Ndi Amanam Ukpepn̄kpọ Bible Owụt ke Akpa Ediwaha?
Ke ini ẹdọhọde ke ẹyekpep mme enyeneufọk Bible, ndusụk mmọ ẹsidọhọ ke mmimọ inyeneke udọn̄ mîdịghe ke ẹsikpep mmimọ Bible ke ufọkabasi mmimọ. Sia mmọ ẹkerede ke ukpepn̄kpọ Bible emi editie nte enye oro mmimọ isikpepde, mmọ ifiọkke nte ke ukpepn̄kpọ Bible nnyịn ekeme ndinam Bible enen̄ede an̄wan̄a onyụn̄ enem mmọ. Ke ntre, utu ke ndinyụn̄ ndọhọ mmọ ke iyafiak idikpep Bible ye mmọ, ntak mûdaha minit ifan̄ ke akpa ediwaha oro unam uwụt mmọ nte ẹsikpepde Bible? Ke ndinam an̄wan̄a: Kûtetịn̄ unọ mmọ nte ke imọfiọk utem udia ye nte ke iyada udia oro itemde idi; nọ mmọ ntabi nse ke ebe oro! Se nte akpadade ekikere kiet emi odude ke page 6 ke Utom Obio Ubọn̄ Nnyịn eke March 2006 anam emi ke minit ifan̄ kpọt:
“Ndi afo emekere ke ini ke edi oro mme ikọ emi ẹdisude? [Kot Isaiah 33:24, nyụn̄ bet ibọrọ.] Yak n̄wụt fi n̄kpọ kiet emi afo edimade ke ibuotikọ emi.” Yak n̄wed Bible Ekpep kiet nọ enyeneufọk, nyụn̄ dọhọ enye okụbọde aka ikpehe ekikere 22 ke page 36. Kot mbụme oro odude ke utịt page oro, nyụn̄ dọhọ enyeneufọk ese m̀mê enye oyokụt ibọrọ ke adan̄aemi afo okotde ikpehe ekikere. Ekem fiak bụp mbụme oro, nyụn̄ kpan̄ utọn̄ kop ibọrọ enyeneufọk. Fiak kot itie N̄wed Abasi en̄wen ye enye. Bụp mbụme oro afo edibọrọde ke ini afiakde aka, nyụn̄ nam eti ndutịm ndifiak n̄ka. Ọmọtọn̄ọ ukpepn̄kpọ Bible idahaoro!