Ekebe Mbụme

◼ Didie ke nnyịn ikpanam mme utom esop?

Edidian ubọk nnam n̄kpọ anam ẹnyene eti ndutịm oro odude ke esop ikọt Jehovah. (1 Cor. 14:33, 40) Kere ban̄a ofụri ndutịm oro ẹsinamde ẹnọ mbono esop kiet kpọt. Ke adianade ye ndutịm oro, nditọete oro ẹsede ẹban̄a nsio nsio utom ẹnyene ekese n̄kpọ ndinam mbemiso ye ke mbono esop asuanade. Mme utom efen oro ẹnamde, emi mbon en̄wen mîkwe, ẹnyene ufọn n̄ko. Didie ke nnyịn owo kiet kiet ikeme ndinọ ndutịm emi ibetedem?

Nọ idem unyịme unyịme. Mbon oro ẹnọde idem mmọ unyịme unyịme ẹyenyene ekese n̄kpọ ndinam. (Ps. 110:3) Wụt mbon udọn̄ọ ye mbonusọn̄ edikere mban̄a. N̄wam ke ndinam ufọkmbono Obio Ubọn̄ asana. Nnyịn imekeme ndinam ediwak nti n̄kpọ oro owo mîdọn̄ke nnyịn. Oyom nnyịn inyene udọn̄ ndin̄wam.

Nam n̄kpọ nọ mbon en̄wen ke nsụhọdeidem. Mbon nsụhọdeidem ẹsikop inemesịt ndinam n̄kpọ nnọ mbon en̄wen. (Luke 9:48) Nsụhọdeidem idiyakke nnyịn inyịme se ibede ukeme nnyịn. Ke adianade do, nsụhọdeidem ayakpan nnyịn ndinam mme utom oro mînaha inọ nnyịn ndinam.—N̄ke 11:2.

Nam Akpanikọ. Ẹkedọhọ Moses emek “mbon akpanikọ” man ẹse ẹban̄a mme ifetutom ke Israel eset. (Ex. 18:21) Oyom utọ edu oro mfịn. Nam utom kiet kiet oro ẹnọde fi ke esịt akpanikọ. (Luke 16:10) Edieke mûdukemeke ndinam utom fo, kụt ete ke amanam eti ndutịm man owo en̄wen anam ke ini mûdụhe.

Nam ofụri ukeme fo. Idem ke mme utom ererimbot, ẹteme mme Christian ẹte ẹnam utom ke ofụri esịt. (Col. 3:22-24) Akakan ntak akam odu ndinam ofụri ukeme nnyịn man inam utuakibuot akpanikọ aka iso. Idem ọkpọkọm utom oro etie nte ekpri m̀mê usụhọde utom, enye edi edidiọn̄ ọnọ esop ke ini ẹnamde enye ke eti usụn̄.

Utom kiet kiet oro inyenede ọnọ nnyịn ifet ndiwụt ima oro inyenede inọ Jehovah ye nditọete nnyịn. (Matt. 22:37-39) Ẹyak nnyịn itịm inam se ededi oro ẹnọde nnyịn inam.