Nte Ẹkemede Nditọn̄ọ Ukpepn̄kpọ Bible ye Mbon Oro Ẹkebọde Magazine
1. Nso idi utịtmbuba nnyịn ke ini inịmde mme magazine?
1 Nte ido edide, ke Saturday nnyịn isinọ magazine Enyọn̄-Ukpeme ye Awake! ke an̄wautom. Nte ededi, emi n̄kukụre edi akpa usio-ukot ke ndisịm utịtmbuba nnyịn oro edide ndikpep mbon oro ẹnyenede eti esịt, akpanikọ. Ẹnọ ndusụk ekikere ke idak emi ke nte ẹkpenịmde n̄wed Bible Ekpep ke ini ẹnamde mfiakn̄ka ẹnyụn̄ ẹtọn̄ọde ukpepn̄kpọ Bible. Afo emekeme ndikpụhọde mme ekikere emi nnam ekekem ye efakutom mbufo, onyụn̄ esịn enye ke ikọ idemfo. Omonyụn̄ ekeme ndida usụn̄ utọn̄ọ nneme efen oro afo okụtde ke ọfọn.
2. Didie ke ikeme ndida mme ntọn̄ọ ntọn̄ọ page ke n̄wed Bible Ekpep ntọn̄ọ ukpepn̄kpọ Bible?
2 Da Mme Ntọn̄ọ Ntọn̄ọ Page Esie Tọn̄ọ Ukpepn̄kpọ Bible: Ke ini afiakde aka, afo emekeme ndidọhọ ete: “Mme magazine oro n̄kọnọde fi do ẹdụri ntịn̄enyịn ẹwụt Bible. Kop ntak oro edikot Bible enen̄ede edi akpan n̄kpọ mi.” Kot Isaiah 48:17, 18; John 17:3; mîdịghe itie N̄wed Abasi efen oro owụtde nte edikot Bible edide akpan n̄kpọ. Ekem ke ama okowụt enyeneufọk n̄wed Bible Ekpep onyụn̄ ọnọ enye idem kiet, afo emekeme ndidọhọ ete:
◼ “Bible ọnọ nnyịn ata idotenyịn kaban̄a ini iso.” Wụt enyeneufọk page 4-5, nyụn̄ bụp ete, “Ewe ke otu mme un̄wọn̄ọ emi ke afo akpama ndikụt osude?” Wụt enye ibuot oro enemede un̄wọn̄ọ N̄wed Abasi oro enye emekde, ndien neme ikpehe ekikere kiet m̀mê iba edieke enye enyịmede.
◼ Mîdịghe afo emekeme ndidọhọ ete, “Bible ọbọrọ mme ata akpan mbụme ẹban̄ade uwem.” Dụri ntịn̄enyịn esie wụt page 6, nyụn̄ bụp m̀mê akanam enye ekere aban̄a ekededi ke otu mme mbụme oro ẹdude ke isọn̄ isọn̄ page oro. Kụbọde ka ibuot emi ọbọrọde mbụme oro, nyụn̄ neme ikpehe ekikere kiet m̀mê iba ibio ibio.
◼ Mîdịghe afo emekeme ndiwụt enye ndusụk ibuotikọ oro ẹdude ke page 2, onyụn̄ obụp enye ibuotikọ oro enye amade akan. Kụbọde ka ibuotikọ oro nyụn̄ nam ibio ibio wụt nte ẹsinịmde ukpepn̄kpọ Bible.
3. Didie ke nnyịn ikpọtọn̄ọ ukpepn̄kpọ Bible ke ima ikenịm mme magazine oro ẹtịn̄de n̄kpọ ẹban̄a (a) nte mme idaha ererimbot ẹtịmde-tịm ẹdiọk? (b) ubon? (c) nte Bible edide se ẹkemede ndiberi edem?
3 Bụp Mbụme Nịm ke Akpa Ediwaha: N̄kpọ efen oro ikpanamde edi ndisịn itiat idakisọn̄ nnọ mfiakn̄ka ke akpa ediwaha. Ke ini enyeneufọk ama ọkọbọ magazine oro, bụp mbụme, nyụn̄ dọhọ ke iyọbọrọ mbụme oro ke ima ifiak idi. Domo ndinam eti ndutịm ndifiak n̄ka, nyụn̄ kụt ete ke amafiak aka ke ini oro ekenịmde. (Matt. 5:37) Ke ini afiakde aka, ti enyeneufọk mbụme oro, ndien da n̄wed Bible Ekpep kot nyụn̄ neme ibọrọ oro ibio ibio. Nọ enye idem kiet man enye etiene ese. Emi edi ndusụk uwụtn̄kpọ:
◼ Edieke magazine oro afo ọkọnọde etịn̄de n̄kpọ aban̄a nte mme idaha ererimbot ẹtịmde-tịm ẹdiọk, afo emekeme ndidọhọ ete, “Ini efen iyeneme ibọrọ oro Bible ọnọde ke mbụme emi, Mme ukpụhọde ewe ke Abasi edinam ke isọn̄ emi?” Wụt enyeneufọk page 4-5 ke ini afiakde aka. Mîdịghe afo emekeme ndibụp ete, “Nte edi uduak Abasi nnyịn ndisobo mme n̄kpọ mmọn̄eyet?” Ke ini afiakde aka, wụt enyeneufọk ikpehe ekikere 7-8 ke ibuot 1.
◼ Edieke magazine oro afo ọkọnọde etịn̄de n̄kpọ aban̄a ubon, mbemiso ọnyọn̄de, emekeme ndibụp ete, “Nso ke owo kiet kiet ke ubon akpanam man anam uwem ubon enem?” Ke ini afiakde aka, neme ikpehe ekikere 4 ke ibuot 14.
◼ Edieke magazine oro afo ọkọnọde etịn̄de n̄kpọ aban̄a nte Bible edide se ẹkemede ndiberi edem, afo emekeme ndibụp mbụme emi eben̄e nneme efen, “Nte Bible enen ke n̄kan̄ ifiọk ntaifiọk?” Ke ini afiakde aka, neme ikpehe ekikere 8 ke ibuot 2.
4. Nso ke nnyịn ikpanam edieke enyeneufọk mîbọhọ n̄wed Bible Ekpep?
4 Ke utịt nneme kiet kiet, bụp mbụme efen oro afo edibọrọde ke ini afiakde aka. Ke ndondo oro ọtọn̄ọde ukpepn̄kpọ Bible, neme mme ibuot n̄wed oro ke adiana ke adiana ọtọn̄ọde ke akpa sịm akpatre. Nso edieke enyeneufọk mîbọhọ n̄wed Bible Ekpep? Afo emekeme ndisụk n̄ka iso nnọ enye mme magazine onyụn̄ esida Bible enyene nneme ye enye. Nte afo anamde udọn̄ esie ọkọri, enye ekeme ndinyịme ukpepn̄kpọ Bible nte ini akade.
5. Ntak emi nnyịn ikpanamde se ikande edinọ mme owo magazine?
5 Enyọn̄-Ukpeme ye Awake! ẹkeme ndidemede owo udọn̄ ndikpep se Bible enen̄erede ekpep. Ke ntre, sịn san̄asan̄a ukeme nditọn̄ọ ukpepn̄kpọ Bible ye mbon oro ẹbọde mme magazine emi. Ke ndinam ntem, nnyịn iyanam ewụhọ Jesus oro ọdọhọde ‘inam mme mbet, inyụn̄ ikpep mmọ n̄kpọ.’—Matt. 28:19, 20.