Kpebe Akwa Andikpep ke Ini Adade N̄wed Bible Ekpep Anam N̄kpọ
1. Didie ke Jesus ekesinọ ukpep?
1 Jesus, kpa Akwa Andikpep, ekesitịn̄ ikọ kpukpru ini ke mmemmem usụn̄ oro an̄wan̄ade owo. Ndusụk ini, enye ama esibụp mme andikpan̄ utọn̄ nnọ enye se idide ekikere mmọ. (Matt. 17:24-27) Enye ama esidụri ntịn̄enyịn owụt Ikọ Abasi. (Matt. 26:31; Mark 7:6) Enye ikan̄wan̄ake kpukpru ikọ ifụk mme mbet esie ini kiet, sia enye ama ọfiọk ke mmọ ẹkenyene ndika iso mbọ ukpep. (John 16:12) N̄ko, Jesus ama esiyom ndifiọk m̀mê se imọ ikpepde an̄wan̄a mme mbet, m̀mê mmọ ẹnịm se ikpepde mmọ ke akpanikọ. (Matt. 13:51) Ẹtịm n̄wed Bible Ekpep man an̄wam nnyịn inọ ukpep ke ukem usụn̄ emi.
2. Didie ke nnyịn ikeme ndida mme mbụme oro ẹdude ke ntọn̄ọ ibuot kiet kiet nnam n̄kpọ?
2 Mme Mbụme Oro Ẹdude ke Ntọn̄ọ Ibuot: Ke ini ọtọn̄ọde obufa ibuot, ọkpọfọn odụri ntịn̄enyịn owụt mme mbụme oro ẹdude ke ntọn̄ọ ibuot oro. Bụp mme mbụme emi man edemede udọn̄ eyen ukpepn̄kpọ, edi kûyom ibọrọ. Mîdịghe emekeme ndidọhọ enye etịn̄ n̄kpọ ibio ibio aban̄a mme mbụme oro. Ufọn idụhe nditịn̄ uwak ikọ mban̄a ibọrọ oro enye ọnọde, m̀mê ndinen̄ede kpukpru ndudue oro enye anamde. Afo emekeme ndikọm enye ke ibọrọ esie, onyụn̄ ọtọn̄ọ ukpepn̄kpọ inikiet. Ibọrọ oro enye ọnọde ke mme mbụme oro ẹdude ke ntọn̄ọ ibuot ẹyen̄wam fi ọfiọk akpan ikpehe oro ediyomde enen̄ede odori nsọn̄uyo.
3. Didie ke ikeme ndinam ukpepn̄kpọ emem?
3 Mme Itie N̄wed Abasi: Ukpepn̄kpọ oro ekpenyene ndikọn̄ọ ke N̄wed Abasi. (Heb. 4:12) Nte ededi, iyomke ẹkot kpukpru itie N̄wed Abasi oro ẹsiakde ẹsịn. Kot nyụn̄ dori nsọn̄uyo ke mme itie N̄wed Abasi oro ẹsọn̄ọde se nnyịn inịmde ke akpanikọ. Ẹkeme ndidi idiyomke ẹkot mme itie N̄wed Abasi oro ẹnọde nnyan mbụk. N̄wed Bible Ekpep etịn̄ ikọ ke in̄wan̄-in̄wan̄ usụn̄. Nam ukpepn̄kpọ oro emem. Wụk ntịn̄enyịn ke mme akpan n̄kpọ, fep ntụhọ editịn̄ uwak ikọ mban̄a kpukpru n̄kpọ m̀mê ndinọ mbụk oro ọwọrọde ọkpọn̄ ukpepn̄kpọ nte mîdotke.
4. Nso idibiere m̀mê oyoyom ineme ntọt oro odude ke se ẹwetde ẹdian ke ini ukpepn̄kpọ?
4 Se Ẹwetde Ẹdian: Se ẹwetde ẹdian enyene ibuotikọ 14 emi ẹnọde ntọt efen efen ẹban̄a se ẹnemede ke mme akpan ibuot nneme. Edieke amade, emekeme ndineme mme ibuotikọ emi ke ini ekpepde owo n̄kpọ. Ke ndusụk ibuot nneme, emekeme ndidọhọ eyen ukpepn̄kpọ Bible fo okot ntọt oro odude ke se ẹwetde ẹdian ke ini idemesie, akpan akpan edieke edide ukpepn̄kpọ oro an̄wan̄a enye, enye onyụn̄ enịmde se enye ekpepde ke akpanikọ. Ke uwụtn̄kpọ, edieke eyen ukpepn̄kpọ enịmde ke Jesus edi Messiah, ekeme ndidi ufọn ididụhe ndifiak nneme ibuotikọ oro “Jesus Christ—Messiah Emi Ẹken̄wọn̄ọde” ye enye ke ini ekpepde ibuot 4, “Anie Edi Jesus Christ?” Ke ndusụk idaha, ọfọn ada ini ke ini ekpepde n̄kpọ eneme se isịnede ke se ẹwetde ẹdian m̀mê eneme ndusụk n̄kpọ ke esịt.
5. Edieke imekde ndineme se isịnede ke se ẹwetde ẹdian, didie ke nnyịn ikpanam emi?
5 Edieke emekde ndineme se isịnede ke se ẹwetde ẹdian, afo emekeme ndibem iso ntịm mme mbụme, onyụn̄ eneme ikpehe ekikere kiet kiet ye eyen ukpepn̄kpọ ke mbụme ye ibọrọ, ukem nte akpanamde ke akpan ibuotikọ. Mîdịghe emekeme ndida minit ifan̄ odụn̄ọde ntọt oro odude ye enye ke ini ukpepn̄kpọ, etiene se idide udọn̄ esie. Emi ayanam fi ọfiọk m̀mê se enye okokotde ke idemesie ama an̄wan̄a enye.
6. Didie ke ẹkpeda ekebe ndụn̄ọde oro odude ke utịt ibuot kiet kiet ẹnam n̄kpọ?
6 Ekebe Ndụn̄ọde: Ekebe oro odude ke utịt ibuot kiet kiet ọdọn̄ọ ntọt oro ọbọrọde mme mbụme oro ẹdude ke ntọn̄ọ ibuot oro. Afo emekeme ndida mme ntọt emi ndụn̄ọde mme akpan n̄kpọ oro ẹdude ke ibuot oro. Ndusụk asuanetop ẹkụt ke ọfọn ẹsikot se ẹwetde ke ekebe emi ke ini ẹkpepde eyen ukpepn̄kpọ n̄kpọ, ndinyụn̄ n̄kot mme itie N̄wed Abasi oro ẹsiakde ẹsịn. Ekem mmọ ẹyedọhọ eyen ukpepn̄kpọ etịn̄ ibio ibio nte mme itie N̄wed Abasi oro ẹsọn̄ọde se ẹtịn̄de ke ekebe oro. Emi ayan̄wam andikpep ọfiọk m̀mê mme akpan n̄kpọ oro ẹnemede ke ibuotikọ oro ye mme itie N̄wed Abasi oro ẹdade ẹsọn̄ọ ekikere emi an̄wan̄a eyen ukpepn̄kpọ, n̄ko m̀mê enye enyịme ye mmọ. Emi n̄ko esitịm eyen ukpepn̄kpọ idem ndida Bible nnọ mbon efen ukpep.
7. Didie ke ikeme ndida n̄wed Bible Ekpep nnam n̄kpọ ke utom ukwọrọikọ nnyịn?
7 Mfọnn̄kan usụn̄ ndikpep mme owo n̄kpọ nnyụn̄ nnam mmọ ẹdi mbet edi ndikpebe usụn̄ oro Jesus ekesinọde ukpep. (Matt. 28:19, 20) N̄wed Bible Ekpep ayan̄wam nnyịn inam oro. Da enye kpep mbon en̄wen akpanikọ ke mmemmem usụn̄ oro an̄wan̄ade onyụn̄ edemerede udọn̄.