San̄asan̄a Nsiondi Awake! Oro Ẹdinọde ke November!
1 Ediwak owo ẹsibụp mbụme ẹban̄a ufọn oro Bible enyenede. Edieke edide mme owo ẹkewet Bible, ntak emi ẹkotde enye Ikọ Abasi? Ntak emi n̄kpeberide edem ke Bible man ada mi usụn̄? Nso idi mme ufọn oro ndibọde edieke mbiatde ini nnyụn̄ nsịnde ukeme n̄kot nnyụn̄ n̄kpep Bible? Edikabade Bible ewe ke n̄kpokot? Mmọ emi ẹdi ndusụk mbụme oro ẹbọrọde ke san̄asan̄a nsiondi Awake! eke November oro ibuotikọ edide “Can You Trust the Bible?” (Nte Afo Emekeme Ndiberi Edem ke Bible?)
2 Nnyịn ikpenyene ndinen̄ede nsuan san̄asan̄a nsiondi Awake! emi ke efakutom nnyịn. Edieke ekemede, buana ke utom ukwọrọikọ eke ufọk ke ufọk ye esop mbufo kpukpru Saturday ke ọfiọn̄ November. Wụt mme iman, mme mbọhọidụn̄, mme nsan̄autom, mme andikpep, mme nsan̄a ufọkn̄wed, ye mme mfiakn̄ka fo san̄asan̄a nsiondi Awake! emi. Kama Awake! emi ke ini akade ndidep n̄kpọ ye ke ini akade isan̄. Mbiowo ẹmetobo idem Awake! emi efen efen man esop ekpenyene ibat oro ekemde.
3 Tọn̄ọ Ukpepn̄kpọ Bible: Edieke ọnọde owo magazine emi, afo emekeme ndinam ndutịm ye enye mban̄a ukpepn̄kpọ Bible mbemiso ọnyọn̄de. Ke uwụtn̄kpọ, afo emekeme ndidọhọ, “Mma mfiak ndi, n̄kpama ndiwụt fi nte Bible ọbọrọde mbụme emi, ‘Nso idi uduak Abasi kaban̄a isọn̄?’” Ekem da n̄wed Bible Ekpep fiak ka nyụn̄ wụt enyeneufọk page 4-5, mîdịghe neme ibuot 3, ikpehe ekikere 1-3. Usụn̄ efen edi ndidọhọ, “Mma mfiak ndi, n̄kpama ndineme ntịn̄nnịm ikọ Bible oro osude idahaemi.” Ke ini afiakde aka, wụt enyeneufọk ibuot 9 ke n̄wed Bible Ekpep nyụn̄ neme ikpehe ekikere 1-3. Mîdịghe afo emekeme ndikam ndọhọ enyeneufọk ete: “Esisọn̄ ediwak owo ndifiọk se mmọ ẹkotde ke Bible. Isan̄ efen, n̄kpama ndiwụt fi nte ekemede nditịm mfiọk se idude ke Bible.” Ke ini afiakde aka, nọ enye n̄wed Bible Ekpep, nyụn̄ wụt nte ẹsikpepde enye.
4 Bible kpọt esịne “ndisana uwetn̄kpọ” emi ẹkemede ndinam nnyịn ‘inyene ọniọn̄ ibọ edinyan̄a.’ (2 Tim. 3:15) Mmọdo, kpukpru nnyịn ikpenyene ndibuana ọyọhọ ọyọhọ ke edisuan san̄asan̄a nsiondi Awake! emi man in̄wam mme owo ẹberi edem ke Bible.