Edibọp Ufọkmbono Obio Ubọn̄—Akpan Ikpehe Edisana Utom
1. Nso ke ẹnam ke utom ubọp Ufọkmbono Obio Ubọn̄, edi nso ke osụk oyom ẹnam?
1 Ke isua ition oro ẹkebede, ẹma ẹbọp Ufọkmbono Obio Ubọn̄ 1,205, ke efakutom n̄kọk itieutom Nigeria. Nnyịn imenen̄ede iwụt esịtekọm ke ọkpọsọn̄ utom oro Mme Otu Ubọp Ufọkmbono Obio Ubọn̄ ye kpukpru mbon oro ẹken̄wamde mmọ ẹkenamde. Okposụkedi ẹnamde utọ akamba utom emi, ediwak n̄kpọ ẹsụk ẹdedu ndinam ke mme Ufọkmbono Obio Ubọn̄. Didie ke kpukpru nnyịn ikeme ndin̄wam ke akpan ikpehe edisana utom emi inamde inọ Jehovah mi?—Edi. 7:15.
2. Didie ke nnyịn ikeme ndin̄wam ke utom edibọp Ufọkmbono Obio Ubọn̄?
2 Nyịme: Edieke afo edide asuanetop isua 17 m̀mê akande oro emi enyenede eti idaha ke esop, nnyịn imoyom ọnọ idemfo unyịme unyịme ndinam utom ye Mme Otu Ubọp Ufọkmbono Obio Ubọn̄ ke ini mmọ ẹnamde utom ke Ufọkmbono Obio Ubọn̄ mbufo m̀mê eke mbọhọ esop mbufo. Okposụkedi owo mîyomke ẹsịn n̄wed eben̄e, sụk mbon oro Kọmiti Utom Esop ẹnọde unyịme ke ẹkeme ndikot ẹdinam utom ke Ufọkmbono Obio Ubọn̄ oro ekperede eke mbufo. (Ps. 110:3) Ana kpukpru mme anamutom unyịmesịt ẹnam utom unyịme unyịme ẹnyụn̄ ẹnyene edu edidianakiet. (Ps. 133:1) Idem ọkpọkọm unyeneke ifiọk ubọpn̄kpọ, emekeme nditịp ekese nsịn ke ndinam utom emi okụt unen. Emekeme n̄ko ndibọ ukpep oro edinamde ẹda fi ẹnam ediwak utom ke ini iso.
3. Ke mme usụn̄ ewe n̄ko ke nnyịn ikeme ndiwụt ke iman̄wam ke ndutịm emi?
3 Edieke mûkemeke ndinọ idemfo, afo emekeme ndin̄wam ke ndisịn udọn̄ nnọ mbon oro ẹkemede nditiene mbuana ke ndutịm emi. Afo emekeme ndin̄wam nnam se ẹnọde mmọ ke esop ke ini mmọ ẹkade ndibọp Ufọkmbono Obio Ubọn̄ ke ebiet efen. Edieke mbiowo ẹbakde-bak ẹnam ndutịm, mmọ ẹkeme ndikụt nte ke ẹnen̄ede ẹse ẹban̄a esop ke ini ndusụk owo ẹnamde utom Ufọkmbono Obio Ubọn̄. Nte eyịghe mîdụhe, Jehovah esinem esịt ke ini idianade ọtọkiet inam utom Obio Ubọn̄ aka iso.—Heb. 13:16.
4. Didie ke nnyịn ikeme ndisịn udọn̄ nnọ mbon oro ẹbuanade ke utom ubọp Ufọkmbono Obio Ubọn̄?
4 Nọ Nsịnudọn̄: Oyom ekese ini ye ọkpọsọn̄ utom man ẹbọp mme itie utuakibuot. Ndien nte an̄wan̄ade, mbon oro ẹsin̄wamde ofụri ini ke utom ubọpn̄kpọ nte mme asan̄autom ubọp Ufọkmbono Obio Ubọn̄ ẹyekpọn̄ esop mmọ ndusụk ini. Nnyịn ikpakam isọp nditoro nnyụn̄ nsịn udọn̄ nnọ mme anamutom unyịmesịt emi ẹsiyakde idemmọ ẹnọ man ẹse ẹban̄a “akpan mbubehe emi.”—Utom 6:3; Rome 14:19.
5. Didie ke mme anamutom unyịmesịt ẹkeme ndida ukem ukem?
5 Da Ukem Ukem: Ndikwọrọ Obio Ubọn̄ Abasi edi akpan utom ukara Abasi oro anade inam. (Mark 13:10) Ye emi ke ekikere, Mme Otu Ubọp Ufọkmbono Obio Ubọn̄ ẹsidomo ndinam ndutịm utom man mme anamutom unyịmesịt ẹdikpọn̄ mme edinam esop mmọ nte mîdotke. Kpasụk ntre, mme anamutom unyịmesịt ẹsidomo ndida ukem ukem ke ndise mban̄a ediwak ifetutom oro mmọ ẹnyenede. Ke uwụtn̄kpọ, mmọ iyakke utom ubọpn̄kpọ anam mmọ ẹkûdụk n̄kpri ye ikpọ mbono. Kpasụk ntre, edieke edidi esenyịn circuit ọduọde ke ini oro esop ẹbọpde Ufọkmbono Obio Ubọn̄, mme asuanetop ẹyedomo ndibuana ke an̄wautom ẹnyụn̄ ẹbuana ke utom ubọpn̄kpọ.
6. Nso isitịbe ke ini kpukpru owo ke esop ẹdianade kiet ẹnam utuakibuot akpanikọ aka iso?
6 Apostle Paul ọkọdọhọ ke mme andibuana ke esop ẹsinam utom ọtọkiet ke edidianakiet man ‘ẹnam idem ọkọri man ẹnam enye ọsọn̄ọ owụhọ ke ima.’ (Eph. 4:16) Ima oro imade Jehovah ye utuakibuot akpanikọ oyonụk nnyịn ndidiana kiet n̄kwọrọ eti mbụk nnyụn̄ n̄n̄wam ke edibọp Ufọkmbono Obio Ubọn̄.