Ndifori Usọ Nnyịn ke An̄wautom—Da N̄wed Bible Ekpep Nam Wụt Nte Isikpepde Mme Owo Bible

Ntak Emi Edide Akpan N̄kpọ: Ke ini idọhọde mme owo ke nnyịn isikpep mme owo Bible ke mfọn, ediwak mmọ isifiọkke se ikọ nnyịn enen̄erede ọwọrọ. Mmọ ẹsikere ke ẹditie ke otu ikpep mîdịghe ke nnyịn idisinọ n̄wed ẹsọk mmimọ ikot, ekem item mmimọ udomo. Utu ke ndidọhọ ke ikpama ndisidi ndikpep mmọ Bible, wowụt mmọ nte isinamde. Emekeme ndida minit ifan̄ kpọt ọkpọkọm owo inọhọ fi itie owut owo nte isinịmde ukpepn̄kpọ Bible. Nam enye okụt ke ukpepn̄kpọ emi isisọn̄ke, onyụn̄ okụt ke edieke enye ekpepde Bible ke n̄kpọ eyenen̄ede an̄wan̄a enye.

Nte Ikpanamde:

Ke ama ọkọkọm enyeneufọk, bụp enye m̀mê akanam enye etie ekere nte n̄kpọ editiede ke ini iso.
Dọhọ enye ke ediwak owo ẹsikere ẹban̄a emi, nyụn̄ wụt enye mme ibuotikọ oro ẹdude ke n̄wed Bible Ekpep. Dọhọ enye ke ukpepn̄kpọ n̄wed emi emem, ke n̄wed emi owụt se Bible etịn̄de aban̄a ini iso ye mme n̄kpọ eken. Ndien bụp enye m̀mê ewe ibuotikọ ke enye akpama ineme.
Nọ enye n̄wed oro nyụn̄ wụt enye ebiet emi ibuotikọ oro enye emekde odude. Dọhọ enye ke mme ikpehe ekikere oro ẹtienede ẹbọrọ mme mbụme oro ẹdude ke idak ibuotikọ oro.
Dọhọ enyeneufọk okot akpa ikpehe ekikere edieke enye amade. Ekem bụp mbụme ikpehe ekikere oro, wụt enye nte ẹkpeyomde ibọrọ mbụme oro. Ẹkot ẹnyụn̄ ẹneme itie Bible oro ẹsiakde ẹsịn, emi enyenede n̄kpọ ndinam ye ibọrọ oro. Wụt enye nte afo odụride udịm ke ibọrọ kiet kiet ke n̄wed fo.
Kot ikpehe ekikere oro etienede nyụn̄ dọhọ enye odomo ndibọrọ mbụme oro ke ikọ idemesie.
Kọm enye, nyụn̄ diomi ini emi edifiakde idineme ibuotikọ oro.
Emekeme ndika jw.org/efi n̄kowụt enye vidio oro ẹkotde, Ẹsikpep Owo Bible Didie?

Nam Emi Ọfiọn̄ Emi:

Ben̄e Jehovah ete an̄wam fi ekeme nditọn̄ọ ukpepn̄kpọ Bible ye owo—Phil. 2:13.
Da Bible Ekpep wụt nte isikpepde mme owo Bible, mîdịghe ka jw.org kowụt mme owo vidio oro ẹkotde, Ẹsikpep Owo Bible Didie? Ini ekededi emi ọkwọrọde ikọ, emekeme ndinam emi ọkpọkọm ini kiet kpọt.