Obufa Ndutịm Usen Akpan Mbono

Edieke nnyịn ikopde m̀mê ikụtde idiọn̄ọ nte ke n̄kpọ ọmọn̄ etịbe edi nnyịn inamke n̄kpọ iban̄a, utịp ekeme ndikama afanikọn̄. Enen̄ede edi akpan n̄kpọ nnyịn nditiene ndausụn̄ eke spirit oro Jehovah ọnọde. Ẹyesọn̄ọ ẹtịn̄ emi ke ndutịm usen akpan mbono eke 2005. Ibuotikọ edi “Ẹkpeme nte Mbufo Ẹkpan̄de Utọn̄.”—Luke 8:18.

Ke akpa utịn̄ikọ esie, etịn̄ikọ oro otode-to edi eyeneme nte ntọn̄ọ ntọn̄ọ item eke odudu spirit emi apostle Paul ekewetde ọnọ ẹsọk mbon Hebrew ẹbehede nnyịn mfịn. Ke akpatre utịn̄ikọ oro, “Nọ Ntịn̄enyịn Kpukpru Ini ke Item Abasi,” etịn̄ikọ oro otode-to edi ayan̄wam kpukpru owo ndidụn̄ọde m̀mê mmọ ke ẹnen̄ede ẹkpan̄ utọn̄ ẹnọ Jehovah, Eyen esie, ye “ofụn emi anamde akpanikọ onyụn̄ enyenede ọniọn̄.”—Matt. 24:45, NW.

Ediwak utịn̄ikọ ke ndutịm oro ẹyenen̄ede ẹnyene ufọn ẹnọ mme ubon. Ibuotikọ oro, “Mme Ubon Oro Ẹkpan̄de Utọn̄ Ẹnọ Ikọ Abasi ye Unana Ediwọn̄ọde Ntịn̄enyịn” ayan̄wam nnyịn ndikpeme mbak mme n̄kpọ ererimbot ẹdibiat idaha eke spirit nnyịn. Enye eyesịne ndụn̄ọde oro ẹnamde ye mbon oro ẹnamde mme ukpụhọde ke uwem mmọ man ẹnịm mme n̄kpọ eke spirit akpa. Ẹyenam ndụn̄ọde ye mme uyen emi ẹsọn̄ọde ẹda ẹnọ akpanikọ ke ufọkn̄wed, ke otu ubọkn̄ka mmọ, m̀mê ke an̄wautom ke ibuotikọ oro “Nte Editịm N̄kpan̄ Utọn̄ Nnọ Ikọ Abasi Ọsọn̄ọde Mme Uyen Nnyịn Idem.” Ibuotikọ oro “Nditọwọn̄ Oro Ẹkpan̄de Utọn̄ Enọ Abasi Ẹnyụn̄ Ẹkpepde N̄kpọ” ayan̄wam nnyịn ikûda ukeme oro nditọwọn̄ ẹnyenede ndikpep n̄kpọ ke usụhọde. Ndụn̄ọde oro ẹdinamde ye n̄kpri owo ye mme ete ye eka mmọ ayan̄wam nnyịn ikụt ufọn edikpep nditọwọn̄ usụn̄ Jehovah toto ke edet iba.

Ke adan̄aemi Satan ‘abian̄ade ofụri ererimbot,’ Jehovah ke owụt mme anam-akpanikọ asan̄autom esie ọkpọusụn̄ oro mmọ ẹkpesan̄ade. (Edi. 12:9; Isa. 30:21) Nditịm n̄kpan̄ utọn̄ nnọ item esie nnyụn̄ nda enye nsịn ke edinam ke uwem anam nnyịn idi ọniọn̄, adade idatesịt ọsọk nnyịn, onyụn̄ adade esịm nsinsi uwem.—N̄ke 8:32-35.