Nso Idi Mfọnn̄kan Usụn̄ Usọbọidem?
Dr. Michael Rose emi edide esenyịn ibọkusọbọ ye ekịmibọk ibikpai ọkọdọhọ ete: “Ke akpanikọ, owo udọn̄ọ ekededi emi ọbọde ibọkusọbọ oro owo mîsịnke iyịp ọbọ mfọnn̄kan ibọkusọbọ oro akanam odude.” Nso usụn̄ edinam ye ibọkusọbọ efen oro ekemede ndida utu ke edikịm iyịp nsịn ke idem ibuana ke “ibọkusọbọ oro owo mîsịnke iyịp”? Oyom enyene ibọrọ mbụme emi man ekeme ndinam nti ubiere kaban̄a usọbọ ye usiakidem. Se vidio oro No Blood—Medicine Meets the Challenge. Ke oro ebede, da mme mbụme emi ẹtienede mi domo ifiọk fo se.—Tịm fiọk: Sia vidio emi esịnede n̄kpri itie oro ẹsiakde owo idem, mme ete ye eka ẹkpenyene ndiwụt mbufiọk ke ini ẹsede vidio emi ye n̄kpri nditọ mmọ.
(1) Nso idi akpan ntak emi anamde Mme Ntiense Jehovah ẹsịn edikịm iyịp nsịn ke idem? (2) Ke se iban̄ade usụn̄ usọbọidem, nso ke Mme Ntiense Jehovah ẹyom? (3) Nso akpan unen ke mbon udọn̄ọ ẹnyene? (4) Ntak emi owụtde eti ibuot ndimek ibọkusọbọ efen oro ẹnọde utu ke edikịm iyịp nsịn ke idem? (5) Ke ini ekese iyịp ọwọrọde owo ke idem, ewe n̄kpọ iba ke mbiausọbọ ẹkpenam usọp usọp? (6) Nso idi akpan n̄kpọ inan̄ oro ẹkpenamde ẹban̄a ibọkusọbọ efen oro ẹnọde utu ke edikịm iyịp nsịn ke idem? (7) Didie ke mbiausọbọ ẹkeme (a) ndisụhọde uwọrọiyịp, (b) ndibiọn̄ọ ndatndat nsen iyịp ndiwọrọ, (c) ndin̄wam idem owo osion̄o iyịp edi, (d) ndifiak mbọ iyịp oro ọwọrọde? (8) Tịn̄ nte (a) ẹsibuakde mmọn̄ ibọk ke iyịp, ye nte (b) ẹsidụhọrede nsen iyịp. (9) Nso ke afo okpoyom ẹtịn̄ ẹnọ fi ẹban̄a usọbọ efen ekededi oro ẹnọde utu ke edikịm iyịp nsịn ke idem? (10) Nte ẹkeme ndinam akpan ye awak-n̄kukọhọ usiakidem ye unana edikịm iyịp nsịn ke idem? (11) Nso eti ndutịm ke n̄ka mme ọfiọk ibọkusọbọ ẹnam idahaemi?
Ndinyịme ndusụk usọbọ oro ẹwụtde ke vidio emi edi ọkpọkpọ ubiere nte ekemde ye ubieresịt owo kiet kiet oro Bible ọnọde ukpep. Nte afo emebiere m̀mê ewe ibọkusọbọ efen utu ke edikịm iyịp nsịn ke idem ke imọ ye nditọ imọ idinyịme ndibọ? Ekpenyene nditịm nsian mbonubon oro mîdịghe Mme Ntiense mban̄a mme ubiere fo ye mme ntak emi afo anamde mme ubiere emi.—Se “Mme Mbụme Ẹtode mme Andikot” ke nsiondi Enyọn̄-Ukpeme eke June 15, 2004, ye October 15, 2000.