Ndikwọrọ Ikọ ke Ererimbot Oro Akade-Ka Iso Ndikpụhọde
1 Mme n̄kpọ ẹkeme ndikpụhọde usọp usọp didie ntem! Ke mbuari, oto-obot afanikọn̄, mfịna ndutịm uforo, ndutịme ukaraidem, m̀mê unọmọ oro enen̄erede ọwọrọ etop ekeme ndikabade ndi ibuot nneme. Nte ededi, mme owo ẹkeme ndisọsọp n̄wọn̄ọde ntịn̄enyịn n̄ka itie en̄wen. (Utom 17:21; 1 Cor. 7:31) Ke ererimbot oro akade-ka iso ndikpụhọde mi, didie ke nnyịn ikeme ndimụm ntịn̄enyịn mme owo man ibuana etop Obio Ubọn̄ ye mmọ?
2 Diọn̄ọ Mme Mfịna Mbon En̄wen: Usụn̄ kiet ndimụm ntịn̄enyịn mme owo edi nditịn̄ mban̄a mme n̄kpọntịbe ndondo emi. Ke ini ekesịnde udọn̄ ọnọ mme andikpan̄ utọn̄ nnọ enye ndinen̄ede n̄kere mban̄a itie ebuana mmọ ye Abasi, ke idaha kiet Jesus ama asiak mme n̄kpọ mmọn̄eyet ndondo oro, emi mmọ ẹkesụk ẹtide. (Luke 13:1-5) Kpasụk ntre, ke ini ikwọrọde eti mbụk, ọyọfọn nnyịn nditịn̄ mban̄a mbụk n̄kpọntịbe ndondo emi m̀mê mfịna n̄kann̄kụk oro otụkde uwem mme owo ke efakutom nnyịn. Nte ededi, ke ini inemede mme utọ n̄kpọ oro, ana nnyịn idu ke ukpeme mbak idinyene n̄kan̄ emi idade inọ ke mme eneni ukaraidem m̀mê eke n̄kaowo.—John 17:16.
3 Nnyịn idisan̄a didie ifiọk se mme owo ẹkerede ke ndondo emi? Eyedi mfọnn̄kan usụn̄ edi ndikam mbụp mbụme ndien ekem inọ n̄kpan̄utọn̄. (Matt. 12:34) Udọn̄ oro inyenede ke idem mme owo oyonụk nnyịn nditịm mfiọk ekikere mbon en̄wen nnyụn̄ nda mbufiọk mbụp mme n̄kpọ efen efen. Usọp usọp ibọrọ oro enyeneufọk ọnọde ekeme ndiyarade mfịna oro ediwak owo ẹnyenede ke n̄kann̄kụk ndien emi ekeme ndiberede usụn̄ ndinọ ikọ ntiense.
4 Nditịm Nneme: Ke nditịm idem nnọ utom an̄wautom ke ererimbot oro akade-ka iso ndikpụhọde, nnyịn imekeme ndida ekpri n̄wed Nte Ẹkpetọn̄ọde nnam n̄kpọ. Nti ekikere ke nte ikpabuande mme n̄kpọntịbe ndondo emi ke nneme nnyịn ẹdu ke page 4, ke idak ibuotikọ emi, “Mme N̄kpọntịbe Ndondo Emi” ye “Ubiatibet/Ifụre.” Ẹkeme ndikụt ukem ntọt oro ke Utom Obio Ubọn̄ Nnyịn eke September 2000, page 8. Ke ini etịmde nneme fo, kụt ete ke emesịn itie N̄wed Abasi oro odotde.
5 Nte nnyịn itịn̄de enyịn ke mme mfịna mbon oro ẹdude ke efakutom nnyịn oro akade-ka iso ndikpụhọde, oyom nnyịn ikpụhọde nte inemede eti mbụk nnyịn man ekekem ye mme idaha. Ntem ke nnyịn iditịn̄ se inen̄erede itụk uwem mme owo inọ mmọ. Ke ntre, nnyịn iyan̄wam ediwak owo efen efen ẹdi ẹdifiọk Enye emi mme edu ye mme idaha esie mîkpụhọkede.—Jas. 1:17.