Nte Ẹkpetịmde Ntọn̄ọikọ Oro Ẹdidade Ẹnọ Magazine
1. Ntak ọfọnde nditịm idem ọkpọkpọ nnọ se ikpetịn̄de mbemiso inọde magazine utu ke ndimụm uwụtn̄kpọ oro ẹnọde ke Utom Obio Ubọn̄ Nnyịn nsịn ke ibuot?
1 Afo emekeme ndibụp ete: ‘Sia mme ntọn̄ọikọ oro ikpetịn̄de ẹdude ke nsiondi Utom Obio Ubọn̄ Nnyịn kiet kiet, ntak emi ikpetịmde se iditịn̄de mbemiso inọde magazine?’ Okposụkedi ediwak owo ẹkụtde ke mme ntọn̄ọikọ oro ẹnọde ẹnyene ufọn, osụk oyoyom inam ọkpọkpọ ntịmidem. Ekeme ndidi ntọn̄ọikọ oro ọfọnde ke efakutom kiet idifọnke ke efakutom efen. Ke ntre, nnyịn ikpekereke ke oyom nnyịn ikot se ẹkpetịn̄de ẹban̄a mme magazine nnennen nte ẹwetde ke n̄wed mbemiso inọde magazine. Idem ọkpọkọm nnyịn iyom ndida mme uwụtn̄kpọ oro ẹnọde nnyene nneme, mfọnn̄kan n̄kpọ edi ndisịn mme uwụtn̄kpọ emi ke ikọ idem nnyịn.
2. Nso ibuana ke ndibiere m̀mê ibuotikọ ewe ke edineme aban̄a?
2 Mek Ibuotikọ kiet: Ke ama okokot magazine, mek ibuotikọ oro enen̄ede ama emi odotde ye efakutom mbufo. Enyeneufọk n̄ko oyoyom ndikot magazine emi ke ini enye okụtde nte afo etịn̄de ikọ ye nsọn̄uyo onyụn̄ owụtde ke imama se okokotde ke ibuotikọ oro. Okposụkedi edinemede ibuotikọ oro ẹnen̄erede ẹma ke efakutom n̄kann̄kụk mbufo, nen̄ede mehe ye mme ibuotikọ eken ke magazine oro n̄ko. Emi ayanam fi okpụhọde nneme fo edieke okụtde owo oro enyenede udọn̄ ke ibuotikọ efen ke n̄wed oro.
3. Ewe ntọn̄ọikọ oro esinyenede eti utịp ke afo esida ọtọn̄ọ nneme?
3 Bụp Mbụme: N̄kpọ efen edi ndinen̄ede ntịm ntọn̄ọikọ fo. Ntọn̄ọikọ fo edi akpan n̄kpọ. Ọkpọfọn ndibụp enyeneufọk mbụme oro anamde enye ekere n̄kpọ man edemede enye udọn̄ ndikot ibuotikọ oro afo emekde ndida nnyene nneme. Mme mbụme ẹdade ẹfiọk ekikere owo ẹsinen̄ede ọfọn. Fep ndibụp enyeneufọk mme mbụme oro edinamde enye bụt ndibọrọ m̀mê oro edinamde enye ọtọn̄ọ mfan̄a.
4. Nso idi mme ufọn edikot itie N̄wed Abasi nnọ enyeneufọk ke ini idaha esie ayakde?
4 Kot Itie N̄wed Abasi: Ke akpatre, mek itie N̄wed Abasi oro edikotde ọnọ enyeneufọk edieke idaha esie ayakde, iso-ọfọn enye oro aban̄ade ibuotikọ oro oyomde ndineme. Ndikot itie N̄wed Abasi ayanam enyeneufọk ọfiọk ke etop nnyịn oto Ikọ Abasi. (1 Thess. 2:13) Itie N̄wed Abasi oro ọyọnọ enye ikọ ntiense n̄ko idem ọkpọkọm enye ibọhọ mme magazine. Ndusụk owo ẹsidemede udọn̄ enyeneufọk ke ndikot itie N̄wed Abasi mbemiso ẹbụpde mbụme. Afo emekeme ndidọhọ ntem mbemiso okotde itie Bible: “N̄kpama ndifiọk se afo ekerede aban̄a se ẹtịn̄de ke ufan̄ikọ Bible emi.” Ekem dụri ntịn̄enyịn owo oro wụt mme n̄kpọ ke magazine oro, nyụn̄ tịn̄ ikọ ifan̄ ndika iso ndemede udọn̄ esie mbemiso ọnọde magazine oro.
5. Nso akpan ndausụn̄ ke afo ekpenyene ke ekikere ke ini etịmde idem ọnọ se ekpetịn̄de mbemiso ọnọde magazine?
5 Owo inịmke ibet iban̄a se ẹkpetịn̄de ke ini ẹnọde mme magazine. Nte ido edide, enen̄ede ọfọn ndinam nneme nnyịn edi mmemmem ye ibio ibio. Da usụn̄ nneme oro afo esimade ye enye oro esikamade eti utịp. Wụk ntịn̄enyịn ke akakan ufọn emi mme magazine emi ẹnyenede, nyụn̄ wụt ke amama mmọ. Edieke etịmde idem nte ọfọnde, afo eyenen̄ede okụt unen ke ini ọnọde mbon oro “ẹnyenede eti esịt ndinyene nsinsi uwem” Enyọn̄-Ukpeme ye Awake!—Utom 13:48.