Nte Ẹkpedade Mme Uwụtn̄kpọ Oro Ẹnọde Ẹnyene Nneme
1. Didie ke nnyịn ikpese mme uwụtn̄kpọ oro ẹnọde ndida nnyene nneme?
1 Mme uwụtn̄kpọ oro ẹnọde ke nte ẹkpenọde mme magazine nnyịn ye mme n̄wed efen ẹsidu kpukpru ini ke Utom Obio Ubọn̄ Nnyịn. Ke ini inamde utom ukwọrọikọ, inaha nnyịn ifiak itịn̄ mme ekikere oro ẹnọde mi ukem ukem nte ẹwetde. Ẹnọ mmọ man ẹn̄wam nnyịn ifiọk se ikpetịn̄de. Nnyịn iyenen̄ede ikụt unen edieke idade ikọ idem nnyịn inyene nneme. Nditịn̄ ikọ ke ndammana usụn̄ idinamke enyeneufọk okop ndịk, edi oyowụt ke itịn̄ ikọ ke esịt akpanikọ ye nte ke imenyene mbuọtidem ke se itịn̄de.—2 Cor. 2:17; 1 Thess. 1:5.
2. Ntak oyomde ikere iban̄a mme ido n̄kann̄kụk ke ini itịmde mme nneme nnyịn?
2 Kpụhọ Nneme Fo: Mme ido n̄kann̄kụk ẹnen̄ede ẹtụk nte nnyịn ikwọrọde eti mbụk. Ndi emekeme ndikọm enyeneufọk ndien ekem ọwọn̄ọde ekọm oro esịn ke ukwọrọikọ mîdịghe ndi mme owo ke efakutom mbufo ẹyom ọtọn̄ọ nneme nnennen nnennen? Oro okpụhọde ke nsio nsio ebiet, ndien idem ke ndusụk ini esikpụhọde ye kpukpru owo. Oyom iwụt mbufiọk n̄ko ke mme mbụme oro ibụpde. Mme mbụme oro ẹdotde ke ndusụk itie ẹkeme ndinam mme owo ke itie efen ẹkop bụt. Ntem, nnyịn inyene ndiwụt eti ibuot nnyụn̄ n̄kpụhọ nneme nnyịn ekekem ye se ẹnyịmede ke n̄kann̄kụk.
3. Ntak oyomde ikere iban̄a idaha ye ekikere mbon oro itịn̄de ikọ inọ?
3 Ke adianade do, nnyịn inyene ndikere mban̄a idaha ye ekikere mbon oro ẹdude ke efakutom nnyịn ke ini itịmde idem inọ an̄wautom. Ke uwụtn̄kpọ, anaedi nte afo enemede Matthew 6:9, 10 ye enyene-ifịk owo Catholic oyokpụhọde ye nte enemede ye owo emi mîmeheke ye “Akam Ọbọn̄.” Ebede ke ndibem iso n̄kere se iditịn̄de, nnyịn imekeme ndikpụhọ nneme nnyịn man enyene inem ọnọ mbon oro isobode ke an̄wautom.—1 Cor. 9:20-23.
4. Ntak emi eti ntịmidem edide akpan n̄kpọ?
4 Idem ke ini ikerede ndida mme uwụtn̄kpọ oro ẹnọde ekikere ẹban̄a nnyene nneme ukem ukem nte ẹwetde, idụhe se ẹkemede ndimen ndomo ye eti ntịmidem. Nnyịn ikpenyene nditịm n̄kot ibuotikọ oro iyomde ndida nnyene nneme inyụn̄ imek mme akpan n̄kpọ oro ẹkemede ndidemede udọn̄, ekem ida mmọ isịn ke nneme nnyịn. Edi ke ima ikemehe ye nti etop oro ẹdude ke n̄wed nnyịn ke ikeme ndinọ mmọ ye ifiopesịt.
5. Ntak emi nnyịn ikpetịmde nsio nsio usụn̄ unyene nneme, ndien didie ke ikeme ndinam oro?
5 Mme Usụn̄ Unyene Nneme Efen: Ndi mme usụn̄ unyene nneme oro ẹnọde nte uwụtn̄kpọ mi kpọt ke ẹyom ida inyene nneme? Baba-o. Edieke emehede ye usụn̄ unyene nneme m̀mê itie N̄wed Abasi efen, da oro nyene nneme. Akpan akpan ke ini ifet eberede ndinọ mme magazine, yom mme usụn̄ oro ekemede ndiwụt mme ibuotikọ eken kpa ke magazine oro, emi ẹnen̄erede ẹma ke efakutom mbufo. Ke ini ẹyomde ndinam mme usụn̄ unyene nneme ke an̄wautom n̄wụt ke Esoputom, ẹkeme nditịm idem man ẹnam ẹwụt nte ẹkpedade usụn̄ ekededi oro enyenede uforo ke efakutom n̄kann̄kụk enyene nneme. Ke usụn̄ emi, ẹkeme ndin̄wam kpukpru owo ẹneme eti mbụk ke usụn̄ oro enyenede uforo.