Nte Emekeme Ndidụk ‘Akwa Usụn̄ Oro Ẹbererede Ẹnọ Fi Ndinam Utom’?
1. Ewe “akwa usụn̄” ke ẹberede ẹnọ nnyịn “ndinam utom”?
1 Ke ini ‘ẹkeberede akwa usụn̄’ ẹnọ apostle Paul “ndinam utom,” enye ama esịn ifịk anam utom Obio Ubọn̄ okposụkedi ediwak owo ẹkebiọn̄ọde enye. (1 Cor. 16:9) Mfịn, n̄kpọ nte mme asuanetop Obio Ubọn̄ 642,000 ẹmedụk akwa usụn̄ oro eberede ọnọ nnyịn ẹnyụn̄ ẹkabade ẹdi mme asiakusụn̄ ofụri ini.
2. Ntak ọfọnde ndidụn̄ọde idaha nnyịn ke ini ke ini-e?
2 Mme Idaha Ẹsikpụhọde: Okposụkedi nnyịn mîkemeke ndinam se ikpamade ndinam idahaemi, mme idaha ẹsikpụhọde. Mmọdo, ọfọn nnyịn ndidụn̄ọde idaha nnyịn ke ini ke ini utu ke nditetie mbet nnennen ini. (Eccl. 11:4) Nte afo edi uyen oro oyomde ndikụre akamba Ufọkn̄wed? Ndi edi ete m̀mê eka oro nditọ ẹyomde nditọn̄ọ n̄wed? Nte ini oro oyomde ndikpọn̄ utom ekpere? Mme utọ ukpụhọde emi ẹkeme ndinam enyene ini odụk utom usiakusụn̄ ofụri ini. Eyenete an̄wan oro idem mîkọsọn̄ke ama ebiere ndidụk utom usiakusụn̄ ke ini enye ekedide isua 89. Ntak-a? Sia enye mîkakaha ufọkibọk ke se ibede isua kiet, enye ama ekere ke idem imọ ayayak inam utom usiakusụn̄.
3. Nso ukpụhọde ke ndusụk owo ẹnam man ẹdụk utom usiakusụn̄ ofụri ini?
3 Odu ini oro Paul okoyomde ndika n̄kese nditọete esie ke Corinth. Edi, enye ama okpụhọde ndutịm esie ke ntak eti mbụk. Ediwak mbon oro ẹnamde utom usiakusụn̄ ofụri ini mfịn ẹma ẹnam ediwak ukpụhọde man ẹdụk utom usiakusụn̄. Ndusụk owo ẹdu ata mmemmem uwem oro anamde mmọ ẹkeme ndinam utom ibio ini man ẹse ẹban̄a n̄kpri n̄kpọ ifan̄ ke uwem. Mmọ ẹma utom usiakusụn̄. (1 Tim. 6:6-8) Ndusụk mme ọdọ ndọ ẹnam mme ukpụhọde man ẹkeme ndida okụk ọfiọn̄ owo kiet ndu uwem, ke ntre anamde n̄wan ekeme ndinam utom usiakusụn̄.
4. Nso ke ikpanam edieke nnyịn mîfiọkke m̀mê imekeme ndisịm ibat hour oro ẹyomde?
4 Kûsọsọp ubiere ke udukemeke ndinam utom usiakusụn̄ ofụri ini ke ntak oro ekerede ke udukemeke ndisịm ibat hour oro ẹyomde. Se ẹyomde ikam iyọhọke hour ita ke usen. Edieke ekerede ke udukemeke ndinam utom usiakusụn̄ ofụri ini, domo ndinam usiakusụn̄ unọ un̄wam ke ọfiọn̄ kiet m̀mê iba nyụn̄ nịm utịtmbuba edisịm hour 70 nọ idemfo. Oro ayanam atabi ese nte utom usiakusụn̄ enemde. (Ps. 34:8) Neme n̄kpọ emi ye mme asiakusụn̄ ofụri ini. Ekeme ndidi mmọ ẹma ẹkan ukem n̄kpọ-ata oro afo osobode idahaemi. (N̄ke 15:22) Ben̄e Jehovah ete ọdiọn̄ ukeme fo man atat utom fo.—1 John 5:14.
5. Ntak emi utom usiakusụn̄ ofụri ini edide eti ubọkọkọ?
5 Eti Ubọkọkọ: Ndinam usiakusụn̄ ofụri ini enyene ekese edidiọn̄. Enye ayanam fi okop akwa inemesịt oro asan̄ade ye edinọnọ. (Utom 20:35) Utom usiakusụn̄ ayanam fi ekeme nditịm nsiak ikọ akpanikọ. (2 Tim. 2:15) Enye ayanam enen̄ede enyene ifet ndikụt nte Jehovah an̄wamde fi. (Utom 11:21; Phil. 4:11-13) Utom usiakusụn̄ ayan̄wam fi n̄ko osion̄o mbun̄wụm spirit utọ nte edime ime, oyonyụn̄ anam enen̄ede asan̄a ekpere Jehovah. (Jas. 4:8) Ndi emekeme ndidụk akwa usụn̄ oro ẹbererede mi onyụn̄ akabade edi asiakusụn̄ ofụri ini?