Ẹyenyan̄a Kpukpru Orụk Owo
1. Nnyịn ndinyene eti idaha ye Abasi ọkọn̄ọ ke nso?
1 Mfọnido Abasi oro owo mîdotke anam ẹkeme ndinyene edinyan̄a. Uduak Jehovah edi yak ‘kpukpru orụk owo ẹnyene edinyan̄a ẹnyụn̄ ẹsịm nnennen ifiọk akpanikọ.’ (1 Tim. 2:3, 4) Nnyịn ndinyene eti idaha ye Abasi ikọn̄ọke ke ebiet oro nnyịn itode, idaha oro nnyịn inyenede ke n̄kann̄kụk, ukeme oro inyenede, m̀mê nte itiede ke enyọn̄ idem, edi ọkọn̄ọ ke nnyịn ndibuọt idem ke uwa ufak Jesus. (John 3:16, 36) Nte mme nsan̄autom Abasi, ana nnyịn isio asari ekededi ifep ke esịt nnyịn sia emi ekemede ndinam nnyịn isịn mbon oro Jehovah enyịmede.
2, 3. Nso ikeme ndin̄wam nnyịn nditre ndibiere ikpe nnọ mme owo ntiene nte mmọ ẹtiede enyọn̄ enyọn̄?
2 Ẹkûbiere Ikpe ẹnọ Owo: Jehovah esise se mme owo ẹdide ke esịt idem, enye isinamke asari isinyụn̄ ikamake udu. (1 Sam. 16:7) Enye n̄ko ẹsikụt se mmọ ẹkemede ndinam. Ntre enye esise mbon oro ẹyomde ndinam n̄kpọ esie nte n̄kpọuto. (Hag. 2:7) Nte nnyịn imesise mbon efen nte Abasi esede?
3 Idem ekeme ndikpa nnyịn ndikụt nte ndusụk mbon oro nnyịn isobode ke an̄wautom ẹkamade idem. Mmọ ẹkeme ndisịne ọfọn̄ ntaha ntaha m̀mê ke usụn̄ oro ananade iso o-bụt, isarike idet ọfọn inyụn̄ ikwatke ntan̄ebek. Ekeme ndidi ndusụk mmọ inyeneke ufọkidụn̄. Mbon eken ẹkeme ndisọn̄ ido ye nnyịn. Utu ke ndibiere nte ke tutu amama utọ mbon oro idikemeke ndikabade ndi mme andituak ibuot nnọ Jehovah, akpana nnyịn inyene in̄wan̄-in̄wan̄ edu, “koro ini kiet ko nnyịn ikakam idi mbon unana ibuot, itụt utọn̄, [ẹma ẹnyụn̄] ẹtụn nnyịn usụn̄.” (Titus 3:3) Ke ifiọkde emi, ọyọdọn̄ nnyịn ndikwọrọ ikọ nnọ kpukpru owo, idem ye mbon oro etiede nte ke idotke se nnyịn ikwọrọde ikọ inọ ke ini isede mmọ enyọn̄ enyọn̄.
4, 5. Nso ke nnyịn ikpep ito uwụtn̄kpọ Jesus ye Paul?
4 Mme Uwụtn̄kpọ eke Akpa Isua Ikie: Jesus Christ ama esida ini an̄wam mbon oro mme owo ẹkekerede ke idikemeke ndikabade ndi mme andituak ibuot nnọ Jehovah. (Luke 8:26-39) Ke adan̄aemi enye mîkenyịmeke ndiọi edinam, enye ama ọfiọk ke mme owo ẹkeme ndiduọ ndụk idiọk usụn̄ uwem. (Luke 7:37, 38, 44-48) Ke ntre, enye ama esiwụt edikere mban̄a, “atua mmọ mbọm, koro mmọ ẹbietde erọn̄ eke mînyeneke andikpeme.” (Mark 6:34) Ndi nnyịn imekeme nditịm n̄kpebe uwụtn̄kpọ esie?
5 Ẹma ẹtọn̄ọ apostle Paul ke itiat, ẹmia enye, ẹnyụn̄ ẹsịn enye ke ufọk n̄kpọkọbi. (Utom 14:19; 16:22, 23) Ndi mme utọ afanikọn̄ emi ẹma ẹnam enye ayat esịt onyụn̄ ọdọhọ ke imọ ndika n̄kanam utom ke ndusụk idụt ye ekpụk ekedi ubiatini? Baba-o. Enye ama ọfiọk ke ẹkeme ndikụt mbon oro ẹnyenede esịt akpanikọ ke kpukpru ekpụk ndien enye ama ebiere ndiyom mmọ. Ndi ntre ke nnyịn isise mbon oro ẹtode nsio nsio ebiet ẹnyụn̄ ẹnyenede nsio nsio usụn̄ unam n̄kpọ, emi ẹdude ke efakutom nnyịn?
6. Nso utịp ke edu nnyịn ekeme ndinyene ke idem mbufa owo ke mme mbono esop?
6 Ndidara Mbon En̄wen Mfịn: Ediwak ikọt Abasi ẹsikop inemesịt nte ke nditọete ikesehe nte mmimọ iketiede ke enyọn̄ idem, edi ẹma ẹdara ndikụt mmimọ ke esop. Eren kiet emi ekesịnede mbabari ọfọn̄ okonyụn̄ akamade nsuahade ntan̄ebek ye idet ibuot oro ọkọniọn̄de esịm afara, ama aka Ufọkmbono Obio Ubọn̄ kiet ke Germany. Enye ama ọwọrọ idiọk etop. Kpa ye oro, ẹma ẹdara enye etieti ke mbono esop oro. Enye ama enen̄ede okop idatesịt onyụn̄ afiak odụk mbono esop urua oro eketienede. Ke ekpri ibio ini, enye ama ọtọn̄ọ ndikama idem esie ediye ediye, etre ndin̄wọn̄ sika, onyụn̄ anam ndọ ye ufan ima esie nte ekemde ye ibet. Ikebịghike mmọ ye nditọ mmọ ẹma ẹdiana kiet nte ubon ẹnam n̄kpọ Jehovah.
7. Didie ke nnyịn ikeme ndikpebe Abasi nnyịn emi mînamke asari?
7 Ke ndikpebe Abasi nnyịn emi mînamke asari, nnyịn ikpakam ikot kpukpru owo ẹdibọ ufọn ẹto mfọn Abasi emi owo mîdotke.
[Ndise ke page 3]
“Abasi inamke asari, edi ke kpukpru idụt enye enyenyịme owo eke abakde enye onyụn̄ anamde edinen ido.”—Utom 10:34, 35.