Ẹtan̄a Nti Ido Jehovah
1. Nso inụk nnyịn nditan̄a nti ido Jehovah?
1 “O Jehovah, ubom, ye odudu, ye ubọn̄, ye akakan, ye uten̄e, ẹdi okuommọ: koro kpukpru n̄kpọ ke enyọn̄ ye ke isọn̄ ẹmenyene fi.” (1 Chron. 29:11) Didie ke ima ye esịtekọm oro inyenede inọ Jehovah ẹtụk nnyịn? Mmọ ẹnụk nnyịn ‘nditan̄a nti ido enye emi okokotde nnyịn osio ke ekịm esịn ke utịbe un̄wana esie.’ (1 Pet. 2:9) Nnyịn ikemeke nditre nditịn̄ nnọ mbon efen mban̄a akwa Abasi nnyịn! Nnyịn iyenyene n̄wọrọnda ifet nditan̄a nti ido Jehovah ke ọfiọn̄ March, April, ye May.
2. San̄asan̄a ubịnikọt ewe ke ẹdiomi ndida ntọt Editi, ndien mmanie ẹkeme nditiene mbuana?
2 San̄asan̄a Ubịnikọt Nditọt Editi: Ke Monday, April 2, nnyịn iyeti nti ido Jehovah ke ndinịm Udia Mbubịteyo Ọbọn̄. Ẹyesuan san̄asan̄a n̄wedikot kaban̄a akpan edinam emi ke ofụri ererimbot ọtọn̄ọde ke March 17 esịm April 2. Ẹsịn udọn̄ ẹnọ kpukpru owo ndibuana ọyọhọ ọyọhọ. Emi edidi ata eti ini ọnọ mbufa owo nditọn̄ọ nditan̄a eti mbụk edieke mmọ ẹdotde. Edieke afo enyenede nditọ ukpepn̄kpọ Bible m̀mê nditọ oro ẹkemede ndidot, neme emi nọ mbiowo.
3. Nso ke nnyịn ikpetịn̄ ke ini inọde mme owo ikot ẹdidụk Editi?
3 Ubịnikọt emi editie nte enye oro ẹkenamde ndida ntọt Mbono District “Edinyan̄a Emekpere!” Ẹyenọ mme esop n̄wedikot emi ẹwakde ekem man asuanetop kiet kiet ekeme ndinyene idem 50, asiakusụn̄ kiet kiet onyụn̄ ekeme ndinyene idem 150. Nam nneme fo edi ibio ibio, iso-ọfọn ọdọhọde ete: “Imọnọ fi ikot ndibuana ke akpan edinam eke isua ke isua emi edide mi. Iyokop inemesịt etieti ndikụt fi. N̄wedikot emi etịn̄ aban̄a akpan edinam emi.” Nte ededi, edieke enyeneufọk enyenede mbụme, da ini bọrọ mmọ. Ibuotikọ oro aban̄ade Udia Mbubịteyo Ọbọn̄, oro odude ke se ẹwetde ẹdian, emi ọtọn̄ọde ke page 206 ke n̄wed Bible Ekpep ekeme ndin̄wam ke afan̄ emi. Ke mme utịturua, nnyịn iyadian mbufa magazine ye san̄asan̄a n̄wedikot emi inọ. Tịm fiọk owo oro enyenede udọn̄, nyụn̄ nam ndutịm ndifiak n̄ka.
4. Didie ke ẹdisuan san̄asan̄a n̄wedikot Editi?
4 Ke ebiet ekededi oro ẹkemede, ẹkpenyene ndinọ enyeneufọk kiet kiet n̄wedikot emi ke ubọk. Ke ntre, nyene n̄wetnnịm n̄kpọ kaban̄a mme ufọk oro mme owo mîdụhe, nyụn̄ nam ndutịm ndifiak n̄ka ini efen. Mme esop oro ẹsụk ẹnyenede ediwak n̄wedikot ẹkeme ndiyak mmọ nnịm ke mme ufọk oro mme owo mîdụhe ke akpatre urua mbemiso Editi, edi owo ikpenyeneke ndinịm mbemiso ini emi. Kụt n̄ko ete ke imọnọ mbon oro afo esifiakde ekese, nditọ ukpepn̄kpọ Bible, iman, nsan̄autom, mbọhọidụn̄, ye mme ọdiọn̄ọ fo n̄wedikot.
5. Ntak ikpọtọn̄ọde idahaemi inam ndutịm man inam usiakusụn̄ unọ un̄wam-a?
5 Usiakusụn̄ Unọ Un̄wam: Ndi emekeme ndinen̄ede ntan̄a nti ido Jehovah ebe ke ndinam utom usiakusụn̄ unọ un̄wam ke ọfiọn̄ March, April, ye May? Oyoyom anam mme ukpụhọde ke ndutịm fo eke usen ke usen man ekeme ndinam emi. (Eph. 5:15-17) Nịm ke akpanikọ ke ukeme oro afo esịnde ndinam ekese ke utom Jehovah ayada idatesịt ye edidiọn̄ Jehovah ẹdi. (N̄ke 10:22) Sia ini Editi asan̄ade ekpere, oyom itọn̄ọ idahaemi inam ndutịm.—N̄ke 21:5.
6. Nso ke ikeme ndikpep nto ifiọkutom eyenete an̄wan emi edide isua 90, oro akanamde utom usiakusụn̄ unọ un̄wam isua oko?
6 Eyenete an̄wan kiet oro edide isua 90 ama anam utom usiakusụn̄ unọ un̄wam isua oko. Enye ọkọdọhọ ete: “Okposụkedi mmade utom in̄wan̄, n̄konyụn̄ nyomde nditọn̄ọ utọ n̄kpọ, mma mfiọk ke ana nnịm mme ebeiso n̄kpọ ke itie mmọ. Man nnịm n̄kpọ Obio Ubọn̄ akpa ke uwem, mma mbiere ndinam utom usiakusụn̄ unọ un̄wam ke March.” Ndi enye ama okụt unen ke ndikanam emi? Enye ọdọhọ ete, “Mma nnen̄ede nsịk n̄kpere esop, ndien emi ama anam mi nsan̄a n̄kpere Jehovah.” Ndi nnyịn imekeme ndidụn̄ọde mme n̄kpọ oro inịmde nte ebeiso n̄kpọ, inyụn̄ inam ukem ukpụhọde emi?
7. Ndi ọsọn̄ ndinam utom usiakusụn̄ unọ un̄wam?
7 Ndisịm hour 50 oro ẹyomde ẹto mme asiakusụn̄ unọ un̄wam isọn̄ke nte afo ekerede. Bọn̄ akam, nyụn̄ kere ban̄a mme edinam fo eke usen ke usen, nam ndutịm, nyụn̄ wet mme edinam emi ke n̄wed usenọfiọn̄ oro esidade ewet mme edinam ukara Abasi. Afo ọmọfiọk mme ọkpọkpọ idaha fo etịm ọfọn. Edieke mûtịmke ukop nsọn̄idem, mûnyụn̄ unyeneke odudu, afo emekeme nditiene mbuana ke an̄wautom, anamde esisịt ibat hour ke usen kiet kiet. Edieke esinamde utom idịbi udia uyọhọ ini, mîdịghe edieke edide eyen ufọkn̄wed, emekeme ndinam utom usiakusụn̄ unọ un̄wam ebe ke ndibuana ke utom ukwọrọikọ ke mbubịteyo ye ke mme utịturua.
8. Nso ikan̄wam ebe ye n̄wan kiet ẹkeme ndinam utom usiakusụn̄ unọ un̄wam?
8 Ediwak owo ẹsinam utom usiakusụn̄ unọ un̄wam nte ubon. Ke mme isua oro ẹkebede, ebe ye n̄wan kiet ẹma ẹmen̄e ndisịn n̄wed utom usiakusụn̄ unọ un̄wam koro mmọ ẹkekerede ke idaha mmimọ idiyakke mmimọ inam. Nso ke mmọ ẹkenam? “Nnyịn ima ibọn̄ akam ọtọkiet inọ Jehovah ite enye an̄wam nnyịn inam utom emi, koro utom emi ọkọdọn̄de nnyịn ndinam.” Eti ndutịm oro mmọ ẹkenamde ama an̄wam mmọ ẹkụt unen. Mmọ ẹkedọhọ ẹte: “Ima inen̄ede ikop inemesịt. Ima ibọ ekese edidiọn̄ n̄ko. Nnyịn idọhọ fi odomo ese. Nnyịn ima inam, afo n̄ko emekeme ndinam.”
9. Nso ke akpanam ke ini ukpepn̄kpọ ubon man etịm idem ọnọ mme san̄asan̄a ọfiọn̄ emi?
9 Ntak mûsioho ini unịm ke ini ukpepn̄kpọ ubon ndida nneme nte kpukpru owo ke ubon ẹkemede ndinam n̄kọri ke utom ukwọrọikọ mmọ ke mme ọfiọn̄ oro ẹdide mi-e? Idem ọkpọkọm idịghe kpukpru owo ke ubon fo ẹkeme ndinam usiakusụn̄ unọ un̄wam, owo kiet ekeme ndinam edieke mbon eken ẹnọde enye ibetedem ye un̄wam. Mîdịghe, ẹmekeme ndinịm utịtmbuba nte ubon ndibiat ekese ini ke an̄wautom ke mme san̄asan̄a ọfiọn̄ emi.
10. Ntak emi nnyịn ikpetịn̄de inọ mbon en̄wen ke ọdọn̄ nnyịn ndinam utom usiakusụn̄ unọ un̄wam ke ini Editi emi-e?
10 Ẹn̄wam Kiet Eken: Mbon efen ẹsikpebe nte nnyịn isịnde ifịk inam n̄kpọ. Dọhọ mbon efen ke ikpama ndinam utom usiakusụn̄ unọ un̄wam. Emi ekeme ndisịn udọn̄ nnọ mmọ nditiene nnam. Ke adianade do, mbon oro ẹma ẹkenanam usiakusụn̄ ke ini edem ẹkeme ndinọ fi nti ekikere oro ẹdin̄wamde fi etịm mbubehe fo onyụn̄ anam ndutịm ke usụn̄ oro edikemede ndisịm ibat hour oro ẹyomde. (N̄ke 15:22) Edieke ekemede ndinam utom usiakusụn̄ unọ un̄wam, ntak mûsịnke udọn̄ unọ asuanetop efen, iso-ọfọn enye oro mme idaha esie edide ukem ye okwo nditiene mbuana ke utom idatesịt emi-e?
11. Didie ke mbiowo ẹkeme ndisịn udọn̄ nnọ mbon efen ẹnam utom usiakusụn̄ unọ un̄wam ke mme ọfiọn̄ emi ẹdide mi?
11 Ediwak mbiowo ẹnam ndutịm nditiene mbuana ke akpan utom emi. (Heb. 13:7) Ke akpanikọ, emi esisịn udọn̄ ọnọ esop! Mbiowo n̄ko ẹsisịn udọn̄ ẹnọ mbon en̄wen ẹnam utom usiakusụn̄ unọ un̄wam ke ini mmọ ẹnemede nneme ye mmọ. Ekpri ikọ nsịnudọn̄ ye nti ekikere ẹkeme ndisịn udọn̄ nnọ mbon en̄wen ẹdụk usiakusụn̄ unọ un̄wam. Esenyịn utom ekpenyene ndidiomi mme mbono an̄wautom efen efen man kpukpru owo ẹkeme nditiene mbuana ke unọ ikọ ntiense otu, idem ke ẹnyọn̄de ufọkn̄wed m̀mê utom ẹdi. Ẹkpenyene nditọt mme ndutịm oro ẹnamde kpukpru ini. N̄ko ana enye okụt ete ke kpukpru owo ẹnyene efakutom ye n̄wed oro ẹkemde.
12. Nso ke afo ekeme ndinam edieke mûkemeke ndinam utom usiakusụn̄ unọ un̄wam?
12 Idem ọkpọkọm mme idaha fo iyakke etiene anam usiakusụn̄ unọ un̄wam, afo emekeme ndisịn udọn̄ nnọ mbon oro ẹnamde, onyụn̄ esịn mmọ ke akam. (N̄ke 25:11; Col. 4:12) Emekeme ndinam ndutịm ndiwọrọ an̄wautom ye mmọ ke ndusụk usen ke urua, mîdịghe odu ebịghi akan nte esikam odude.
13. Nso utịtmbuba ke ẹnịm ke Nigeria, ndien didie ke esop mbufo ekeme ndin̄wam ẹsịm enye?
13 Ẹyom Mme Asiakusụn̄ Unọ Un̄wam 30,000 ke April: Ke n̄kọk itieutom Nigeria, ẹma ẹsịm n̄wakn̄kan ibat mme asiakusụn̄ unọ un̄wam 23,002 oro akanam ẹsịmde ke April 2003. Ke ntre, se ẹyomde ke April emi edi mme asiakusụn̄ unọ un̄wam 30,000. Imekeme ndisịm ibat emi edieke asuanetop kiet ke otu kpukpru mme asuanetop usụkkiet ke esop ke ẹbaharede ukem ukem, anamde usiakusụn̄ unọ un̄wam. Nte ededi, ndusụk esop ẹyenyene ediwak owo oro ifet mmọ ayakde ẹnam usiakusụn̄ unọ un̄wam. Isisọn̄ke ediwak esop ndisịm utọ utịtmbuba emi. Kere ban̄a idatesịt oro esop mbufo edinyenede ye n̄kọri oro edidude ke utom ukwọrọikọ ke efakutom mbufo!
14. Ntak emi April edide ata eti ọfiọn̄ ndinam usiakusụn̄ unọ un̄wam-a?
14 Ntak emi April edide ata eti ọfiọn̄ ndinam usiakusụn̄ unọ un̄wam-a? Ẹdinịm Editi ke ntọn̄ọ ntọn̄ọ ọfiọn̄ oro, ndien emi eyeberede eti ifet ọnọ nnyịn ndifiak n̄ka mbịne mbon oro ẹkedụkde. Nnyịn idinọ Enyọn̄-Ukpeme ye Awake! ye uduak edinịm n̄wed Bible Ekpep ke ini ifiakde ika, inyụn̄ itọn̄ọ ukpepn̄kpọ Bible. Ke ntre, ndinam usiakusụn̄ unọ un̄wam ke April eyeberede ifet ọnọ nnyịn nditọn̄ọ ediwak ukpepn̄kpọ Bible. Ke adianade do, ọfiọn̄ April enyene Sunday ition ye ini nduọkodudu, emi ayanam edi mmemmem n̄kpọ ọnọ mme anamutom ye nditọ ufọkn̄wed nditiene mbuana.
15. Ntak emi nnyịn ikpanamde n̄kpọ usọp usọp nte ini Editi emi asan̄ade ekpere?
15 Ini Editi kiet kiet oro ebede anam nnyịn itetịm isan̄a ikpere utịt editịm n̄kpọ emi. Ini oro osụhọde nnyịn ndida ntịn̄ nnọ mme owo mban̄a akwa Abasi nnyịn iniọn̄ke aba. (1 Cor. 7:29) Edieke iyakde ini Editi emi ebe nnyịn, iyataba ọsọn̄urua ifet oro enye ebererede ọnọ nnyịn nditoro Ete nnyịn eke heaven ke nsinsi. Nnyịn ikpakam inam ndutịm idahaemi nditan̄a nti ido Jehovah ke March, April, ye May!
[Ekebe ke page 4]
Nte Imekeme Ndinyene Mme Asiakusụn̄ Unọ Un̄wam 30,000 ke April?
◼ Dụn̄ọde mme n̄kpọ oro enịmde nte ebeiso n̄kpọ
◼ Neme utịtmbuba ọtọkiet nte ubon
◼ Nam mbon en̄wen ẹfiọk ndutịm fo