Obufa Ndutịm Mbono Circuit

Ke “ndiọk eyo” emi, nnyịn imoyom ọniọn̄ Abasi man inyene unyịme Jehovah. (2 Tim. 3:1) Ke ndutịm mbono circuit eke 2005, ẹyenọ nnyịn nti item ye nsịnudọn̄ nte ẹdinemede ibuotikọ oro: “Yak ‘Ọniọn̄ Eke Otode ke Enyọn̄’ Ada Fi Usụn̄.”—Jas. 3:17, NW.

Akpa nneme, “Ndiwụt ‘Ọniọn̄ Eke Otode ke Enyọn̄’ ke Uwem Nnyịn,” ayan̄wam nnyịn ndikụt se ibuanade ke ndinyene edisana ido, ndinam emem, ndinyene eti ibuot, ndinyụn̄ nnyịme ndikop item. Ekem, esenyịn circuit oyowụk ntịn̄enyịn ke ikpehe ita efen oro aban̄ade ọniọn̄ eke otode ke enyọn̄. Esenyịn district eyeberi ndutịm akpa usen ke ndiwụt nte ẹtịmde mme asan̄autom Christian idem nditịn̄ ọniọn̄ Abasi, okposụkedi ndusụk owo ẹsede mmọ nte mbon “emi mîfiọkke n̄wed ye mme usụhọde owo.”—Utom 4:13, NW.

Ke ọyọhọ usen iba, nneme oro ibuotikọ edide, “Ẹbịne Mme N̄kpọ Oro Ẹbọpde-Bọp” ayan̄wam nnyịn ndifiọk nnyụn̄ mbiọn̄ọ mme n̄kpọ oro ẹkemede ndinam nnyịn imem ke n̄kan̄ eke spirit. Nneme oro n̄ko oyowụt nnyịn nte ikemede ndisịn udọn̄ nnọ kiet eken ke mbono esop, ke an̄wautom, ye ke esịt ubon. Utịn̄ikọ an̄wa oro, “Nte Eti Ibuot Emi Otode Abasi Enyenede Ufọn Ọnọ Nnyịn” ayanam nnyịn iwụt ntotụn̄ọ esịtekọm iban̄a mme ufọn oro ibọde ito edida mme edumbet Abasi nsịn ke edinam ke uwem nnyịn. Akpatre utịn̄ikọ oro, “Ndida Ọniọn̄ Abasi Nnam N̄kpọ Ekpeme Nnyịn,” ọyọsọn̄ọ ubiere nnyịn ndiyom ọniọn̄ eke otode Jehovah ke mme akpatre usen emi.

Ini nduaidem ke kpukpru mbono esidi edinịm mbufa mbet baptism. N̄ko, ẹyeneme ndutịm Ufọkn̄wed Utom Ukara Abasi ye Ukpepn̄kpọ Enyọn̄-Ukpeme eke urua oro. Jehovah oyom kpukpru nnyịn ibọ ufọn ito ọniọn̄ emi enye ọnọde. Mme item ye nsịnudọn̄ oro ẹnade ẹbet nnyịn ke mbono circuit nnyịn ẹyenam inen̄ede iyụhọ ke n̄kan̄ eke spirit.—N̄ke 3:13-18.