Editat N̄kọk Itieutom Nigeria

1. Tịn̄ ibio ibio nte ẹketọn̄ọde Bethel Igieduma.

¹ Ke 1984, ẹma ẹtọn̄ọ ndibọp ọkọ Bethel Igieduma. Isua itiokiet ke ukperedem, ke January 20, 1990, ẹma ẹyak obufa Bethel emi ẹnọ. Oro ekedi inem inem edinam oro nnyịn mîdifreke. Enye ekedi akpan edinam ke mbụk ukara Abasi ke Nigeria! Ẹkebọp ufọkidụn̄ ke Bethel ẹnọ owo 400, ndien ufọkidụn̄ emi okpon ke se ibede utịm ikaba akan akani Bethel Lagos ke Shomolu.

2. Tọn̄ọ ẹketọn̄ọ ndibọp Bethel Igieduma, mmanie ẹsidi ẹdise enye?

² Tọn̄ọ ẹketọn̄ọ ndibọp Bethel Igieduma, ata ediwak nditọete ẹsidi ẹdise enye. Ediwak mbufo ẹmekụt ndiye ufọk oro ẹbọpde. Ndusụk mbon ererimbot, ẹsịnede ikpọ owo ukara, ẹsidi ẹdise ediye Bethel emi. Nnyịn imesidara kpukpru owo.

3. Nso n̄kọri idu ke utom nnyịn toto ke 1990?

³ Utom ke Nigeria amaka iso ndikọri toto ke 1990. Ndinyene nti ufọkutom ye n̄kpọutom ke Bethel ẹn̄wam nnyịn inam ata nti utom ke ufọn mbufo ẹnyụn̄ ẹtịp n̄ko ẹsịn ke n̄kọri oro inyenede, ndien emi anam nnyịn iyom nditat n̄kọk itieutom nnyịn. Ke ini ẹkeyakde Bethel ẹnọ ke January 1990, n̄wakn̄kan ibat mme asuanetop ke idụt nnyịn ekedi 139,150. Nso kaban̄a mfịn? N̄wakn̄kan ibat mme asuanetop ọdọk ekesịm 286,455, ndien emi awak utịm ikaba akan se ikenyenede ini oro. Man ẹkeme ndise mban̄a n̄kọri emi, ama oyom ẹkot mme owo efen efen ẹdi Bethel. Idahaemi owo 570 ẹnam utom ke Bethel, ndien ke ini ẹnịmde Ufọkn̄wed Mme Esenyịn oro Ẹsan̄ade-San̄a, imesiwak ibe owo 600. Mbọk ẹti ẹte ke ẹkebọp Bethel ẹnọ owo 400 kpọt. Emi anam ufan̄ enen̄ede afaha ke Bethel.

4, 5. Nso n̄kọri ke ẹnam ke edibọp mme itie utuakibuot ke Nigeria toto ke 1990?

⁴ Ndutịm ubọpn̄kpọ ke Nigeria iketreke ke ini ẹkekụrede obufa n̄kọk itieutom emi ke 1990. Esisịt ini ke oro ebede, ima itọn̄ọ ndibọp mbufa ikpọ Ufọk Mbono ke nsio nsio ebiet ke idụt nnyịn. Emi esịne enye oro ikọbọpde ke Akure, Daluwon, Enugu, Ibadan, Igwuruta Ali, Mgboko Umuoria, Ota, Ubogo, ye Uli.

⁵ Ekem ẹma ẹtọn̄ọ ndibọp ndiye Ufọkmbono Obio Ubọn̄ oro mîwakke n̄kukọhọ, edi ẹdotde nte mme itie utuakibuot. Nditọete oro ẹdude ke mme esop oro ẹyomde ndibọp Ufọkmbono Obio Ubọn̄ ye otu mme ọbọpufọk 30 oro ẹsan̄ade-san̄a ẹsinen̄ede ẹsịn idem ke utom emi. Etisịm utịt ọfiọn̄ August 2006, ẹma ẹkụre mbufa Ufọkmbono Obio Ubọn̄ 1,574 ẹnyụn̄ ẹyak mmọ ẹnọ! Mme esop oro ẹkesisopde idem ke n̄kani ntan̄wan̄ ufọk m̀mê ke mme Ufọkmbono Obio Ubọn̄ oro owo mîbọpke ima ẹnyene ndiye ebiet oro ẹdotde ndida ntuak ibuot nnọ Jehovah idahaemi ke obio mmọ. Mme esop emi ẹsinen̄ede ẹdara ẹnyụn̄ ẹkọm Jehovah ẹban̄a emi. Utom emi ke akaka iso, ndien ẹsibọp se ibede mbufa Ufọkmbono Obio Ubọn̄ 300 kpukpru isua. Edi nnyịn isụk inyenyene n̄kpọ nte Ufọkmbono Obio Ubọn̄ 900 efen efen ndibọp.

6. Nso obufa ndutịm ke ẹnam ẹban̄a edibọp Ufọk Mbono idahaemi?

⁶ Ke nditịm ntịn̄, ke ufan̄ isua ita emi ẹbede, utom edibọp mme Ufọkmbono Obio Ubọn̄ ke aka iso ke ukem ini oro ẹbọpde mbufa Ufọk Mbono ke nsio nsio ebiet ke idụt nnyịn. Ufọk Mbono oro mîwakke n̄kukọhọ ke ẹbọp idahaemi. Ẹma ẹkụre Ufọk Mbono Agbor, Awi (ekperede Calabar), ye Benin City ke obufa ndutịm ubọpufọk emi. Ke adan̄aemi otu mme ọbọpufọk kiet ẹsụk ẹbọpde mbufa Ufọk Mbono, otu en̄wen ke ẹdomo ndikụre Ufọk Mbono oro owo mîkokụreke kan̄a. Isua oko ẹma ẹkụre mme Ufọk Mbono ke Akure, Igwuruta Ali, ye Ilesa.

7. (a) Tịn̄ nte Ufọkmbono Obio Ubọn̄ oro ẹsidade ẹnịm mbono n̄ko etiede? (b) Ufọkmbono Obio Ubọn̄ oro ẹsidade ẹnịm mbono ifan̄ ke ẹbọp ẹkụre ke Nigeria, ndien mmọ ẹdu ke m̀mọ̀n̄?

⁷ Nnyịn n̄ko ke ibọp mme Ufọkmbono Obio Ubọn̄ oro ẹsidade ẹnịm mbono n̄ko ke nsio nsio ebiet ke idụt nnyịn. Ẹkụre mbon oro ẹdude ke Akaeze Ukwu, Amassoma, Bori, Ikot Akan, Ilorin, Jos, Kabba, Kaduna, Katsina Ala, Makurdi, Numan, Obehie Asa, ye Zaria. Mmọ ẹdi ikpọ Ufọkmbono Obio Ubọn̄ emi ẹsịnde ata akamba usụn̄ ke edem, emi ẹkemede ndibererede man esịtufọk ọdọn̄ọ kiet ye efe emi n̄kpọ nte owo 600 esịm owo 1,100 ẹkemede ndidụk n̄kpri mbono ye mbono district oro owo mîtịmke iwak. Ẹbọp mmọ ke ediwak ebiet oro mme asuanetop mîwakke ikem ndinyene Ufọk Mbono ke idụt nnyịn. Mme esop ẹsidụk mbono esop ke mme Ufọkmbono Obio Ubọn̄ emi kpukpru ini, ndien ama ekem ini mbono, ẹbererede akamba usụn̄ oro man okpon ekem se ẹdade ẹnịm mbono.

8. Didie ke nnyịn owo kiet kiet ikeme ndin̄wam ke akwa utom ubọpn̄kpọ oro ẹnamde ke Nigeria?

⁸ Nte mbufo ẹkụtde mi, ke ẹnam akamba utom ubọpn̄kpọ oro akpade ata ediwak okụk ke idụt nnyịn. Nnyịn imowụt esịtekọm iban̄a etịbe oro mbufo ẹsisịnde ke ekebe etịbe oro ẹwetde “World​wide Work” man akwa utom ubọpn̄kpọ emi aka iso. Ẹsinọ un̄wam ẹto esenidụt ẹdi, edi sia mbon en̄wen ke nsio nsio ikpehe isọn̄ ẹyomde utọ un̄wam oro n̄ko, se ẹsinọde ẹdi isiwakke ikem. Ntre, oyom nnyịn inam se ikemede man utom emi aka iso.

9. (a) Ewe n̄kpọ inemesịt ke ẹtịn̄ mi? (b) Nso ke ẹdibem iso ẹbọp ke utom editat n̄kọk itieutom Nigeria, ndien ntak ẹdibọpde enye? (c) Obufa ọfis Lagos odu ke m̀mọ̀n̄, ndien enye editie didie?

⁹ Kan̄a ke emi, enyene n̄kpọ inemesịt oro etịbede! Nnyịn imenem esịt nditọt mbufo ke Otu Ukara enyịme ẹbọp mme ufọk Bethel efen efen man ẹkeme ndise mban̄a akwa n̄kọri oro odude ke Nigeria. Ẹtọtọn̄ọ ndibọp mme ufọk emi. Ke ntọn̄ọ ntọn̄ọ isua oko, ẹma ẹtọn̄ọ ndibọp obufa itieutom ke Lagos. Emi edi koro akani itieutom nnyịn ke Lagos ikponke ikem se ẹdade ẹnam utom oro anade inam do. Jehovah ama anam nnyịn ikụt eti isọn̄ oro okponde ekem ufọk oro iyomde ndibọp. Enye odu ke Mobolaji John​son Avenue, ekpere Ufọkutom Ukara Lagos State, oro ekperede usụn̄ Ibadan emi mîyomke usụn̄ ikpọn̄ ebiet emi toll​gate ekesidude. Se ẹbọpde ẹyesịne ufọk ubonn̄kpọ ye ọfis ye ufọkidụn̄ oro edikemde owo 48. Ufọkidụn̄ oro edi enyọn̄ ita. Ẹyak utom emi ẹnọ usiakifia ubọpn̄kpọ oro odude mi ke Nigeria. Utom emi ke aka iso, ndien ẹdori enyịn ke ẹyekụre enye ke August 1, 2007. Afo emekeme ndikụt nte mme ufọk oro ẹtiede idahaemi ke mme ndise obufa itieutom Lagos oro ẹdọn̄de mi. Ẹwụt n̄ko nte itieutom oro editiede ke ẹma ẹkebọp ẹma. Mbọk ẹkûyat esịt nte nnyịn mîkotke mbufo ẹdise nte ẹsụk ẹbọpde ufọk emi, ntak edi koro idịghe nnyịn ikama utom emi.

10. (a) Nso ke ẹdibọp ẹdian ke n̄kọk itieutom Igieduma? (b) Mmanie ẹdise enyịn ke utom oro, ndien ntak emi afo ekemede ndidọhọ ke emi edidi ata akamba utom?

¹⁰ Mbemiso ẹkụrede utom ke Lagos, imenịm ke ẹyetọn̄ọ nditat n̄kọk itieutom Igieduma. Nso ke ẹdibọp ke Igieduma? Ufọkidụn̄ ye ọfis emi ẹdikponde ke se ibede utịm ikaba ẹkan mbon oro ẹdude idahaemi. Ẹnam ekese ndutịm ẹnọ utom oro. Ndusụk ke otu mme Asan̄autom Ofụri Ererimbot ẹdi man ẹdise enyịn ke utom mbiba emi, ndien ibịghike mbon en̄wen ẹyedi. Ẹdibem iso ẹbọp mme ufọkidụn̄ oro ẹdikemde owo 750 ke ẹbatde mbon oro ẹdụn̄de ke n̄kani ufọkidụn̄ ẹdian, ndien nte ini akade ẹyebọp efen efen man ekem owo 1,000. Emi edidi ata akamba utom!

11. (a) Nso ye nso ke ẹdinam ke utom emi? (b) Mmanie ẹdinam utom oro?

¹¹ Akpa n̄kpọ oro ẹdibọpde edidi obufa ufọk ukwak unọ ikan̄, ẹyenyụn̄ ẹdep mbufa ikpọ ukwak unọ ikan̄ emi ẹsọn̄de odudu utịm ikaba ẹkan se nnyịn inyenede idahaemi. Ẹyebọp mbufa ufọkidụn̄ inan̄, ọkọrọ ye obufa ufọkutom esede n̄kpọ aban̄a mbon Bethel, esịnede itie uyetọfọn̄, itie utem udia, ye ubetudia emi edikemde owo 1,000. Ẹdibọp mme ọfis efen efen ẹdian ke akani emi, idem se ikponde ibe akani emi utịm ikaba. Ekem ẹyediọn̄ ufọkutom oro esede n̄kpọ aban̄a mbon Bethel ẹnyụn̄ ẹnam enye akabade edi obufa ufọkutom udiọn̄ n̄kpọ. Mme ufọk efen oro ẹdidiọn̄de ẹdidi mme ọfis ufọk umịn̄n̄wed ye mme ọfis eken, ọkọrọ ye itieutom ubọp Ufọkmbono Obio Ubọn̄, Ufọkn̄wed Unọ Mme Asan̄autom Ukpep, ye itie unọ usọbọ. Ẹyesiak mbufa usụn̄. Ẹyenen̄ede ẹdiọn̄ an̄wa eye n̄ko. Ata akamba utom ana ebet nnyịn oro-⁠o! Nnyịn ifiọkke kan̄a m̀mê nnyịn idibọp ndusụk n̄kpọ emi inyụn̄ iyak ata akamba ubak utom inọ usiakifia ẹnam, m̀mê idikpekpe usiakifia ubọpn̄kpọ nte inamde ye eke Lagos. Nte ededi, ekọmurua n̄kpọ oro iyomde ­ndibọp eyenen̄ede okpon. Nnyịn iyoyom nditọete ẹnọ idem unyịme unyịme ke utom emi, ndien iyanam mbufo ẹdiọn̄ọ ini oro idiyomde owo.

12, 13. (a) Ke ikerede iban̄a ediwak ikpọ n̄kpọ oro ibọpde ke ubọk, nso ke ẹyom nnyịn owo kiet kiet inam? (b) Ntak emi nnyịn ikpetịpde n̄kpọ ke ofụri esịt isịn ke ekebe oro ẹwetde “Worldwide Work”?

¹² Mmanie ẹdikpe okụk oro ẹbiatde ẹbọp kpukpru emi, esịnede obufa itieutom Lagos, editat Bethel Igieduma, edibọp mme Ufọkmbono Obio Ubọn̄, mme Ufọk Mbono, ye mme Ufọkmbono Obio Ubọn̄ oro ẹsidade ẹnịm mbono n̄ko? Nnyịn imeben̄e kpukpru mbufo nditọete iren ye iban ke Nigeria ite ẹn̄wam ke akamba utom emi ebe ke ndida ofụri esịt ntịp n̄kpọ nsịn ke ekebe etịbe oro ẹwetde “Worldwide Work.” Nte mbufo ẹfiọkde, urua n̄kpọ ubọpufọk ke ọdọk kpukpru isua. Utọ akamba utom oro nnyịn ikamade mi ke ubọk oyoyom ata ediwak okụk, ntre imenen̄ede iyom un̄wam mbufo.

¹³ Ẹma ẹnen̄ede ẹnọ un̄wam ke akpa ini oro ikọbọpde Bethel Igieduma. Nso ke nnyịn ikeme ndinam isan̄ emi? Idida etịbe imaesịt ibọp kpukpru se iyomde ndibọp. Ntre ẹyak nnyịn ida ofụri esịt nnyịn itịp okụk man ẹda ẹnam utom emi. Nditịp okụk ye mme n̄kpọ obụkidem eken edi ubak n̄kpọ oro ẹyomde ke edisana utuakibuot toto ke eset. Emi n̄ko esinọ mme owo idatesịt. (1 Chron. 29:9; 2 Cor. 9:​7-11) Ẹtịm ẹfiọk ke ẹyeda kpukpru se ẹtịpde ẹnam n̄kpọ ke nnennen usụn̄. Ẹdadara kpukpru etịbe.​—⁠Mark 12:​41-44; 14:​3-8.

14. Nso ke ẹn̄wọn̄ọ ẹnọ nnyịn?

¹⁴ Nte nnyịn mi ke Nigeria iyekeme ndinam se inade nnyịn mi ke iso? Utom Jehovah ke edi. Idịghe utom owo ndomokiet. Enye ọn̄wọn̄ọ ọnọ nnyịn ke Psalm 127:1 ete: “Ke mîbọhọke Jehovah ọbọp ufọk, mmọ eke ẹbọpde ẹkpa utom ikpîkpu ke esịt.” Sia Jehovah ọn̄wọn̄ọde ke iyan̄wam, nnyịn imenịm ke iyọbọp obufa ufọkutom n̄kọk itieutom emi ima.

[Ndise ke page 4]

Nte obufa itieutom Lagos editiede

[Ndise ke page 5]

Ufọkidụn̄

[Ndise ke page 6]

Ufọk Ubonn̄kpọ ye mme ọfis