Udia eke Spirit ke Edikem Ini
1. Didie ke Ezekiel 36:29 osu mfịn?
1 Jehovah Ọbọn̄ Andikara ọdọhọ ete: “Nyonyụn̄ n̄kot ibokpot edi, nnyụn̄ nnam enye awak, ndinyụn̄ ndorike mbufo akan̄.” (Ezek. 36:29) Ntịn̄nnịm ikọ oro enyene n̄kpọ ndinam ye ikọt Abasi mfịn. Ke nditịn̄ ke ndamban̄a usụn̄, Jehovah anam akpakịp ibokpot oro ẹnịmde uwem ẹdu ẹnọ ikọt esie. Mme ekemini udia eke spirit oro ẹnọde ke mme mbono district nnyịn ẹtịm ẹnam emi ẹn̄wan̄a.
2. Didie ke Jehovah ada mme mbono district ọnọ udia eke spirit ke edikem ini?
2 Ke akamba mbono oro ẹkenịmde ke Columbus, Ohio, ke 1931, Jehovah ama eteme mme andituak ibuot nnọ enye ndida obufa enyịn̄ oro—Mme Ntiense Jehovah. (Isa. 43:10-12) Ke 1935, ẹma ẹtịm ẹdiọn̄ọ akwa otuowo eke Ediyarade 7:9-17. Ke 1942, Brọda Knorr ama ọnọ utịn̄ikọ emi “Peace—Can It Last?” (Emem—Nte Enye Ekeme Ndibịghi?) Utịn̄ikọ oro ama esịn odudu ke utom ukwọrọikọ ofụri ererimbot ndien emi okosụn̄ọ ke ndisiak Ufọkn̄wed Enyọn̄-Ukpeme Ukpep Bible eke Gilead. Okposụkedi ndusụk mbono ẹsinen̄erede ẹdi n̄wọrọnda, mbono kiet kiet edi ọkpọmiọk udia eke spirit oro ẹnọde ke edikem ini.—Ps. 23:5; Matt. 24:45.
3, 4. Nso ke ana nnyịn inam man ibọ ufọn ito ọkpọmiọk udia eke spirit ke mbono district nnyịn?
3 Afo Adia Udia Oyụhọ Adan̄a Didie? Nnyịn imekeme ndinyene akpakịp udia edi ikpa biọn̄ edieke nnyịn mîsịnke ukeme ndidia udia oro. (N̄ke 26:15) Ukem oro ke edi ke n̄kan̄ eke spirit. Ke ediwak mbono, ẹsikụt nte ndusụk owo ẹkpọn̄de efe mbono ẹkesio ndise ke ini ikpehe edinam osụk akade iso. Mbon efen ẹsikam ẹkot mme osio ndise ẹdi an̄wa mbono. Owo inyịmeke edinam emi.—John 2:16.
4 Ẹsikụt n̄ko nte ediwak owo ẹyode ẹsan̄a ẹkanade mîdịghe ẹnemede nneme ye mbon efen ke ini edinam osụk akade iso. Ke adan̄aemi ebuana oro ọbọpde-bọp edide akpan ikpehe mbono, ẹkpenyene ndinam emi mbemiso ye ke ini ẹkụrede ikpehe edinam kiet kiet. (Eccl. 3:1, 7) Edieke nnyịn mîtiehe ke itie nnyịn ikpan̄ utọn̄, nnyịn imekeme nditaba akpan n̄kpọ. Ke ndusụk ini, mme esenyịn itieutom mbono ye nditọete oro ẹnyenede utom ndinam ẹkeme ndineme mme n̄kpọ mbono ke adan̄aemi ikpehe edinam osụk akade iso. Ke ẹsiode oro ẹfep, mmọ ẹkpenyene ndinịm uwụtn̄kpọ ke ndikpan̄ utọn̄ nnọ edinam. Owo nnyịn ndomokiet ikpatabake udia eke spirit oro ẹnọde.—1 Cor. 10:12; Phil. 2:12.
5. Didie ke nnyịn ikeme ndiwụt esịtekọm mban̄a akpakịp udia eke spirit oro Jehovah ọnọde?
5 Nnyịn idat esịt didie ntem ke akpanikọ eke spirit oro Jehovah ọnọde, emi okpụhọrede ye nsunsu ukpepn̄kpọ Christendom oro mînọhọ uyụhọ! (Isa. 65:13, 14) Usụn̄ kiet emi nnyịn ikemede ‘ndinyene esịtekọm’ edi ndida mbono oro nte ifet emi Jehovah adade ekpep nnyịn n̄kpọ. (Col. 3:16) Kûwụk ntịn̄enyịn ke idem eyenete oro ọnọde utịn̄ikọ, edi kam da ke etop oro oto “Akwa Anditeme” nnyịn. (Isa. 30:20, 21, NW; 54:13) Nen̄ede kpan̄ utọn̄. Ke ini odụkde Mbono District “Ẹsan̄a ye Abasi,” kere ban̄a ufọn ediwet mbio mbio akpan n̄kpọ, oro ẹdin̄wamde fi nditiene mbuana ke edifiak ndụn̄ọde oro ẹnemede-neme ke ndutịm Esoputom ke ntọn̄ọ ntọn̄ọ isua efen. Fiak dụn̄ọde mme akpan n̄kpọ edinam usen oro ke mbubịteyo kiet kiet. Da se afo ekpepde sịn ke edinam.
6. Mme ntak ewe ndidat esịt ke mme mbono district ẹsinọ nnyịn?
6 Kpukpru mbono oro ẹdụkde mbemiso Armageddon, edide ẹdụk ke itienna itọkekọn̄, idụt oro ẹkọn̄ ọnọmọde, m̀mê ke ikpehe oro enyenede ifụre, edi edikan oro ẹkande Satan! Nte nditọete oro ẹdianade kiet, nnyịn imama mme ifet oro inyenede ndiboho ọtọkiet ke mme mbono district. (Ezek. 36:38) Nnyịn imodori enyịn ite ke Jehovah ke ima ọmọn̄ afiak ọnọ nnyịn ‘udia ke edikem ini.’—Luke 12:42.
[Ekebe ke page 4]
Wụt Esịtekọm Ban̄a Okpokoro Jehovah
◼ Nen̄ede kpan̄ utọn̄
◼ Wet mme akpan n̄kpọ
◼ Fiak dụn̄ọde mme akpan n̄kpọ edinam usen oro ke mbubịteyo kiet kiet
◼ Da se afo ekpepde sịn ke edinam