Ẹtoro Jehovah ke Akwa Esop
1, 2. Nso ifet ke mbono district ọnọ nnyịn, ndien ke mme usụn̄ ewe ke nnyịn ikeme ndinam emi?
1 Kpukpru isua, mme mbono district nnyịn ẹsinọ nnyịn utịbe utịbe ifet nditoro Jehovah. Esitie nnyịn ke idem ukem nte eketiede David, emi ọkọkwọde ete: “Nyọkọm fi ke akwa esop: nyotoro fi ke otu ediwak otu owo.” (Ps. 35:18) Ke Mbono District “N̄kopuyo Abasi” oro edide, didie ke nnyịn ikeme ndidiana kiet ntoro Jehovah?
2 Usụn̄ kiet oro nnyịn ikemede ndinam emi edi ke usịnen̄kpọ ye ke edu uwem nnyịn. Kọmiti mbono ke kiet ke otu mme itiembono ọkọdọhọ ete: “Nditọete ẹma ẹsịne n̄kpọ ẹnyụn̄ ẹkama idem nte ọfọnde. Mmọ ye nditọ mmọ ẹma ẹsibak ẹda itie, ẹnyụn̄ ẹdu uwem nte ọfọnde ke ofụri ini mbono oro.” Ebede ke ukamaidem, edidianakiet, ye edu uwem nnyịn, nnyịn owo kiet kiet imesitịp n̄kpọ isịn ke mme utọ ikọ oro ẹdade ẹtoro Abasi nnyịn.—1 Pet. 2:12.
3, 4. Didie ke nsụkidem edin̄wam nnyịn ndisịne n̄kpọ ke usụn̄ oro odotde mme Christian asan̄autom ke ini mbono akade iso ye ke edinam okụrede?
3 Ukamaidem: Oyom nsụkidem man isịne n̄kpọ inyụn̄ ikama idem ke usụn̄ oro adade itoro ọsọk Jehovah. (1 Tim. 2:9) N̄wed Ufọkn̄wed Utom ke page 132, ọdọhọ ete: “Owo oro enyenede sụn̄sụn̄ ido idiyomke ndiyat mbon efen esịt ntịme ntịme, idinyụn̄ iyomke ndidụri ntịn̄enyịn nte mîdotke nnọ idemesie.” Ke ediwak idụt, idịghe obufa n̄kpọ mme owo ndisịne ọfọn̄ oro mînyeneke iso o-bụt. Nte ededi, Jehovah enem esịt ke ukeme oro nnyịn isịnde ndida ke ibuot esie ke eti usụn̄. (Utom 15:14) Ke ini nnyịn isopde idem ke iso Jehovah, kpa n̄kponn̄kan Owo ke ekondo, nnyịn ikpenyene ndisịne n̄kpọ oro owụtde ukpono. (1 Chron. 29:11) Ntem, nnyịn ikpenyeneke ndikama mme ekpat, ndisịne ọfọn̄, m̀mê mme n̄kpọ eken emi ẹdade ẹsuan etop unyam sika m̀mê mme n̄kpọ ntre sia mme ata Christian mîsin̄wọn̄ke sika.
4 Nnyịn n̄ko inyene ndinọ ntịn̄enyịn ke nte ikamade idem ke ini edinam usen kiet kiet okụrede. Idem okposụkedi nnyịn ikemede ndiyom ndisịne ọfọn̄ oro etịmde efere nnyịn ke idem ke ini nduọkodudu m̀mê ke ini idiade udia ke itie unyamudia, edi akpan n̄kpọ nte ọfọn̄ ye ukamaidem nnyịn ẹdot nte mbon oro “ẹdọhọde ke ikpono Abasi.” (1 Tim. 2:10) Ọfọn̄ idotke itiene nte enye ọwọrọde etop ke ererimbot. (1 John 2:16, 17) Mme n̄wed Christian nnyịn ẹdọn̄ọ ndise oro ẹn̄wamde owo ndidiọn̄ọ ọfọn̄ oro iren ye iba ẹsisịnede ke nsio nsio idaha oro ẹwụtde nsụkidem ẹnyụn̄ ẹtịmde ẹdot. Ndidian kad idiọn̄ọ ke adan̄aemi idude ke obio mbono ayanam nnyịn iti nte ke idi mme Christian asan̄autom kpukpru ini.—2 Cor. 6:3, 4.
5, 6. Didie ke nnyịn ikeme ndiwụt ukpono nnọ okpokoro udia eke spirit Jehovah?
5 Ndikpono Okpokoro Jehovah: Ọbọn̄ Andikara ekondo amanam akwa udia ọnọ nnyịn. (Isa. 25:6; 1 Cor. 10:21) Edieke nnyịn idade editiene mbuana ke okpokoro udia eke spirit Jehovah ke akpan n̄kpọ, nnyịn iyaduak ndidụk mbono oro ke ofụri usen mbita oro ẹnịmde. Nte afo amanam ndutịm aban̄a itieidụn̄, n̄kpọisan̄, ye edibọ nduọkodudu ke itieutom? Nte afo omosio ini oro ekemde enịm ndida ntịm idem nnyụn̄ mbak ntọn̄ọ isan̄ man ekesịm itiembono ke eti ini onyụn̄ enyene itie nditie, emehe ye nditọete, onyụn̄ adiana ye mmọ ke nditoro Jehovah ke ikwọ ye akam ediberede?—Ps. 147:1.
6 Ndikpono okpokoro Jehovah oyonụk nnyịn nditịm nnọ n̄kpan̄utọn̄ ke ndutịm mbono nnyụn̄ ntre ndineme nneme ye mbon en̄wen, ndidia udia, nnyụn̄ nsan̄a n̄kanade efe mbono nte mîdotke. Mme ete ye eka ikpesịneke n̄kpri nditọ mmọ ikpaukot emi ẹsinamde uyom m̀mê mme utọ n̄kpọ ntre sia mme n̄kpọ emi esitịmerede otuowo. Jehovah ada asan̄autom emi anamde akpanikọ onyụn̄ enyenede ọniọn̄ ọnọ nnyịn udia eke spirit oro nnyịn iyomde idahaemi. (Matt. 24:45) Ikpanaha nnyịn itaba ndutịm emi ndomokiet. Mme ete ye eka ẹkpenyene nditie ye nditọ mmọ nnyụn̄ n̄n̄wam mmọ ndibọ ufọn ọyọhọ ọyọhọ.—Deut. 31:12.
7. Ẹdọhọ nnyịn inam nso iban̄a udia uwemeyo, ndien ntak-a?
7 Ẹsịn udọn̄ ẹnọ nnyịn ẹte ikama udia uwemeyo idi mbono utu ke ndikpọn̄ itiembono man ikedep udia ke ini nduọkodudu uwemeyo. Ama enen̄ede eye ndikụt ata ediwak mbon oro ẹkedụkde mbono isua oko ẹnamde item emi. Edinyụn̄ eye didie ntem edieke kpukpru owo ẹnamde ntre isua emi! Edi mbọk ẹti ndikwọhọde n̄kpọ ekededi oro ọduọhọde ke isọn̄ ẹnyụn̄ ẹnịm isọn̄ ufọkmbono oro asana. (Heb. 13:17) Ndutịm emi ọnọ eti ifet ndinyene ebuana oro ọbọpde-bọp ye nditọete nnyịn onyụn̄ etịp esịn ke edidianakiet ye emem oro adade itoro ọsọk Jehovah.—Ps. 133:1.
8, 9. Nso ifet efen efen ke mbono edinọ nnyịn ndida ntoro Jehovah?
8 Ndinọ Ikọ Ntiense Ido Nneme: Nnyịn imenyene ediwak ifet ndida n̄kpọkinua nnyịn ntoro Jehovah ke ini ikade m̀mê inyọn̄de itiembono. (Heb. 13:15) Edide nnyịn idia udia ke itie unyamudia m̀mê inyene nneme ye enyene-ebiet m̀mê mme anamutom ufọkisen m̀mê idu ke n̄kpọisan̄ ofụri owo, ẹyak nnyịn iyom ifet ndinọ ikọ ntiense. Mme n̄kpọuto eke spirit oro nnyịn inyenede ito mbono oro ẹyedu nnyịn ke esịt ye ke ekikere. Ẹyak nnyịn ibuana nti n̄kpọ emi ye mbon oro nnyịn isobode.—1 Pet. 3:15.
9 Nnyịn imenen̄ede iben̄e idem ndida ifet emi ntoro Jehovah ke “otu mbon-esop.” (Ps. 26:12) Ẹyak nnyịn idiana kiet itoro Jehovah ke Mbono District “N̄kopuyo Abasi.”
[Ekebe ke page 5]
Mme N̄kpọ Editi Mbono District
◼ Mme Ini Ndutịm: Ke Friday, ndutịm editọn̄ọ ke usenubọk ke n̄kanika ebede 9 ke minit 20, ndien ke Saturday ye Sunday, editọn̄ọ ke n̄kanika usụkkiet usenubọk. Minit ifan̄ mbemiso ikpehe edinam ọtọn̄ọde, etieibuot okpokoro eyetie ke mbot utịn̄ikọ ke adan̄aemi ẹbrede ikwọ Obio Ubọn̄ ndida ntọn̄ọ. Kpukpru nnyịn ikpenyene ndidu ke itie nnyịn ini oro man ndutịm ekeme nditọn̄ọ ke ido nte eyede. Ke Friday, ẹdiberi ndutịm ke mbubịteyo ke ayakde minit ition ndimia n̄kanika ition; ke Saturday, ke ayakde minit 25 ndimia 5; ndien ke Sunday, ke ayakde minit 20 ndimia 4.
◼ Edibon N̄kpọisan̄: Mbọk ẹtiene ndausụn̄ mme adaidaha ke itie ubon n̄kpọisan̄ man eti ndutịm odu.
◼ Ẹdimụm Itie Nnịm: Ẹmekeme ndimụm n̄kpọitie nnịm nnọ mbon oro mbufo ẹsan̄ade n̄kpọisan̄ kiet m̀mê mbon oro ẹdụn̄de ufọk kiet.
◼ Mme Etịbe: Ndidiomi mbono district esịne ekese ubiatokụk. Nnyịn imekeme ndiwụt esịtekọm ke ndinọ etịbe imaesịt kaban̄a utom ofụri ererimbot ke Ufọkmbono Obio Ubọn̄ nnyịn m̀mê ke itiembono. Ẹkpenyene ndiwet “Watch Tower” ke babru okụk ban̄k ekededi oro ẹnọde nte etịbe ke itiembono.
◼ Udia Uwemeyo: Ẹsịn udọn̄ ẹnọ mbufo ẹte ẹda udia uwemeyo ẹdi utu ke ndikpọn̄ itiembono man ẹkedep udia ke ini nduọkodudu uwemeyo. Mbufo ẹmekeme ndidia udia uwemeyo ke efe mbono. Mbọk ẹkûdehe itie oro ẹtiede, ẹkûnyụn̄ ẹbon mme efọk n̄kpọ ke isọn̄. Ndidia n̄kpọ ke efe mbono ayanam kpukpru nnyịn inyene ebuana oro ọbọpde-bọp inyụn̄ idu ke ini ikpehe edinam uwemeyo ọtọn̄ọde. Edieke oyomde, ẹkeme ndikama ekpri n̄kpọ udọn̄ udia emi ẹkemede ndinịm ke idak n̄kpọitie. Owo inyịmeke ẹmen ikpọ n̄kpọ udọn̄ udia ye mme ọtọ-akpa ẹdụk efe mbono.
◼ N̄kpọ Umụmikọ: Owo ikpenyeneke ndida n̄kpọ umụmikọ ekededi mfak ke ikan̄ ilektrik m̀mê ke ndutịm ukwak utịn̄ikọ itiembono, ndien ẹkeme ndikama enye n̄kukụre ke usụn̄ oro mîdifịnake mbon efen.
◼ Edisio Ndise: Edieke osiode ndise, kûdomo emịnen̄-mịnen̄ ikan̄ ke ini edinam osụk akade iso. Ẹkûkpọn̄ efe mbono man ẹkesio ndise ke ini edinam osụk akade iso, ẹkûnyụn̄ ẹkot mme osio ndise ẹdụk ẹdi an̄wa mbono edisio ndise.—John 2:16.
◼ Mme Ukwak Ubọ Etop ye N̄kpri Urụk Ukopikọ: Ẹkpenyene ndinam mmọ ẹkûtịmede mbon efen.
◼ Mme Mbabuat N̄kpọntịbe: Edieke oyomde ẹsọsọp ẹnọ owo usọbọ ke itiembono, mbọk ẹneme ye adaidaha oro odude ekpere, emi edisọpde akasian Itieutom Akpa Usọbọ man owo oro odotde ekeme ndidụn̄ọde nte mfịna oro okponde nnyụn̄ nnọ un̄wam.
◼ Dọmitri: Ke ẹsịmde itiembono, ẹwụt mbun̄wụm spirit ke ini ẹbọde ufọkidụn̄. Ẹkûdụn̄ ke mme dọmitri edieke Itieutom Unọ Ufọkidụn̄ mîdọhọke mbufo ẹdụn̄ do. Ẹtem udia n̄kukụre ke mme ebiet oro ẹnọde unyịme. Ke ini edem, ẹma ẹkụt ndusụk owo ẹtemde n̄kpọ ke ini ikpehe edinam osụk akade iso. Emi edi unana ediwụt esịtekọm nnọ mme n̄kpọ eke spirit.—Luke 10:38-42.
◼ Mbufa N̄wed Oro Ẹsiode: Owo ikpenyeneke ndifefehe, m̀mê ndinụk owo ke ntak mbufa n̄wed oro ẹsiode. Ẹda ke udịm ke ido nte eyede. Ẹnam ndutịm man ẹkụt ẹte ke mme andidụk mbono ẹbọ mbufa n̄wed oro ẹsiode.—1 Cor. 14:40.