“Ẹnyene In̄wan̄-In̄wan̄ Esịt”
1. Nso mbiomo ke nnyịn owo kiet kiet inyene?
1 Ke otu nditọete Christian, nnyịn owo kiet kiet imenyene mbiomo nditịp nsịn ke ndinam esop enyene ufiop. (1 Pet. 1:22; 2:17) Utọ ufiop oro esidu ke ini nnyịn inyenede “in̄wan̄-in̄wan̄ esịt” ke ndinam ima oro imade kiet eken atara. (2 Cor. 6:12, 13) Ntak edide akpan n̄kpọ nditịm mmehe ye nditọete nnyịn?
2. Ntak edide akpan n̄kpọ ndinam ufan ye ekemmọ mme andinịm ke akpanikọ?
2 Itie Ufan Ọdọdiọn̄ Ọkọri: Nte nnyịn itịmde imehe ye ekemmọ mme andinịm ke akpanikọ, nnyịn iyenen̄ede ima mbuọtidem, ime, ye nti edu eken oro mmọ ẹnyenede. Nnyịn idida mme ndudue mmọ ke ekpri n̄kpọ, ndien mbọbọ itie ufan ọyọdọdiọn̄ ọkọri. Edieke itịmde imehe ye kiet eken, nnyịn iyodu ke idaha oro ọfọnde akan ndisọn̄ọ kiet eken idem nnyụn̄ nnam enye ọkọri. (1 Thess. 5:11) Nnyịn imekeme ndikabade ndi ‘mme andin̄wam emi ẹsọn̄ọde kiet eken idem’ man ẹbiọn̄ọ mbiara edu ererimbot Satan. (Col. 4:11, NW) Ke ikerede iban̄a ukperedem ini emi ọyọhọde ye mfịghe mi, nnyịn iwụt esịtekọm didie ntem ndinyene nti ufan ke otu ikọt Jehovah!—N̄ke 18:24.
3. Didie ke nnyịn ikeme ndidi mme andin̄wam emi ẹsọn̄ọde kiet eken idem?
3 Nnyịn imekeme ndinyene san̄asan̄a odudu inyụn̄ ibọ ndọn̄esịt ito n̄kpet n̄kpet ufan ke ini isobode n̄kpọsọn̄ idomo. (N̄ke 17:17) Christian kiet oro akan̄wanade ndikan ekikere oro enye ekenyenede nte ke imọ inyeneke ufọn eti ete: “Ama odu mme ufan oro ẹkesitịn̄de nti n̄kpọ ẹban̄ade mi ẹnọ mi man ẹn̄wam mi n̄kan ndiọi ekikere oro n̄kenyenede.” Mme utọ ufan oro ẹdi edidiọn̄ Jehovah.—N̄ke 27:9.
4. Didie ke nnyịn ikeme nditịm mmehe ye mbon efen ke esop?
4 Wụt Udọn̄ ke Idem Mbon Efen: Didie ke nnyịn ikeme ndinam ima nnyịn atara esịm ekemmọ mme andinịm ke akpanikọ? Ke adianade ye edikọm mbon efen ke mme mbono esop Christian, domo ndinyene akpan nneme ye mmọ. Ye unana edinọhọ ke ọkpọkpọ mbubehe mmọ, wụt udọn̄ ke idemmọ. (Phil. 2:4; 1 Pet. 4:15) Usụn̄ efen ndiwụt udọn̄ ke idem mbon enwen edi ndikot mmọ ẹdi udia ke ufọk fo. (Luke 14:12-14) Mîdịghe afo emekeme ndidiomi ndisan̄a ye mmọ ke an̄wautom. (Luke 10:1) Nte nnyịn in̄wanade nditịm mmehe ye nditọete nnyịn, nnyịn iyanam edidianakiet ọkọri ke esop.—Col. 3:14.
5. Nso idi usụn̄ kiet nditat itie ufan nnyịn?
5 Ndi nnyịn isimek mme n̄kpet n̄kpet nsan̄a nnyịn ito sụk otu mbon oro ẹdide uke nnyịn m̀mê ẹnyenede ukem udọn̄ ye nnyịn? Nnyịn ikpayakke mme utọ n̄kpọ oro ẹbiere utọ mbon oro nnyịn idade inam ufan ke esop. David ye Jonathan ọkọrọ ye Ruth ye Naomi ẹma ẹnyene ọkpọsọn̄ mbọbọ itie ufan kpa ye oro mmọ mîkedịghe ukem ke isua emana ye ke idaha mmọ ke uwem. (Ruth 4:15; 1 Sam. 18:1) Nte afo emekeme nditat itie ufan fo? Ndinam ntre ekeme ndida mme edidiọn̄ oro afo mûkodorike enyịn ndi.
6. Nso idi ndusụk ufọn edinyene in̄wan̄-in̄wan̄ esịt ke ima oro imade nditọete nnyịn?
6 Ke ndinyene in̄wan̄-in̄wan̄ esịt ke ima oro imade mbon efen, nnyịn iyọsọn̄ọ kiet eken idem inyụn̄ inam emem odu ke esop. Ke adianade do, Jehovah ke idemesie ọyọdiọn̄ nnyịn ke ima oro imade nditọete nnyịn. (Ps. 41:1, 2; Heb. 6:10) Ntak mûnamke edi utịtmbuba fo nditịm mmehe ye adan̄a ediwak owo nte ekekeme?