Nọ Mme Magazine Oro Ẹtiede Ntiense Ẹnọ Akpanikọ
1. Nso akpan utom ke ẹda Enyọn̄-Ukpeme ye Awake! ẹnam?
1 Enyọn̄-Ukpeme Ọnọ Ntọt Obio Ubọn̄ Jehovah ye nsan̄a esie Awake! ẹdi ata akpan n̄kpọutom ke utom edikwọrọ Obio Ubọn̄ ye edinam mbet. (Matt. 24:14; 28:19, 20) Nte nnyịn ibuanade ke nsio nsio ikpehe utom Obio Ubọn̄, nnyịn imesikop inemesịt kpukpru ini ndinọ mme owo ekemini magazine iba emi.
2. Mme ukpụhọde ewe ke ẹnam ke Enyọn̄-Ukpeme ye Awake!, ndien ntak-a?
2 Ke ediwak isua oro ẹbede, nnyịn imokụt mme ukpụhọde oro ẹnamde ke nte mme magazine emi ẹkponide, se ẹwetde ke esịt, ye mme usụn̄ oro idade isuan mmọ. Ẹnam mme ukpụhọde emi man mme magazine emi ẹnen̄ede ẹdemede mme owo udọn̄ ẹnyụn̄ ẹnyene ufọn, man etop Obio Ubọn̄ ekeme ndisịm esịt ‘kpukpru orụk owo man mmọ ẹkpekeme ndinyene edinyan̄a nnyụn̄ nsịm nnennen ifiọk akpanikọ.’—1 Tim. 2:4.
3. Didie ke ẹdida mme magazine emi ẹnam n̄kpọ ke an̄wautom?
3 Ọtọn̄ọde ke January 2006, nnyịn imenen̄ede ikọri usọ ke nte idade nsio nsio usụn̄ utọn̄ọ nneme nnọ Awake! oro ẹsisiode ini kiet ke ọfiọn̄. Idahaemi, ukem n̄kpọ oro ke nnyịn idinam ke an̄wautom ye kiet ke otu nsiondi Enyọn̄-Ukpeme iba oro ẹsimịn̄de ke ọfiọn̄ ke ọfiọn̄. Mme uwụtn̄kpọ oro ẹnọde ke nte ẹkpenọde magazine kiet kiet ẹsidu ke edem Utom Obio Ubọn̄ Nnyịn. Ẹsiwak nditịn̄ n̄kpọ mban̄a kiet ke otu mme ibuotikọ oro ẹdade ẹtọn̄ọ magazine oro, edi ndusụk ini, ẹsitịn̄ n̄kpọ n̄ko ẹban̄a mme ibuotikọ efen oro ediwak owo ẹdimade ndikot. Nnyịn imekeme ndida mme ekikere oro ẹnọde nnam n̄kpọ uforo uforo edieke inen̄erede imehe ye ibuotikọ oro ẹtịn̄de n̄kpọ ẹban̄a inyụn̄ idade ikọ idem nnyịn ikpụhọde mme ekikere oro isịn ke usụn̄ oro ekemde ye efakutom nnyịn.
4. Ntak emi ọkpọfọnde ndida mme usụn̄ unyene nneme efen ke adianade ye mme ekikere oro ẹnọde ke Utom Obio Ubọn̄ Nnyịn?
4 Okposụkedi Utom Obio Ubọn̄ Nnyịn esịnede ekikere iba ke nte ẹkpenịmde magazine kiet kiet, emekeme ndida usụn̄ unyene nneme efen nnịm magazine emi. Ntak kiet ndinam emi ekeme ndidi nte ke kiet ke otu mme ibuotikọ eken eyedemede ata ediwak owo udọn̄ ke efakutom mbufo. Mîdịghe ekeme ndidi ekere ke imekeme ndida ibuotikọ efen oro enen̄erede edemede imọ udọn̄ ntọn̄ọ nneme uforo uforo.
5. Nso ke ana afo anam mbemiso etịmde se editịn̄de aban̄a magazine oro ẹdinọde?
5 Nte Ekpetịmde Se Edinemede: Akpa kan̄a, ana afo etịm emehe ye ibuotikọ oro afo emekde nditịn̄ n̄kpọ mban̄a. Iwọrọke ke ana ọfiọk kpukpru se ibuotikọ kiet kiet etịn̄de mbemiso ọnọde mme owo magazine oro ke an̄wautom. Nte ededi, ana afo etịn̄ ikọ ke ofụri esịt onyụn̄ esịn ufiop ke ibuotikọ oro afo emekde ndineme mban̄a. Afo edinam emi n̄kukụre edieke enen̄erede emehe ye ibuotikọ oro enemede aban̄a.
6. Didie ke ikeme nditịm se idinemede?
6 Ekem, tịm nsio nsio ntọn̄ọikọ. Emekeme ndida mbụme oro edemerede owo udọn̄ onyụn̄ enyenede ebuana ye ibuotikọ oro ntọn̄ọ nneme. Nyene mbuọtidem kpukpru ini nte ke Ikọ Abasi enyene odudu nditụk owo esịt. (Heb. 4:12) Mek itie N̄wed Abasi oro odotde, emi enyenede ebuana ye ibuotikọ emi etịn̄de n̄kpọ aban̄a, iso-ọfọn itie N̄wed Abasi oro ẹsiakde m̀mê oro ẹkotde ẹsịn ke ibuotikọ oro afo enemede aban̄a. Kere nte edibuande itie N̄wed Abasi oro ye ibuotikọ emi.
7. Didie ke nnyịn ikpokpụhọde mme usụn̄ unyene nneme nnyịn?
7 Ke Kpukpru Ifet: Man nneme oro etịmde enen̄ede enyene ufọn, ana ada enye anam n̄kpọ. Tiene mbon en̄wen ke esop buana ke ndida magazine nnọ ikọ ntiense ke Saturday. Nọ mbon oro ẹkebọde mme n̄wed en̄wen magazine. Nọ nditọ ukpepn̄kpọ Bible fo magazine kpukpru ini ye mbon en̄wen oro esisobode ke ini anamde mfiakn̄ka. Afo emekeme ndinọ mbon oro esinyenede nneme ke ini akade ndidep n̄kpọ, ke ini akade isan̄, mîdịghe ke ini etiede ebet abiausọbọ. Kpụhọde mme usụn̄ oro adade enyene nneme ke ọfiọn̄ oro.
8. Ke mme usụn̄ ewe ke Enyọn̄-Ukpeme ye Awake! ẹdi n̄wọrọnda?
8 Enyọn̄-Ukpeme ye Awake! ẹdi n̄wọrọnda magazine. Mmọ ẹmenede Jehovah ke enyọn̄ nte Andikara ekondo. (Utom 4:24) Mmọ ẹda eti mbụk Obio Ubọn̄ Abasi ẹdọn̄ mme owo esịt ẹnyụn̄ ẹsịn udọn̄ ẹnọ mme owo ndinyene mbuọtidem ke Jesus Christ. (Matt. 24:14; Utom 10:43) Ke adianade do, mme magazine emi ẹka iso ẹwụt nte mme n̄kpọntịbe ererimbot ẹsude ntịn̄nnịm ikọ Bible. (Matt. 25:13) Ben̄e idem ndinọ mme magazine emi ke ifet ekededi oro ebererede man an̄wam mme owo ke efakutom mbufo ẹbọ ufọn ẹto mmọ!
9. Didie ke nnyịn ikeme ndisịn itiat idakisọn̄ nnọ mfiakn̄ka?
9 Ke ini enịmde magazine, m̀mê idem ke ini enemede inem inem nneme Bible ye owo, bụp enye mbụme mîdịghe tịn̄ ikọ oro edinamde enye ekere n̄kpọ onyụn̄ ekemede ndiberede usụn̄ nnọ mfiakn̄ka ye nneme Bible efen. Edieke isịnde ifịk itọ n̄kpasịp akpanikọ, nnyịn imekeme ndinyene idotenyịn nte ke Jehovah eyeberede esịt mbon oro ẹnen̄erede ẹyom ndidiọn̄ọ Enye nnyụn̄ nnam n̄kpọ Esie.—1 Cor. 3:6.