Mme Ekikere ke Nte Ẹkpenọde Nso Idi Uduak Uwem?—Didie ke Afo Ekeme Ndikụt Enye?
Ke ama ọkọkọm enyeneufọk, afo emekeme ndidọhọ:
“Uwem mfịn enen̄ede ọyọhọ ye mme mfịna ye edikpu. Ndi afo emekere ke ẹkeyom uwem etie ntem? [Bet ibọrọ.] Ediye uduot ekpri n̄wed emi owụt ke akpa uduak Abasi kaban̄a ubonowo ye isọn̄ oyosu. [Tịn̄ ban̄a ndise oro odude ke page 20-21. Ekem kot ikpehe ekikere 9, etịn̄de aban̄a Isaiah 14:24 ye 46:11.] Mma mfiak ndi, nyowụt fi itie oro Bible etịn̄de aban̄a Abasi ndinam isọn̄ afiak edi Paradise.” Nọ ediye uduot ekpri n̄wed oro nyụn̄ diomi ndifiak n̄ka.
Ke ini afiakde aka, afo emekeme ndidọhọ:
“Mma ntịn̄ ke akpa ini oro n̄kedide nte ke Abasi aduak ubonowo ndidu uwem ke nsinsi ke Paradise isọn̄. [Wụt ndise oro ke page 20-21.] Tịm fiọk ete ke Jesus, Peter, ye David ẹma ẹtịn̄ ẹban̄a Paradise.” Dọhọ enye emen ediye uduot ekpri n̄wed esie edi. Ekem kụbọde ka page 21-22, nyụn̄ neme ikpehe ekikere 10-13. Dọhọ ke iyama ndikpep Bible ye enye mîdịghe diomi ndineme kiet ke otu n̄kpri ibuotikọ oro ẹdude ke page 29-30 ke ini afiakde aka.
Asuanetop oro edide uyen ekeme ndidọhọ:
“Ediwak ubọkn̄ka mi ifiọkke nte ini iso editiede. Ndi afo emekere ke uwem eyenen̄ede ọfọn ye emana ini iso? [Bet ibọrọ.] Bible etịn̄ aban̄a nyayama ini iso oro odude ọnọ ubonowo. [Kụbọde ka ndise oro odude ke page 31, nyụn̄ kot se ẹwetde ẹdian ndise oro. Ekem kot 2 Peter 3:13.] Ediye uduot ekpri n̄wed emi obụk mme edidiọn̄ oro Abasi edidiọn̄de ubonowo. [Tịn̄ ban̄a n̄kpri ibuotikọ oro ẹwetde ke ndodobi ubọkn̄wed ke page 29-30 nyụn̄ nọ ediye uduot ekpri n̄wed oro.] Nyafiak ndi man ndineme ye afo mban̄a un̄wọn̄ọ Abasi nditre kpukpru ekọn̄.” Diomi ndifiak n̄ka.
Ke ini afiakde aka, afo emekeme ndidọhọ:
“Ke akpa ini oro n̄kedide, mma ntịn̄ ibio ibio mban̄a uduak Abasi ndinam isọn̄ afiak edi Paradise. [Fiak wụt ndise oro odude ke page 31.] Nyama ndikop se afo ekerede aban̄a un̄wọn̄ọ Abasi nditre kpukpru ekọn̄.” Dọhọ enye emen ediye uduot ekpri n̄wed esie edi. Ekem kot nyụn̄ neme ikpehe ekikere 3-6 ke page 29. Diomi ndineme ikpehe ekikere 7-8 ke afiakde aka.
Ke ini asan̄ade ye ekpri eyen, akamba owo ekeme ndisiak enyịn̄ mmọ mbiba ekem ọdọhọ ete:
“Edieke afo amade, ________ ayama ndiwụt fi ndise nnyụn̄ n̄kot itie kiet ke Bible nnọ fi. [Eyen oro owụt ndise, okot se ẹwetde ẹdian ndise oro ke page 31, onyụn̄ okot Ediyarade 21:4.] Ediye uduot ekpri n̄wed emi anam an̄wan̄a se Abasi edinamde aban̄a mme mfịna oro nnyịn isobode mfịn. [Tịn̄ ibio ibio ban̄a n̄kpri ibuotikọ oro ẹwetde ke ndodobi ubọkn̄wed ke page 29-30 nyụn̄ nọ ediye uduot ekpri n̄wed oro.] Ima ifiak idi, nyowụt fi se Bible etịn̄de aban̄a nte ẹdinamde kpukpru orụk udọn̄ọ ẹtre.”
Ke ini ẹfiakde ẹka, akamba owo oro ekeme ndidọhọ:
“Ke akpa ini oro ikenyenede nneme, mma ndọhọ ke n̄koyom ndiwụt fi se Bible etịn̄de aban̄a nte ẹdinamde kpukpru orụk udọn̄ọ ẹtre. Tịm fiọk se ẹwetde mi.” Dọhọ enye emen ediye uduot ekpri n̄wed esie edi. Ekem neme ikpehe ekikere 9-14 ke page 29. Dọhọ ke iyama ndikpep Bible ye enye mîdịghe diomi ndifiak n̄keneme ikpehe ekikere 15-17 ini efen.