Usụn̄ Ition Ndinyene Ukpepn̄kpọ Bible
1. Edieke ọsọn̄de ndikụt owo oro idikpepde Bible ke efakutom nnyịn, nso ke ikpanam, ndien ntak-a?
1 Ndi esisọn̄ fi ndikụt owo oro edikpepde Bible? Ka iso yom. Jehovah esidiọn̄ mbon oro mîsikpaha mba ndinam uduak esie. (Gal. 6:9) Imenyene ekikere ition oro ẹdin̄wamde fi mi.
2. Didie ke ikeme ndibụp owo nnennen nnennen m̀mê enye akpama isinịm ukpepn̄kpọ Bible ye enye?
2 Bụp Owo Nnennen Nnennen: Ediwak owo ẹfiọk ke nnyịn isinọ mme owo Enyọn̄-Ukpeme ye Awake!, edi ekeme ndidi mmọ ifiọkke ke imesinịm ukpepn̄kpọ Bible ye mme owo. Domo nditịn̄ nnọ mmọ nnennen nnennen ke ini anamde utom ukwọrọikọ ke ufọk ke ufọk. Emekeme n̄ko ndibụp mbon oro ẹnyenede udọn̄ m̀mê mmọ ẹkpema ukpepn̄kpọ Bible. Edieke mmọ mîmaha, afo emekeme ndisụk nnọ mmọ mme n̄wed nnyịn onyụn̄ anam mmọ ẹka iso ẹnyene udọn̄. Eyenete kiet ama esida mme magazine ọsọk n̄wan ye ebe kiet ke ediwak isua. Usen kiet, ke ama ọkọnọ mmọ mbufa magazine ama, oyom ndinyọn̄, enye eti ke akpana ibụp mmọ m̀mê mmọ ẹkpema imọ isidi idikpep mmọ Bible. Enye ama okop n̄kpaidem ndikop nte mmọ ẹnyịmede. Idahaemi, mmọ mbiba ẹna baptism.
3. Ndi ọfọn ndikere ke mbon oro ẹdụkde mbono esop ye nnyịn ẹnyene owo oro esikpepde mmọ Bible? Nam an̄wan̄a.
3 Mme Andidụk Mbono Esop: Kûkere ke mbon oro ẹnyenede udọn̄ emi ẹsidụkde mbono esop ẹnyene owo emi ẹsikpepde mmọ Bible. Eyenete eren kiet ọdọhọ ete: “Ekpere ndidi kpukpru mbon oro n̄kpepde Bible mfịn, n̄kọtọn̄ọ ke ndibụp mmọ ke mbono esop m̀mê mmọ ẹkpema nsidi ndikpep mmọ Bible.” Eyenete an̄wan kiet ama aka ebịne mma kiet oro esikopde bụt, emi nditọ iban esie ẹma ẹkenyụn̄ ẹna baptism. Mma oro ama esidụk mbono esop ke n̄kpọ nte isua 15, ekesinyụn̄ ama ndidi Ufọkmbono Obio Ubọn̄ ndondo oro mbono esop ọtọn̄ọde onyụn̄ ọkpọn̄ ndondo oro ẹsuanade. Mma oro ama enyịme ukpepn̄kpọ Bible ndien ekem ana baptism. Eyenete an̄wan oro ewet ete: “Se mmemmaha edi nte ke mma mbet isua 15 mbemiso mbụpde m̀mê enye akpama ndikpep Bible!”
4. Didie ke ikeme ndinyene ukpepn̄kpọ Bible ke ndibụp mme owo?
4 Bụp M̀mê Odu Owo Oro Akpamade Ẹkpep Imọ N̄kpọ: Eyenete an̄wan kiet esitiene mbon en̄wen aka ukpepn̄kpọ Bible mmọ. Ke utịt ukpepn̄kpọ enye eyeben̄e ada ukpepn̄kpọ ete ayak imọ ibụp eyen ukpepn̄kpọ oro m̀mê enye ọfiọk mbon en̄wen oro ẹkpemade ẹdikpep mmọ n̄kpọ. Ke ini ọnọde owo oro afo esifiakde aka ebịne n̄wed Bible Ekpep, emekeme ndibụp m̀mê enye ọfiọk owo en̄wen oro akpamade ndikot. Ndusụk ini, ekeme ndinyene ntak emi anamde mme asuanetop ye mme asiakusụn̄ inịmke ukpepn̄kpọ ye owo oro mmọ ẹsobode ke efakutom. Ntre nam mbon en̄wen ẹfiọk ke afo akpama ndinyene ukpepn̄kpọ Bible.
5. Ntak emi ikpobụpde mbon oro mînịmke ke akpanikọ, emi nsan̄a ndọ mmọ ẹdude ke esop nnyịn, m̀mê mmọ ẹkpema ndikpep Bible?
5 Ebe M̀mê N̄wan Emi Mînịmke ke Akpanikọ: Ndi odu mme asuanetop ke esop mbufo oro mme ebe m̀mê iban mmọ mînịmke ke akpanikọ? Ndusụk mbon oro mînịmke ke akpanikọ isimaha ndineme mban̄a Bible ye nsan̄a ndọ mmọ edi ẹnyịme owo en̄wen ekpep mmọ Bible. Ọkpọfọn ẹbem iso ẹneme ye ebe m̀mê n̄wan oro edide Christian man ẹfiọk mfọnn̄kan usụn̄ oro ẹkpetọn̄ọde ukpepn̄kpọ ye nsan̄a ndọ oro mînịmke ke akpanikọ.
6. Didie ke akam edi akpan n̄kpọ ke ini iyomde owo emi ikpekpepde n̄kpọ?
6 Akam: Nịm ke akam ekeme ndin̄wam. (Jas. 5:16) Jehovah ọn̄wọn̄ọ ke imọ iyakpan̄ utọn̄ ke eben̄e nnyịn edieke iben̄ede nte ekemde ye uduak esie. (1 John 5:14) Eyenete eren kiet emi mîkesinyeneke ini ama ọtọn̄ọ ndibọn̄ akam nyom ukpepn̄kpọ Bible. N̄wan esie ama ekere m̀mê enye eyenyene ini ndinọ eyen ukpepn̄kpọ ntịn̄enyịn akpan akpan edieke eyen ukpepn̄kpọ oro ẹnyenede ediwak mfịna. Ntre ke ini enye ọbọn̄de akam man ebe esie ekeme ndinyene ukpepn̄kpọ Bible, enye ama asian Jehovah mfịna emi. Ke n̄kpọ nte urua iba ebede, Abasi ama eyere akam mmọ. Asiakusụn̄ kiet ke esop mmọ ama okụt eren kiet emi okoyomde ndikpep Bible onyụn̄ ayak ukpepn̄kpọ emi ọnọ eyenete oro. N̄wan esie ewet ete: “Ndọhọ owo ekededi emi ekerede ke imọ idinyeneke ini ndinịm ukpepn̄kpọ Bible nte: Ke ini ọbọn̄de akam, tịn̄ se idide akpan mfịna fo, kûnyụn̄ ukpa mba ndibọn̄ akam mban̄a mfịna emi. N̄kekereke ke ikpenyene utọ idatesịt oro inyenede mi.” Edieke esịnde ifịk, afo n̄ko emekeme ndinyene ukpepn̄kpọ Bible onyụn̄ okop idatesịt ndin̄wam owo ebe odụk “inuaotop emi adade esịm uwem.”—Matt. 7:13, 14.