Nte Emesibụp Aban̄a Mbon Efen?

Edieke afo enịmde ukpepn̄kpọ Bible ke ndondo emi, ntak mûbụpke eyen ukpepn̄kpọ oro m̀mê mme ufan, iman, m̀mê ọdiọn̄ọ esie ekededi ẹkpema ndifiọk se Bible ekpepde? Ẹsiwak ndinọ ediwak enyịn̄. Edieke eyen ukpepn̄kpọ oro enyịmede, afo emekeme ndisiak enyịn̄ esie ke ini akade ekese mme owo oro onyụn̄ ọdọhọde ke iyom ndinịm ukpepn̄kpọ Bible ye mmọ. Afo emekeme ndidọhọ, “[Enyịn̄ eyen ukpepn̄kpọ] enen̄ede ama ndikpep Bible ndien enye ekere ke afo n̄ko akpama ndibọ ufọn nto ndutịm ukpepn̄kpọ Bible mfọn nnyịn.” Ekem da n̄wed Bible Ekpep nam ibio ibio wụt nte ẹnịmde ukpepn̄kpọ oro.

Edieke afo enyenede eyen ukpepn̄kpọ oro enen̄erede anam n̄kọri, afo emekeme ndisịn udọn̄ nnọ enye nditịn̄ ndutịm ukpepn̄kpọ emi nnọ mme ufan ye mbonubon oro ẹkemede ndinyene udọn̄. Enye ekeme ndidọhọ mmọ ẹditiene ẹbuana ke ukpepn̄kpọ imọ. Mîdịghe edieke mmọ mîkemeke nditiene mbuana, enye ekeme ndidiomi man afo osobo ye mmọ onyụn̄ owụt mmọ nte ẹsinịmde ukpepn̄kpọ. Ndinam emi eyesịn udọn̄ ọnọ eyen ukpepn̄kpọ oro nditọn̄ọ mbuana ifiọk Bible esie ye mbon en̄wen.

Mbon oro afo esikade ekese kpukpru ini ẹkeme n̄ko ndisiak enyịn̄ mbon en̄wen nnọ fi idem ọkpọkọm mmọ ke idemmọ imaha esikpep Bible ye mmimọ kpukpru ini. Ke ini ọnọde mmọ n̄wed Bible Ekpep, afo emekeme ndikam mbụp, “Nte afo ọmọfiọk owo en̄wen ekededi oro akpamade ndibọ n̄wed emi?”

Ke ikerede iban̄a nte ini oro nnyịn idude uwem mi edide usọp usọp, oyom nnyịn ida kpukpru usụn̄ oro ẹberede in̄wam mme owo ẹkop ẹnyụn̄ ẹnyịme eti mbụk. Nte emesibụp aban̄a mbon efen?