Mmọ Ẹdinam Didie Ẹkop?
1. Ntak emi utom ukwọrọikọ ekemede ndisọn̄-ọ, ndien ntak emi isịnde ifịk-e?
1 Sia usen Jehovah etịmde asan̄a ekpere, enen̄ede oyom ẹn̄wam ediwak mbon en̄wen ẹnyene nnennen ifiọk ẹban̄a Abasi ye se enye aduakde aban̄a ubonowo. (John 17:3; 2 Pet. 3:9, 10) Ekeme ndisọn̄ ndinam emi ndusụk ini, sia ediwak owo mînyeneke udọn̄ m̀mê ẹkemede ndisak nnyịn ke ntak ukwọrọikọ nnyịn. (2 Pet. 3:3, 4) Kpa ye oro, nnyịn imenyene eti ntak ndinịm ke mme owo ẹsụk ẹdodu ke efakutom nnyịn emi ẹdinyịmede eti mbụk ke ini mmọ ẹkopde. Utọ mbon oro ẹdinam didie ẹkop ke ọkwọrọikọ mîdụhe?—Rome 10:14, 15.
2. Didie ke uwụtn̄kpọ apostle Paul esịn udọn̄ ọnọ nnyịn?
2 Ndisobo Ubiọn̄ọ: Ke ufọn mbon oro ẹnyịmede ndikop etop Obio Ubọn̄, ikpanaha idem emem nnyịn. Philippi ekedi akpa obio ke Europe, oro mme owo ẹkekopde eti mbụk emi Paul ọkọkwọrọde. Ẹma ẹda eto ẹmia enye ye Silas ẹnyụn̄ ẹtop mmọ ẹdọn̄ ke ufọk-n̄kpọkọbi ke ini ẹkedoride mmọ ikọ. (Utom 16:16-24) Nte ededi, utọ ufen oro ikanamke Paul okop ndịk etre ukwọrọikọ. Ke ini enye akakade Thessalonica, udiana obio ke isan̄ isụn̄utom esie, enye ‘ama ada uko ke Abasi etịn̄ eti mbụk.’ (1 Thess. 2:2) Ndi uwụtn̄kpọ Paul iwụtke ntak emi nnyịn ‘mîkpakpaha mba’?—Gal. 6:9.
3. Nso ikeme ndinam ndusụk mbon oro mîkenyeneke udọn̄ ke akpa ẹkpụhọde ekikere idahaemi?
3 Ediwak mbon oro mîkamaha ndinọ n̄kpan̄utọn̄ ke ediwak isua ẹma ẹkpụhọde ekikere. Unana okụk, udọn̄ọ, n̄kpa iman mmọ, m̀mê idiọk mbụk n̄kpọntịbe ke ererimbot ẹkeme ndidi ntak utọ ukpụhọde oro. (1 Cor. 7:31) Ndusụk mbon emi ete ye eka mmọ ẹkebiọn̄ọde ẹmekabade ikpọ owo idahaemi ẹnyụn̄ ẹnyịme ndinọ n̄kpan̄utọn̄. Nnyịn ndika iso n̄kwọrọ ikọ ọnọ utọ mbon oro ifet ‘ndiseme n̄kot enyịn̄ Jehovah’ mbemiso ini ebede.—Rome 10:13.
4. Nso isinụk nnyịn ika iso ke utom ukwọrọikọ “ye unana edikpa mba”?
4 ‘Kûkpa Mba’: Ima oro imade Abasi ye mbọhọidụn̄ oyonụk nnyịn ika iso ke utom ukwọrọikọ ye edinam mbet “ye unana edikpa mba,” kpa nte mme apostle ẹkenamde ke akpa isua ikie. (Utom 5:42) Ediwak owo mfịn ke ‘ẹseme ẹnyụn̄ ẹtua ẹban̄a kpukpru mbubiam ido’ emi ẹnamde mfịn. (Ezek. 9:4) Nso utọ idotenyịn ye ubọhọ ke mmọ ẹsinyene ntem ke ini ẹkopde eti mbụk! Idem ke ini ata ediwak owo mîkpan̄ke utọn̄, nnyịn imenyene nsọn̄ọ N̄wed Abasi nte ke Jehovah ama ukeme oro nnyịn isịnde.—Heb. 13:15, 16.