Afo Emekeme Ndikpep Owo N̄kpọ!
1. Nso ifet ke kpukpru mme asuanetop Obio Ubọn̄ ẹnyene?
1 Kiet ke otu ikpehe utom ukwọrọikọ nnyịn oro ọnọde uyụhọ akan edi ndikpep owo akpanikọ. Esidi n̄kpọ inemesịt ndikụt nte enye enyịmede etop Obio Ubọn̄, nnyịn inyụn̄ in̄wamde enye asan̄a ekpere Andikara ekondo. (Jas. 4:8) Utịtmbuba kpukpru mme asuanetop Obio Ubọn̄ ekpedi ndikpep owo oro okopde nsatitọn̄ akpanikọ nnyụn̄ nse nte enye ọtọn̄ọde ndinam ikpọ ukpụhọde ke ido, ekikere, ye edu uwem esie.—Matt. 28:19, 20.
2. Ntak emi ndusụk owo mîsinịmke ukpepn̄kpọ Bible, ndien nso idin̄wam mmọ ẹkan mfịna emi?
2 Beri Edem ke Jehovah: Ke ini edem, mme anam-akpanikọ asan̄autom Abasi ẹma ẹsikere ke mmimọ idikemeke ndinam utom oro Abasi ọkọdọn̄de mmimọ. Ibetedem oro Moses, Jeremiah, Amos, ye mme usụhọde owo eken ẹkenyenede ke Jehovah Abasi akan̄wam mmọ ndikan eyịghe m̀mê ndịk oro mmọ ẹkenyenede ẹnyụn̄ ẹnam ikpọ n̄kpọ. (Ex. 4:10-12; Jer. 1:6, 7; Amos 7:14, 15) Apostle Paul n̄ko ama enyene “uko,” m̀mê esitịn̄ ikọ ye unana ndịk. Didie? Enye ọkọdọhọ ke ekedi ke ukeme “Abasi nnyịn.” (1 Thess. 2:2) Ih, kpukpru nnyịn imekeme ndinyene mbuọtidem nte ke Jehovah ọyọnọ un̄wam, ọniọn̄, ye ukeme oro nnyịn iyomde man inịm mme ukpepn̄kpọ Bible emi ẹnyenede uforo.—Isa. 41:10; 1 Cor. 1:26, 27; 1 Pet. 4:11.
3, 4. Nso ukpep idu man an̄wam nnyịn ikpep owo Ikọ Abasi?
3 Nyịme Ndibọ Ukpep: Akwa Anditeme nnyịn, kpa Jehovah Abasi, esida Bible ọnọ nnyịn ukpep kpukpru ini man itịm idot nte mme andikpep. (Isa. 54:13; 2 Tim. 3:16, 17) Nyịme ukpep emi ke ndinam ofụri se ekekeme ke ini enyenede ifet ndifori ifiọk N̄wed Abasi fo nnyụn̄ nnam n̄kọri ke ukeme fo ndikpep owo akpanikọ Bible. Okposụkedi emi edide akpan uduak Ufọkn̄wed Utom Ukara Abasi ye Esoputom, kpukpru mbono esop ẹkpep nnyịn ndida Ikọ Abasi n̄kpep owo n̄kpọ.
4 Domo ndida mmemmem usụn̄ n̄kpep nditụn̄ọ akpanikọ Bible. N̄wed Ufọkn̄wed Utom, page 227, ọdọhọ ete: “Ana ibuot nneme fo etịm an̄wan̄a fi edieke afo oyomde ndinam enye an̄wan̄a mbon efen.” Ndibọrọ mbụme ke mme mbono esop ẹsin̄wam nnyịn imụm mme akpan n̄kpọ oro ididade inam n̄kpọ ke ini iso idọn̄ ke ibuot. Ntre tịm idem ọfọn, ndien eyenyene uko ndikpep mbon en̄wen n̄kpọ.
5. Ewe ukpep efen ke nnyịn inyene ke esịt esop, emi edin̄wamde nnyịn inam n̄kọri nte mme andikpep?
5 Toto ke ntọn̄ọ, eyịghe idụhe nte ke mme Christian ẹsikpep n̄kpọ ẹto kiet eken ke adan̄aemi ẹsan̄ade kiet ẹnam mme mbet. (Luke 10:1) Edieke ekemede, san̄a ye mme asuanetop emi ẹnyenede mbufiọk, esịnede mme asiakusụn̄, mbiowo, ye mme esenyịn oro ẹsan̄ade-san̄a ka ukpepn̄kpọ Bible. Se nte mmọ ẹdade ndise, mme uwụtn̄kpọ, ye mme usụn̄ unọ ukpep eken emi ẹdude ke n̄wed nnyịn ẹnam akpanikọ Bible an̄wan̄a. Dọhọ mmọ ẹnọ fi ekikere ke nte afo ekemede ndidi eti andikpep. (N̄ke 1:5; 27:17) Wụt esịtekọm ban̄a kpukpru utọ ukpep emi sia mmọ ẹtode Abasi.—2 Cor. 3:5.
6. Nso ke ẹyom man owo akabade edi andikpep Ikọ Abasi?
6 Beri edem ke Jehovah man ọbọ ufọn oto ukpep emi enye ọnọde. Bọn̄ akam ben̄e n̄kọri. (Ps. 25:4, 5) Afo n̄ko emekeme ndikop idatesịt ndin̄wam owo akabade edi andikpep Ikọ Abasi ukem nte afo!