Nnennen Usụn̄ Oro Ẹkpesede Ẹnyụn̄ Ẹdade Mme N̄wed Nnyịn Ẹnam N̄kpọ
1 Ke ediwak isua, esop Abasi ibiereke akpan ekọmurua oro anade ẹkpe ke mme n̄wed emi enye ọnọde nnyịn ye mbonan̄wa. Ndutịm emi enen̄ede enyene ufọn, ndien enye n̄ko anam ẹda mmemmem usụn̄ ẹse ẹban̄a ediwak n̄kpọ ke Bethel ye ke esop. Edi nte nnyịn ifiọkde, n̄wed nnyịn ndidi “ke unana ekọmurua” iwọrọke ke mmọ ẹdi ke “mfọn.” Ẹbiat ata ekese okụk ke ndidep nnyụn̄ ntobo kpukpru n̄kpọ oro ẹyomde ndikama mmịn̄ nnyụn̄ nsuan udia eke spirit emi nnọ mme esop. Ke ntre, ọfọn ineme n̄kpọ ifan̄ iban̄a nnennen usụn̄ oro ẹkpesede mme n̄wed emi.
2 Nso mbiomo ke nnyịn inyene ke nditịp n̄kpọ nsịn ke utom ofụri ererimbot? (Kot Mme N̄ke 3:9.) Ndida inyene nnyịn n̄kpono Jehovah edi ata utịbe utịbe ifet. Ofụri se inyenede oto enye. Ndinọ etịbe edi usụn̄ kiet ndiwụt Jehovah ke imowụt esịtekọm iban̄a kpukpru se enye anamde ọnọ nnyịn. Nte idịghe nnyịn ke Jehovah ọdiọn̄? Ntre, ikpanaha nnyịn ikere ke mbon oro nnyịn inọde mme n̄wed nnyịn kpọt ẹdi mbon oro ẹnyenede ndinọ etịbe.
3 Didie ke nnyịn ikpakama mme n̄wed emi? (Kot Matthew 25:21.) Edumbet emi owụt ke oyom inam akpanikọ. Edinam akpanikọ esida uwak edidiọn̄ edi. Ndusụk ini, nnyịn imekeme ndikere ke nte ikamade mme n̄wed nnyịn idịghe akpan n̄kpọ. Edi edieke inamde akpanikọ ke n̄kpri n̄kpọ, ẹkeme ndimek nnyịn ise iban̄a ediwak n̄kpọ. Mme ọsọn̄urua udia eke spirit ẹdu ke n̄wed nnyịn. Nte ikamade mme n̄wed emi ekpenyene ndiwụt emi. Ikpọfọnke ndiyak mme n̄wed emi nnọ nditọwọn̄ oro mîfiọkke ufọn mmọ edi emi ẹdibiatde-biat mmọ. Ke ini nditọwọn̄ ẹfiọkde ndikot n̄wed ẹnyụn̄ ẹdotde ndinyene n̄wed idemmọ, ẹkpenyene ndikpep mmọ nte ẹkpekamade n̄wed ke eti usụn̄ mbak edibiara. Ke ndusụk esop, ẹsikụt n̄wed nnyịn ẹbaride ẹbono ke isọn̄. Emi iwụtke esịtekọm inọ ọsọn̄urua n̄kpọuto emi n̄wed nnyịn ẹdide.
4 Didie ke n̄keme ndibọ mme n̄wed edieke mmenyeneke okụk oro awakde ekem ndinọ etịbe? (Kot 2 Corinth 8:13-15.) Otu Ukara oyom kpukpru owo ẹbọ ufọn ẹto ndutịm unọ ukpep eke spirit oro ẹdude ke kpukpru esop Mme Ntiense Jehovah ke ofụri ererimbot. Oro akanam ẹdọhọ ke ẹkpenyene ndinam mme n̄wed oro ẹsidade ẹnịm mme mbono esop ẹdu ẹnọ kpukpru owo, utọ nte Enyọn̄-Ukpeme ye mme n̄wed oro ẹsikamade ke Ukpepn̄kpọ N̄wed Esop. Nte ededi, ikpanaha ẹkama mme n̄wed emi ke idiọk usụn̄ m̀mê ẹda mmọ didie didie. Ẹkeme ndibabuana ediwak n̄kpọ eken oro ẹsiode, utọ nte mme kaset, CD, DVD, ye mme n̄kpọ eken oro ẹsitobode edieke owo oyomde. Iyomke kpukpru owo ke ubon ẹnyene eke idemmọ. Inyụn̄ iyomke kpukpru ubon ẹnyene kpukpru kaset vidio ye mme DVD oro ẹdude.
5 Edide imọbọ mme n̄wed m̀mê ibọhọ, nnyịn ikpenyene ndidiọn̄ọ ke imenyene ifet, ke onyụn̄ edi mbiomo nnyịn ndida okụk nnọ utom ofụri ererimbot ibetedem, ndien ikpenyene ndida ifet emi ke ọsọn̄urua idem ọkpọkọm nnyịn inyeneke ediwak okụk nditịp.
6 Imodori enyịn ke ntọt emi ayanam nnyịn inen̄ede iwụt esịtekọm iban̄a mme n̄wed oro ẹnọde nnyịn. Nnyịn ikpakam ida usụn̄ oro isede inyụn̄ idade mme ọsọn̄urua n̄wed nnyịn inam n̄kpọ iwụt ke imanam akpanikọ ke n̄kpri n̄kpọ, man ẹkpenọ nnyịn ediwak n̄kpọ ke ini iso.