Ikpehe 3: Ndinịm Ukpepn̄kpọ Bible Oro Enyenede Uforo
Ndida Mme Itie N̄wed Abasi Nnam N̄kpọ Mfọn Mfọn
1. Ntak emi nnyịn ikpọsọn̄ọde iyịre ke N̄wed Abasi ke ini inịmde mme ukpepn̄kpọ Bible?
1 Uduak nnyịn ke ndinịm mme ukpepn̄kpọ Bible edi ‘ndinam mme mbet’ ebe ke ndin̄wam mmọ ẹfiọk ẹnyụn̄ ẹnyịme mme ukpepn̄kpọ Ikọ Abasi ẹnyụn̄ ẹda mmọ ẹsịn ke edinam ke uwem mmọ. (Matt. 28:19, 20; 1 Thess. 2:13) Ke ntre, ukpepn̄kpọ oro ekpenyene ndikọn̄ọ ke N̄wed Abasi. Akpa, ndiwụt nditọ ukpepn̄kpọ nte ẹkpeyomde mme akpan itie ke Bible mmọ ekeme ndin̄wam. Nte ededi, didie ke nnyịn ikeme ndida N̄wed Abasi n̄n̄wam utọ mbon oro ẹkọri ke n̄kan̄ eke spirit?
2. Didie ke ikpebiere m̀mê ewe itien̄wed ke ikpokot inyụn̄ ineme?
2 Mek Mme Itien̄wed Oro Edikotde: Ke ini etịmde idem, se nte itie N̄wed Abasi kiet kiet oro ẹsiakde ẹsịn ke ukpepn̄kpọ oro enyenede ebuana ye akpan n̄kpọ oro ẹnemede, nyụn̄ mek mme itien̄wed oro edikotde ye enye oro edinemede ke ini ukpepn̄kpọ oro. Ke ofụri ofụri, ọfọn okot mme itie N̄wed Abasi oro ẹsọn̄ọde se inịmde ke akpanikọ. Ẹmekeme ndibe n̄kpọn̄ mme itien̄wed oro mînyeneke ata nnennen ebuana ye se ẹnemede. Kere ban̄a mme udọn̄ ye idaha eyen ukpepn̄kpọ kiet kiet.
3. Nso idi ufọn edibụp mme mbụme, ndien didie ke nnyịn ikeme ndinam emi?
3 Bụp Mme Mbụme: Utu ke nditịn̄ se mme itie Bible ẹwọrọde nnọ eyen ukpepn̄kpọ, dọhọ enye akam etịn̄ se mmọ ẹwọrọde ọnọ fi. Afo emekeme ndida usọ mbụp mme mbụme. Edieke nte ẹbuande itie N̄wed Abasi an̄wan̄ade, afo emekeme ndibụp nte itien̄wed oro ọsọn̄ọde se ẹnemede ke ikpehe ekikere. Ke mme idaha en̄wen, ekeme ndiyom obụp akpan mbụme m̀mê udịm udịm mbụme man anam eyen ukpepn̄kpọ esịm nnennen ubiere. Edieke oyomde ẹnam mme n̄kpọ efen ẹn̄wan̄a, ẹkeme ndinam emi ke eyen ukpepn̄kpọ ama ọkọnọ ibọrọ.
4. N̄kpọ ifan̄ ke oyom ẹnam an̄wan̄a ke ini ẹkotde itie N̄wed Abasi?
4 Nam Ukpepn̄kpọ Edi Mmemmem: Otop utịgha oro enyenede mbufiọk esitop ubọk idan̄ kiet kpọt owụk ke n̄kpọ oro enye otopde. Ukem ntre, andikpep oro enyenede mbufiọk isitịn̄ke uwak ikọ man anam akpan n̄kpọ ọwọrọ ada. Enye ekeme nditịn̄ ikọ ke mmemmem usụn̄ oro an̄wan̄ade onyụn̄ enende. Ke ndusụk idaha, ekeme ndiyom anam ndụn̄ọde ke mme n̄wed Christian man etịm ọfiọk se N̄wed Abasi etịn̄de onyụn̄ atat enye nnennen nnennen. (2 Tim. 2:15) Edi kûdomo ndinam kpukpru n̄kpọ oro ẹdude ke itie N̄wed Abasi kiet kiet ke ukpepn̄kpọ oro ẹn̄wan̄a. Sịn mme n̄kpọ oro ẹyomde kpọt man ẹsọn̄ọ se ẹnemede.
5, 6. Didie ke nnyịn ikeme ndin̄wam nditọ ukpepn̄kpọ ẹda Ikọ Abasi ẹsịn ke edinam ke uwem mmọ, edi nso ke nnyịn mîkpanamke?
5 Wụt Nte Enyenede Ebuana: Ke ini odotde, n̄wam eyen ukpepn̄kpọ ndikụt nte itie Bible oro otụkde enye. Ke uwụtn̄kpọ, ke ini enemede Mme Hebrew 10:24, 25 ye eyen ukpepn̄kpọ oro mîtọn̄ọke ndidụk mme mbono esop Christian kan̄a, afo emekeme nditịn̄ mban̄a kiet ke otu mme mbono esop onyụn̄ okot enye edidụk. Edi kûnyenyịk enye. Yak Ikọ Abasi onụk enye ndinam n̄kpọ man enem Jehovah esịt.—Heb. 4:12.
6 Nte nnyịn inamde utom edinam mbet, ẹyak nnyịn ‘inam mme owo ẹsụk ibuot ke mbuọtidem’ ebe ke ndida N̄wed Abasi nnam n̄kpọ mfọn mfọn.—Rome 16:26.