Kop Inem Ndikpep Nso ke Bible Enen̄ede Ekpep?

¹ Ikpehe oro akaduaide owo idem ke Mbono District “N̄kopuyo Abasi” ekedi edisio n̄wed Nso ke Bible Enen̄ede Ekpep? Ke mîbịghike, nnyịn iyọtọn̄ọ ndinen̄ede nda enye nnam n̄kpọ ke an̄wautom, akpan akpan ke ini inịmde ukpepn̄kpọ Bible. Ke ntre, nnyịn ikpenyene ndinen̄ede mmehe ye obufa n̄wed emi. Nnyịn iyekeme ndinam emi koro idikpepde n̄wed emi ke Ukpepn̄kpọ N̄wed Esop ọtọn̄ọde ke urua April 17, 2006.

² Esenyịn Ukpepn̄kpọ N̄wed Esop oyodụri ntịn̄enyịn owụt mme mbụme emi ẹdude ke ntọn̄ọ ibuot kiet kiet. Ekem enye oyobụp mme mbụme emi ẹdude ke idak page ke ini enịmde ukpepn̄kpọ. Ẹyekot ẹnyụn̄ ẹneme mme akpan itie N̄wed Abasi, ndien ekebe oro “Se Bible Ekpepde” eyenyene ufọn ke ndida ndụn̄ọde ibuot oro sia ekebe emi ọdọn̄ọde mme ibọrọ emi N̄wed Abasi ọnọde ke mme mbụme oro ẹdude ke ntọn̄ọ ntọn̄ọ ibuot oro. Afo oyokop inem ndinọ ibọrọ sia n̄wed emi enemede n̄kpọ ke usụn̄ oro an̄wan̄ade, ememde, onyụn̄ edemerede owo udọn̄.

³ Se ẹwetde ẹdian ke n̄wed emi ọnọ ọyọhọ ntọt ke nsio nsio ibuotikọ. Nnyịn iyeneme se ẹwetde mi ye nditọ ukpepn̄kpọ Bible nnyịn ke ini mmọ ẹyomde mme ntọt efen efen ke ndusụk ibuot nneme. Ke ndusụk ini, ẹyeneme mme n̄kpọ ẹto se ẹwetde ẹdian ke Ukpepn̄kpọ N̄wed Esop. Eyenete oro okotde ikpehe ke ukpepn̄kpọ n̄wed esop enyene ndikot kpukpru se ẹwetde ẹdian ke ibuotikọ oro, ndien edieke awakde, ekeme ndibahade enye nsịn ke ikpehe ke ikpehe. Owo inọhọ mbụme ke se ẹwetde ẹdian. Edi esenyịn ukpepn̄kpọ n̄wed ekeme ndinam otuowo ẹnọ ibọrọ ke ini enye obụpde mme mbụme oro ẹsiode mme akpan n̄kpọ ẹwụt.

⁴ Ẹdisọsọp ẹkpep n̄wed Bible Ekpep ke Ukpepn̄kpọ N̄wed Esop. Edi idịghe ntre ke nnyịn idinam ke ini ikpepde mbon efen n̄wed emi, akpan akpan edieke mmọ mînyeneke ifiọk Bible. (Utom 26:28, 29) Ke ini inịmde ukpepn̄kpọ Bible, oyoyom ineme mme itie N̄wed Abasi ọyọhọ ọyọhọ, inam mme uwụtn̄kpọ an̄wan̄a, ye ntre ntre eken. Ntem, nam edi utịtmbuba fo ndidụk mbono esop kpukpru urua nnyụn̄ mbuana ọyọhọ ọyọhọ ke ini nnyịn ikpepde n̄wed oro Nso ke Bible Enen̄ede Ekpep?