Nen̄ede San̄a Kpere Mbon Oro Afo Amade
1 Mmanie ke nnyịn ikpama? Akpa ye akakan, nnyịn imama Jehovah. (Mark 12:30) Enye odot ima ye san̄asan̄a utuakibuot nnyịn ke ikerede iban̄a kpukpru se enye anamde ọnọ nnyịn nte usụn̄ ndiwụt akakan ima esie. (Rome 5:8) Sia Christ Jesus edide Andifak, Akwa Oku, ye Edidem nnyịn, nnyịn imenen̄ede ima enye. (1 Pet. 1:8) Mme ebe ye ibanndọ ẹkpenyene ndima kiet eken. (Eph. 5:25, 33) Ana ẹma ẹnyụn̄ ẹkama nditọ ke usụn̄ Jehovah. (Titus 2:4) Ndien kpukpru owo ke esop ẹnyene mbiomo ndima kiet eken.—1 Pet. 1:22.
2 Devil ke esịn ekese ukeme man anam nnyịn iwọn̄ọde ikpọn̄ mbon oro nnyịn ikpamade. Man ọyọhọ uduak esie, Devil esida ediwak n̄kari n̄kari edinam ye mme usụn̄ unam n̄kpọ. Ke uwụtn̄kpọ, enye ekeme ndida edidụk nsio nsio n̄ka ererimbot n̄wọn̄ọde ntịn̄enyịn nnyịn, anamde nnyịn inyene ata esisịt ini, mîdịghe ikûnyenyene ini aba inọ edidụk mme mbono esop m̀mê edibuana ke an̄wautom. Mîdịghe enye ekeme ndinam nnyịn ibiat ata akamba ubak ini ke edise ekebe ndise, vidio, edikot nnyụn̄ nnọ leta ilektrọnik, m̀mê edidụn̄ọde Intanet. Nso ke ẹkpenam ke ini Christian osobode mfịghe otode ererimbot m̀mê osobode idomo?
3 Oyom nnyịn inen̄ede isan̄a ikpere Jehovah, inyụn̄ in̄wana ye Satan. (Jas. 4:7, 8) Nte nnyịn ikotde inyụn̄ ikpepde n̄kpọ efen efen iban̄a uwem ye utom Jesus, esịtekọm oro inyenede inọ uwụtn̄kpọ oro enye ekenịmde ọnọ nnyịn onụk nnyịn nditiene nde ikpat esie ketket akan nte akanam edide. (1 Pet. 2:21; John 4:34) Amaedi ubon, nnyịn inyene ndikpeme idem ye ekikere nda ke idem eke ererimbot. Mbonubon ẹkpenyene ndidomo ndidu ọtọkiet nnyụn̄ nnam n̄kpọ ọtọkiet.—Deut. 6:7.
4 Ke esịt esop, ẹkpep kpukpru owo ndima kiet eken nnyụn̄ nnam emi ke ọyọhọ udomo, emi ọwọrọde ndinen̄ede nsan̄a n̄kpere nditọete nnyịn emi ẹdide mme andinịm ke akpanikọ. (Gal. 6:9, 10; 1 Thess. 4:9, 10) Nnyịn inam emi ebe ke ndibuana kpukpru ini ke mbono esop ye ke utom an̄wautom, ye ndika n̄kese nditọete nnyịn ke ufọk mmọ nnyụn̄ nsịn udọn̄ nnọ mmọ. Edieke itienede usụn̄ edinam emi, nnyịn iyekeme nditịm nyọ ke ini idomo edemerede m̀mê ke ini ndusụk akpan udọn̄ ẹdude.
5 Inamke n̄kpọ m̀mê nso idomo m̀mê idaha ke nnyịn idu, adan̄a nte nnyịn isan̄ade ikpere Jehovah, enye idikpụhu nnyịn m̀mê ndikpọn̄ nnyịn tutu amama. (Heb. 13:5) Christ Jesus ama ọn̄wọn̄ọ ete ke imọ iyodu ye nnyịn tutu esịm utịt ererimbot emi. (Matt. 28:20) Ẹnam mbọbọ ndọ ọsọn̄ ebe ke ndikọri mbọbọ ubon oro etịmde adiana kiet, oro ekemede ndisọn̄ọ nda mbiọn̄ọ mme mfịghe ẹtode ererimbot.
6 Nnyịn ikpakam ibiere ndinen̄ede nsan̄a n̄kpere mbon oro nnyịn imade. Ẹdemede udọn̄ kiet eken ẹnọ ima ye nti utom ke esịt esop ẹnyụn̄ ẹkọri ufiop ufiop ima ẹnọ kiet eken nte utịt akani editịm n̄kpọ emi asan̄ade ekpere.—Heb. 10:23, 24; 1 Pet. 4:8.