urụk ukopikọ m̀mê nditiene fi n̄ka mfiakn̄ka m̀mê ukpepn̄kpọ Bible. Edieke owo usọn̄ emi mîkemeke ndiwọrọ an̄wa, nte emekeme ndida eyen ukpepn̄kpọ Bible fo n̄ka edem esie n̄kenịm ukpepn̄kpọ do?
4 Ukpepn̄kpọ ye Ebuana Ọtọkiet: Ke ini ke ini, ndusụk owo ẹsikot mbonusọn̄ m̀mê mbon n̄kpọnnam ẹdidụk ukpepn̄kpọ ubon mmọ, ndusụk ẹnịmde ukpepn̄kpọ oro ke edem mmọ. Mma kiet ama esida n̄kpri nditọ esie iba aka edem akamba eyenete an̄wan kiet man eketie do ekpep mmọ N̄wed Mi eke Mme Mbụk Bible, ndien ebuana ọtọkiet oro ama ọnọ kpukpru mmọ nsịnudọn̄. Utọ mme owo oro ẹsinyụn̄ ẹdara ke ini ẹkotde mmọ udia m̀mê mme edinam ebuana otuowo eken. Edieke idem ememde mbon n̄kpọnnam akaha tutu mmọ ikemeke nditie ke ufọk owo mbịghi, afo emekeme ndikese mmọ mîdịghe awaha okokot n̄wed ọnọ mmọ ke esisịt ini, ọbọn̄ akam ye mmọ, mîdịghe abuana ifiọkutom oro ọbọpde-bọp ye mmọ.—Rome 1:11, 12.
5 Jehovah ada mbonusọn̄ emi ẹnamde akpanikọ nte n̄kpọuto. (Heb. 6:10, 11) Nnyịn imekeme ndikpebe enye ebe ke ndikpono mmọ nnyụn̄ n̄n̄wam mmọ ndika iso nnyene eti ndutịm eke spirit.