Toro Jehovah ke Ndinọ Ikọ Ntiense Ido Nneme
1 Mme anam-akpanikọ asan̄autom Jehovah ẹsiyom mme ifet nditoro enye kpukpru usen. (Ps. 96:2, 3; Heb. 13:15) Usụn̄ kiet oro nnyịn ikemede ndinam emi edi ndinọ ikọ ntiense ido nneme. Ediwak mme andituak ibuot nnọ Jehovah mfịn ẹwụt esịtekọm nte ke owo akada ikọ ntiense ido nneme ọnọ mmimọ etop Obio Ubọn̄.
2 Ndinọ owo kiet ikọ ntiense ido nneme esiwak ndiberede usụn̄ nnọ mbon efen ndikop etop Obio Ubọn̄. Ke uwụtn̄kpọ, nneme oro Jesus ekenyenede ye n̄wan Samaria ke obube mmọn̄ Jacob ama anam ediwak owo ẹwụt udọn̄ ke eti mbụk. (John 4:6-30, 39-42) Ke adan̄aemi ẹkedọn̄de Paul ye Silas ke ufọk-n̄kpọkọbi ke Philippi, mmọ ẹma ẹnọ ekpeme ufọk-n̄kpọkọbi oro ikọ ntiense, ndien ofụri ufọk esie ẹma ẹnyịme akpanikọ.—Utom 16:25-34.
3 Mme Ifet: Mme ifet ewe ke afo enyene ndinọ ikọ ntiense ido nneme? Ndusụk owo ẹsinam ntre ke ini ẹkade ndidep n̄kpọ, ẹnamde isan̄ ke n̄kpọisan̄ ofụri owo, m̀mê ke ini ẹtiede ẹbet abiaibọk ke ufọkibọk. Ndusụk owo ẹsida ini nduọkodudu ke itieutom m̀mê ke ufọkn̄wed ndinọ ikọ ntiense. Ndikam nnam ẹkụt kiet ke otu mme n̄wed Bible nnyịn ekeme ndinam mbon efen ẹbụp ẹban̄a se nnyịn inịmde ke akpanikọ.—1 Pet. 3:15.
4 Nte Ẹkpetọn̄ọde: Eyenan̄wan isua itiaba oro ekesikopde bụt ama okop ẹtịn̄de ke mbono esop nte edikwọrọ ikọ nnọ kpukpru owo edide akpan n̄kpọ. Ntre ke ini enye akasan̄ade ye eka esie aka ufọkurua, enye ama esịn ndiye uduot n̄kpri n̄wed iba ke ekpat esie. Ke adan̄aemi eka esie okoyomde ndikpe okụk mme n̄kpọ oro enye ekedepde, ekpri eyenan̄wan emi ama ọnọ n̄wan kiet ediye uduot ekpri n̄wed ndien n̄wan emi ama ọbọ n̄wed emi ye inemesịt. Ke ini ẹkebụpde nte enye akasan̄ade enyene uko ntre ndinyene nneme ye n̄wan oro, eyenan̄wan emi ekesikopde bụt mi ama ọbọrọ ete: “Ami n̄kakam ndọhọ, Ben̄e idem, Daha, Ka! Ndien n̄ka!”
5 Man inọ ikọ ntiense ido nneme, kpukpru nnyịn imoyom ukem edu ekpri eyenan̄wan oro. Nso ikeme ndin̄wam nnyịn? Bọn̄ akam ben̄e uko nditịn̄ ikọ. (1 Thess. 2:2) Kere ban̄a se edibụpde m̀mê se editịn̄de ọkọn̄ọde ke ibuotikọ oro afo amade emi afo ekemede ndida ntọn̄ọ nneme. Ekem nyene mbuọtidem nte ke Jehovah ọyọdiọn̄ mme ukeme fo.—Luke 12:11, 12.
6 Ndinọ mme owo oro nnyịn isobode ke usen ke usen ikọ ntiense ido nneme esida itoro ọsọk Jehovah esinyụn̄ ọnọ nnyịn idatesịt. Enye ekeme ndin̄wam owo asan̄a ke usụn̄ oro adade esịm nsinsi uwem.