‘Ẹyak Nnyịn Itoro Enyịn̄ Esie Ọtọkiet’
1. Nso ifet ke nnyịn idinyene nditoro enyịn̄ Abasi ọtọkiet, ndien nso ke nnyịn ikeme ndinam idahaemi nditịm idem?
1 Andiwet psalm ọkọkwọ ete: “Ẹtiene mi ẹkpono Jehovah, ẹyak nnyịn inyụn̄ itoro enyịn̄ esie ọtọ kiet.” (Ps. 34:3) Mbono District “Ẹsan̄a ye Abasi” oro edide ọyọnọ nnyịn ifet nditoro enyịn̄ Jehovah ọtọkiet ye nditọete nnyịn oro ẹtode ediwak esop. Nte afo amanam ndutịm aban̄a itieidụn̄, n̄kpọisan̄, ye ini nduọkodudu ke itieutom? Oyowụt eti ibuot nnyịn ndibabak nnam mme n̄kpọ emi.—N̄ke 21:5.
2. Ntak ọfọnde ndidiomi ndibabak nsịm itie mbono?
2 Ndisịm Itie Mbono: Ediwak n̄kpọ ẹdu ndise mban̄a ke ini ikade mbono. Ndibabak ndaha ayan̄wam nnyịn ndifep ubiatini oro owo mîkodorike enyịn, oyonyụn̄ an̄wam nnyịn ndidu ke itie ke eti ini nnyụn̄ mbuana ke ofụri esịt ke ikwọ ye akam ediberede. (Ps. 69:30) Minit ifan̄ mbemiso ikpehe edinam ọtọn̄ọde, etieibuot okpokoro eyetie ke mbot utịn̄ikọ ke adan̄aemi ẹbrede ikwọ Obio Ubọn̄ ndida ntọn̄ọ. Kpukpru nnyịn ikpenyene ndidu ke itie nnyịn ini oro man ndutịm ekeme nditọn̄ọ ke ido nte eyede.—1 Cor. 14:33, 40.
3. Ẹkeme ndimụm n̄kpọitie nnịm nnọ mmanie ke itie mbono?
3 Ikọ Abasi ọnọ nnyịn item ete ‘inam kpukpru se inamde ke ima.’ (1 Cor. 16:14) Ẹmekeme ndimụm n̄kpọitie nnịm nnọ mbon oro ẹsan̄ade ke n̄kpọisan̄ mbufo m̀mê mbon oro ẹdụn̄de ufọk kiet.—1 Cor. 13:5; Phil. 2:4.
4. Nso mme ndutịm ke ẹnam ẹban̄a nduọkodudu uwemeyo, ndien didie ke emi enyene ufọn?
4 Mbufo ẹmekeme ndidia udia uwemeyo ke efe mbono. Mbọk ẹkûdehe itie oro ẹtiede, m̀mê ndibon mme efọk n̄kpọ ke isọn̄. Ndidia n̄kpọ ke efe mbono ayanam kpukpru nnyịn inyene ebuana oro ọbọpde-bọp inyụn̄ idu ke ini ikpehe edinam uwemeyo ọtọn̄ọde. Edieke oyomde, ẹkeme ndikama ekpri n̄kpọ udọn̄ udia emi ẹkemede ndinịm ke idak n̄kpọitie. Owo inyịmeke ẹmen ikpọ n̄kpọ udọn̄ udia ye mme ọtọ-akpa ẹdụk efe mbono. N̄ko, owo inyịmeke ẹmen n̄kpọsọn̄ mmịn ẹdi itie mbono. Ke ini edem, ẹma ẹkụt ndusụk owo ẹtemde n̄kpọ ke ufọkidụn̄ ke ini ikpehe edinam osụk akade iso. Emi edi unana ediwụt esịtekọm nnọ mme n̄kpọ eke spirit.—Luke 10:38-42.
5. Didie ke nnyịn ikeme nditịm esịt nnyịn nnọ item emi idibọde?
5 Ọkpọmiọk Udia eke Spirit Ana Ebet Nnyịn: Edidem Jehoshaphat ama etịm m̀mê ‘owụk esịt esie ndiyom Abasi.’ (2 Chron. 19:3) Didie ke nnyịn ikeme nditịm esịt nnyịn mbemiso mbono? Mme ibuotikọ emi ẹdude ke edem page nsiondi Awake! eke May 22 ye June 8 ẹnam ibem iso ikụt ọkpọmiọk udia eke spirit oro ẹdinọde. Ntak mûdaha ini utie ukere mme ibuotikọ oro, enyenede udọn̄ aban̄a se Jehovah enịmde ọnọ nnyịn? Nditịm esịt nnyịn abuana n̄ko ndiben̄e Jehovah anam item oro idibọde an̄wan̄a nnyịn, inyụn̄ ida enye isịn ke edinam.—Ps. 25:4, 5.
6. Nso idọn̄ nnyịn ndinam, ndien ntak-a?
6 Ọdọn̄ kpukpru nnyịn ndikpep n̄kpọ efen efen nto Ikọ Abasi, ifiọkde ke enye ekeme ndinam nnyịn ikọri isịm edinyan̄a. (1 Pet. 2:2) Ntem, ẹyak nnyịn idụk Mbono District “Ẹsan̄a ye Abasi” inyụn̄ ‘itoro enyịn̄ Jehovah ọtọkiet.’—Ps. 34:3.
[Ekebe ke page 3]
Usụn̄ Nditoro Enyịn̄ Abasi
◼ Babak tịm idem
◼ Wụt mbon efen ima
◼ Tịm esịt fo