Nte Ikpadade N̄wed Eti Mbụk Ikpep Mme Owo N̄kpọ
1. Ẹwet ediye ekpri n̄wed Eti Mbụk didie?
1 Utom Obio Ubọn̄ Nnyịn eke July ama etịn̄ ke kiet ke otu n̄kpọutom emi isiwakde ndida n̄kpep mme owo n̄kpọ edi Eti Mbụk Emi Otode Abasi! Owo ikotke ediwak itie N̄wed Abasi oro ẹsiakde ke nsio nsio ikpehe idọn̄ koro ẹyom mme owo ẹkot mme itie oro ke Bible mmọ. Okposụkedi emi ẹwetde ediwak n̄wed nnyịn man mme owo ẹtie ke idem mmọ ẹkot, ẹwet enye emi man asuanetop etie ye owo emi enye ekpepde n̄kpọ ekpep n̄wed emi. Ntre ke ini inọde owo n̄wed emi, akpana iwụt enye nte isikpepde Bible man enye okụt ke esinen̄ede enem ndikpep nti n̄kpọ ke Bible.—Matt. 13:44.
2. Didie ke ikeme ndida n̄wed Eti Mbụk n̄kwọrọ ikọ ke akpa ini oro ikụtde owo?
2 Akpa Ini Emi Ikutde Owo: Emekeme ndidọhọ: “Ediwak owo ẹnen̄ede ẹyom ndifiọk nte uwem editiede ke ini iso. Ntak edi oro idide mi man ineme. Ndi emekere ke n̄kpọ ọyọfọn akan emi? [Bet ibọrọ.] Eti mbụk oro ọnọde idotenyịn ọyọyọhọ Bible. Se ndusụk mbụme oro Bible ọbọrọde mi.” Nọ enye ediye ekpri n̄wed oro, nyụn̄ dọhọ enye emek mbụme kiet ke ikpaedem n̄wed oro. Ekem da akpa ikpehe ke ukpepn̄kpọ oro wụt enye nte isikpepde n̄kpọ. N̄kpọ efen edi ndibụp enye mbụme emi edinamde enye ama ndineme nneme ye afo ke ibuotikọ oro afo emekde, ndien wụt enye nte n̄wed emi ekemede ndin̄wam enye okụt nte Bible ọbọrọde mbụme oro. Edieke ukpepn̄kpọ oro enyenede vidio ke jw.org/efi, ndusụk mme asuanetop ẹsibre vidio oro ẹwụt mme owo.
3. Tịn̄ nte ẹkpedade n̄wed Eti Mbụk ẹkpep owo n̄kpọ.
3 Nte Ikpadade N̄wed Emi Ikpep Owo N̄kpọ: (1) Bụp mbụme oro ẹwetde ke ndodobi ubọkn̄wed man an̄wam owo oro ekere aban̄a akpan n̄kpọ oro ẹdinemede ke ikpehe oro. (2) Kot ikpehe oro etienede. (3) Kot itien̄wed oro ẹdọhọde ẹkot nyụn̄ bụp mme mbụme oro edin̄wamde enye okụt nte itien̄wed oro ọbọrọde mbụme oro ẹkebụpde. (4) Edieke ikpehe efen odude ke idak mbụme oro nam ukem se akanamde ke ọyọhọ nọmba 2 ye 3. Edieke edide vidio odu emi enemede n̄kpọ aban̄a mbụme oro, ndien afo ubreke kan̄a uwụt enye, mbọk bre vidio oro ke ini ẹsụk ẹnyenede nneme. (5) Ekem dọhọ enye ọbọrọ mbụme oro ẹwetde ke ndodobi ubọkn̄wed man ọfiọk m̀mê se ẹkenemede an̄wan̄a enye.
4. Nso idin̄wam nnyịn ida n̄wed emi ikpep mme owo n̄kpọ ọfọn?
4 Diọn̄ọ se isịnede ke n̄wed emi. Kama enye ini ekededi. Kere ban̄a eyen ukpepn̄kpọ fo mbemiso akade ndikpep enye n̄kpọ, nyụn̄ kere nte edidade mme itie Bible ke ibuotikọ oro an̄wam enye. (N̄ke 15:28; Utom 17:2, 3) Edieke akamade n̄wed emi kpukpru ini onyụn̄ odiọn̄ọde ndida enye n̄kpep owo n̄kpọ ọfọn, enye edidi kiet ke otu n̄wed oro edimade ndisida n̄kpep mme owo akpanikọ.