Ini Edi Emi Ndikwọrọ Ikọ!
1. Ntak emi idahaemi edide ini ndikwọrọ ikọ?
1 “Ẹbak Abasi ẹnyụn̄ ẹnọ enye ubọn̄.” Ke ndausụn̄ angel, ke ẹtan̄a etop emi ‘ẹnọ kpukpru idụt ye esien ye usem ye obio.’ Ntak-a? “Koro ini ikpe [Abasi] edisịm.” Mfịn, nnyịn idu uwem ke “ini ikpe” oro, emi edisịmde utịt ke nsobo editịm n̄kpọ emi. Edi akpan n̄kpọ mme owo ‘ndituak ibuot nnọ Enye emi akanamde enyọn̄ ye isọn̄ ye inyan̄ ye idịm mmọn̄.’ Idụhe utom efen oro ẹnamde mfịn emi edide akpan n̄kpọ m̀mê oyomde ẹsọsọp ẹnam nte editan̄a “nsinsi eti mbụk” emi. Ih, idahaemi edi ini ndikwọrọ ikọ!—Edi. 14:6, 7.
2. Didie ke mme asan̄autom Jehovah ẹwụt ke imọfiọk ini emi mmimọ idude uwem?
2 Ke isua duop emi ẹkebede, mme asan̄autom Jehovah ẹmebiat se ikperede ndisịm hour biliọn 12 ke utom edikwọrọ Obio Ubọn̄ ye edinam mbet. Ediwak mmọ ẹnam mme ukpụhọde ke uwem mmọ man ẹnyene ekese ini ndibuana ke idọk eke spirit emi. (Matt. 9:37, 38) Ke uwụtn̄kpọ, ke isua oko, ke ẹbaharede ukem ukem, mme asuanetop 850,000 ẹkenam utom usiakusụn̄ ke ọfiọn̄ kiet kiet. Emi oyom mme asiakusụn̄ ofụri ini ẹbiat hour 70 ke ẹbaharede ukem ukem kpukpru ọfiọn̄ ke utom ukwọrọikọ. Ibat hour oro ẹyomde mme asiakusụn̄ unọ un̄wam ẹnọ edi hour 50.
3. Mme ukpụhọde ewe ke oyom mme asuanetop ẹnam man ẹkeme ndisiak usụn̄?
3 Nte Ẹkpenamde Utom Usiakusụn̄: Mme asiakusụn̄ ẹdomo ndinam uwem mmọ ẹmem sia ẹfiọkde ke “ini emi osụhọde iniọn̄ke aba.” (1 Cor. 7:29, 31) Mmọ ẹsiyom mme usụn̄ nditehede ubọk ke okụk oro mmọ ẹbiatde man mmọ ẹkeme ndibiat esisịt ini ke utom idịbi udia. Ke uwụtn̄kpọ, ndusụk mmọ ẹwọrọ ẹkedụn̄ ke ufọkidụn̄ oro ekpride akan se mmọ ẹkesidụn̄de ke akpa. Mbon eken ẹduọn̄ọ mme inyene oro mînyeneke ufọn inọ mmọ. (Matt. 6:19-21) Ediwak ini, esiyom mmọ n̄ko ẹtre ndusụk ọkpọkpọ mbubehe mmọ. Ẹnam kpukpru emi man ẹnyene ekese ini ẹnọ utom ukwọrọikọ. (Eph. 5:15, 16) Ye ime, n̄waidem, akam, ye ibetedem ke Jehovah, ediwak mme asuanetop ẹnam eti ndutịm oro an̄wamde mmọ ndisiak usụn̄.
4. Nso idi mme n̄kpọ oro ẹkemede ndin̄wam fi ndibịne utịtmbuba eke edidụk utom usiakusụn̄?
4 Ndi afo emekeme ndisiak usụn̄? Ntak mûbụpke mme asiakusụn̄ oro ẹkụtde unen ke utom usiakusụn̄ se in̄wamde mmọ ndinam emi? San̄a ye mmọ ke an̄wautom, nyụn̄ tiene nyene idatesịt oro mmọ ẹnyenede. Kot mme ibuotikọ oro ẹban̄ade usiakusụn̄ ke mme n̄wed nnyịn. Nịm nti utịtmbuba oro ẹkemede ndin̄wam fi ndidụk utom usiakusụn̄. Edieke odude mme n̄kpọ oro ẹkpande fi ndinam utom usiakusụn̄ idahaemi, bọn̄ akam nọ Jehovah ban̄a mmọ nyụn̄ ben̄e enye an̄wam fi ndise mban̄a mmọ.—N̄ke 16:3.
5. Didie ke usiakusụn̄ an̄wam nnyịn ndifori usọ nnyịn ke utom ukwọrọikọ?
5 Mme Edidiọn̄ ye Idatesịt: Usiakusụn̄ anam nnyịn ifori usọ nnyịn ke nte idade Ikọ Abasi inam n̄kpọ, ndien emi ayanam idatesịt nnyịn etetịm okpon. N̄kaiferi kiet oro akanamde utom usiakusụn̄ ọkọdọhọ ete: “Enen̄ede edi edidiọn̄ ndikeme nditịm nsiak Ikọ akpanikọ Abasi. Ke ini anamde utom usiakusụn̄, afo ayada Bible anam n̄kpọ kpukpru ini. Ntre ke ini nnamde utom to ke enyịnusụn̄ sịm enyịnusụn̄, mmesikere mban̄a mme itie N̄wed Abasi oro ẹdidotde ye enyeneufọk kiet kiet.”—2 Tim. 2:15.
6. Nso ukpep ke usiakusụn̄ ọnọ?
6 Usiakusụn̄ n̄ko esikpep nnyịn ediwak usọ oro ẹkemede ndin̄wam nnyịn ke uwem. Enye ekeme ndin̄wam n̄kpri owo ndikpep nte ẹkpedade ini ẹnam n̄kpọ ye eti ibuot, nte ẹkpedade okụk mmọ ẹnam n̄kpọ ọniọn̄ ọniọn̄, ye nte ẹkpenyenede eti itie ebuana ye mme owo. Usiakusụn̄ esinam ediwak owo ẹnyene eti idaha eke spirit. (Eph. 4:13) Ke adianade do, mme asiakusụn̄ ẹsiwak ndikụt un̄wam ye edidiọn̄ Jehovah ke uwem mmọ.—Utom 11:21; Phil. 4:11-13.
7. Didie ke usiakusụn̄ an̄wam nnyịn ndisan̄a n̄kpere Jehovah?
7 Ekeme ndidi kiet ke otu n̄kponn̄kan edidiọn̄ oro inyenede ito usiakusụn̄ edi nte ke enye an̄wam nnyịn ndisan̄a n̄kpere Jehovah. Emi ekeme ndimụm nnyịn n̄kama ke mme ini idomo. Eyenete an̄wan kiet oro ọkọyọde ata n̄kpọsọn̄ ini ọkọdọhọ ete: “N̄kpet n̄kpet itie ebuana oro usiakusụn̄ anamde nnyene ye Jehovah ama an̄wam mi ndiyọ n̄kpọsọn̄ ini oro.” Enye ama adian do ete: “Enem mi etieti nte ke mmada uwem ini akwa owo mi nnam n̄kpọ Jehovah ke utom uyọhọ ini. Enye anam n̄keme ndinọ idem mi ke mme usụn̄ oro akananam mmen̄kereke ke mmekeme ndinọ.” (Utom 20:35) Nnyịn n̄ko ikpakam inyene ediwak edidiọn̄ nte nnyịn isịnde ofụri ukeme nnyịn ndinam ata akpan utom eke edikwọrọ ikọ emi.—N̄ke 10:22.