Nditọn̄ọ Mme Ukpepn̄kpọ ke Ediye Uduot Ekpri N̄wed Oyom
1 Mme ntọt ẹtode ofụri ererimbot ẹwụt nte ke ediye uduot ekpri n̄wed Nso ke Abasi Oyom Oto Nnyịn? edi okopodudu n̄kpọutom ke ndikpep mme owo akpanikọ. Ke ẹtọn̄ọ ediwak tọsịn ukpepn̄kpọ Bible ke urua kiet kiet ke ediye uduot ekpri n̄wed emi. Ndi afo ama enyene uforo ke nditọn̄ọ nnyụn̄ nnịm ukpepn̄kpọ Bible ke ediye uduot ekpri n̄wed Oyom?
2 Ke adan̄aemi edide mmemmem n̄kpọ ọnọ ata ediwak owo ndinịm ediye uduot ekpri n̄wed emi, edi ọkpọsọn̄ n̄kpọ ọnọ ndusụk owo ndidiọn̄ọ se ẹkpetịn̄de man ẹtọn̄ọ ukpepn̄kpọ. Nso usụn̄ ke mbon efen ẹkụt nte enyenede uforo ke ndida ediye uduot ekpri n̄wed Oyom ntọn̄ọ mme ukpepn̄kpọ Bible? Mme ekikere ẹtienede mi ẹkeme ndin̄wam.
3 Dọhọ ke Iyanam Iwụt Nte Ẹsikpepde: Ke akpa ediwaha m̀mê mfiakn̄ka, utu ke n̄kukụre ndidọhọ enyeneufọk ke imọn̄ inịm ukpepn̄kpọ Bible, nnyịn imekeme ndinam n̄wụt enye nte idinịmde ukpepn̄kpọ Bible oro. Ekeme ndidi emi ayanam ikọ oro “ukpepn̄kpọ” an̄wan̄a ediwak mme enyeneufọk onyụn̄ osio editịmede esịt oro esisan̄ade ye enye efep. Ke ndondo oro nnyịn ikpepde ndinam enye n̄wụt, nnyịn iyokụt ite ke idade mmemmem ntọn̄ọikọ, nnyịn imekeme nditọn̄ọ ukpepn̄kpọ inikiet.
4 Ntịmidem Edi Ukpọhọde: Ifiopesịt oro inyenede ke nditọn̄ọ mme ukpepn̄kpọ Bible enyene nnennen ebuana ye nte nnyịn itịmde idem ọfọn. Mbemiso ntịmidem ayan̄wam nnyịn ndikan edimen̄e ekededi oro nnyịn ikemede ndinyene ke ndibuana ke utom edikpep Bible. Ebede ke ndidomo ukwọrọikọ nnyịn nse ediwak ini, nnyịn iyetịm inam ke ido nneme, ikeme nditịn̄ ikọ nnyịn ke ndammana usụn̄ ye ke mme ikọ idem nnyịn. Emi idinamke nnyịn itehede idem kpọt edi ayanam enyeneufọk odu ke ifụre n̄ko.
5 Ke ini anamde ndomonse, edi se in̄wamde afo ndise adan̄a ini oro ukwọrọikọ fo edidade man ekeme nditịn̄ nnọ enyeneufọk adan̄a ini oro edidade ndinam ukpepn̄kpọ n̄wụt. Ke ama eketịn̄ owo emi enye edide, eyenete kiet ọdọhọ ete: “Ami n̄kawaha ndiwụt fi ndutịm ukpepn̄kpọ Bible mfọn nnyịn. Enye edida n̄kpọ nte minit ition ndinam n̄wụt. Ndi afo emenyene minit ition?” Ẹkeme ndida n̄kpọ nte minit ition nnam Ukpepn̄kpọ 1 ke ediye uduot ekpri n̄wed Oyom n̄wụt. Edi akpanikọ, sụk mme itien̄wed Abasi oro ẹsatde-sat ke ẹkeme ndikot ke udomo ini emi, edi ke ndikụre akpa ukpepn̄kpọ oro ke minit ifan̄, enyeneufọk eyekeme ndinyene ifiọk mban̄a akpa ukpepn̄kpọ esie. Do nam enye ọdiọn̄ọ ete ke ini edifiakde idi ndikpep Ukpepn̄kpọ 2, afo edida minit 15 kpọt.
6 Ukwọrọikọ etienede mi emenyene uforo:
◼ “Ami n̄kpama ndinam ata mmemmem, edi usọp usọp, ukpepn̄kpọ Bible n̄wụt fi ke ediye uduot ekpri n̄wed Nso ke Abasi Oyom Oto Nnyịn? Ediwak owo ẹma ẹkụt ẹte ke ẹdade ekpri ini nte minit 15 ke urua kiet, ke urua 16 mmọ ẹkeme ndinyene ibọrọ N̄wed Abasi oro ọnọde uyụhọ nnọ mme akpan mbụme Bible ẹmi.” Da esisịt ini wụt se isịnede. Ke okụbọrede aka Ukpepn̄kpọ 1, dọhọ ete: “Edieke afo ekemede ndinọ nnyịn n̄kpọ nte minit ition, nnyịn ikpama ndiwụt fi nte emi enyenede ufọn. Ibuotikọ Ukpepn̄kpọ 1 edi ‘Nte Afo Ekemede Ndidiọn̄ọ Se Abasi Oyomde.’” Ndien kot mme mbụme ita oro, nyụn̄ nam mme nọmba oro ẹdude ke idiọn̄ọ ubak ọfiọn̄ ẹn̄wan̄a. Kot ikpehe ekikere 1, nyụn̄ wụt enyeneufọk nte ẹkemede ndikụt ibọrọ. Ẹkeme ndidọhọ enyeneufọk okot ikpehe ekikere 2. Ndien dọhọ ete: “Ọkọn̄ọde ke ntọt emi, didie ke afo ọkpọbọrọ mbụme emi? [Fiak kot mbụme oro, nyụn̄ yak enyeneufọk ọnọ ibọrọ.] Afo oyokụt ete ke mme itien̄wed Abasi ẹdu oro ẹnyenede ebuana ye ikpehe ekikere kiet kiet. Mmọ ẹmi ẹdụri ntịn̄enyịn nnyịn ẹwụt mme ibọrọ oro Bible ọnọde ke mme mbụme ẹmi. Ke uwụtn̄kpọ, ẹyak nnyịn ikot 2 Timothy 3:16, 17 inyụn̄ ise m̀mê enye ọsọn̄ọ ibọrọ oro afo ọkọnọde kaban̄a andiwet Bible.” Ke ama okokot ikpehe ekikere 3, obụp mbụme, onyụn̄ okot John 17:3, dụri ntịn̄enyịn enyeneufọk wụt ifiọk oro enye ọbọde ke ndidụn̄ọde Ukpepn̄kpọ 1. Ke emi afo emekeme ndikụbọde n̄ka Ukpepn̄kpọ 2 onyụn̄ okot akpatre mbụme, “Nso idi usụn̄ iba ẹmi nnyịn ikemede ndikpep n̄kpọ mban̄a Abasi?” Ndien bụp ete: “Ini ewe ke afo edinyene n̄kpọ nte minit 15 man ikeme ndikpep Ukpepn̄kpọ 2 inyụn̄ iyom ibọrọ?”
7 Edi akpan n̄kpọ ndinam nneme edi mmemmem nnyụn̄ ntoro enyeneufọk ke ini ekededi ekemede. Ke ini anamde ndutịm ọnọ ediwaha efen, utu ke ndibụp m̀mê enye ayama ndika iso, sịn udọn̄ nọ enye n̄kukụre nditiene ukem ndutịm oro kaban̄a ukpepn̄kpọ efen. Nam enye ọdiọn̄ọ ete ke afo omodori enyịn ndifiak ndi. Afo emekeme n̄ko ndisịn udọn̄ nnọ eyen ukpepn̄kpọ enịm ediye uduot ekpri n̄wed ke eti itie, man ekeme ndisọp n̄kụt ke afiakde awaha.
8 Biere: Ke adan̄aemi ntịmidem edide ukpọhọde edikụt unen, ana nnyịn ibiere ndisifiak n̄ka. Ekeme ndidi n̄kpọ-ata ndida minit ifan̄ n̄kpep ukpepn̄kpọ kiet, ke ntre biere ndidomo ukwọrọikọ nse ke adan̄a ediwak ini emi oyomde man ekeme nditịn̄ ikọ udọn udọn ke ini anamde ukpepn̄kpọ owụt. Domo ndinam ukpepn̄kpọ n̄wụt kpukpru owo emi osobode ke enyịnusụn̄ m̀mê ke ido nneme. Edieke afo enyenede mfịna ke nditọn̄ọ ukpepn̄kpọ Bible, kûyak idem emem fi. Edikụt unen ke nditọn̄ọ ukpepn̄kpọ Bible oyom ubiere ye udọn̄ esịt akpanikọ ndinọ mbon efen akpanikọ.—Gal. 6:9.
9 Ebede ke ndida mme ekikere ẹmi nsịn ke edinam, afo n̄ko emekeme ndinyene ifet edin̄wam owo efen ke usụn̄ oro adade esịm uwem, ebe ke nditọn̄ọ nnyụn̄ nnịm ukpepn̄kpọ Bible ke ediye uduot ekpri n̄wed Oyom.—Matt. 7:14.