Owo Idopke Uyo ke Ndikwọrọ Eti Mbụk
1 Mme akpa Christian ẹkeda utom ukwọrọikọ mmọ ke ata akpan n̄kpọ. Luke ọkọtọt ete: “Kpukpru usen, ke temple ye ke ufọk, mmọ idopke uyo ndikpep nnyụn̄ n̄kwọrọ, ẹte Jesus edi Christ.” (Utom 5:42) N̄kpọ ndomokiet, ekpedi idem ukọbọ, ikemeke ndibiọn̄ọ mmọ! (Utom 8:4) Mmọ ẹma ẹsitịn̄ ẹnọ mbon en̄wen ẹban̄a akpanikọ kpukpru usen.
2 Nso kaban̄a nnyịn? Bụp idemfo ete: ‘Nte ami mmọfiọk nte ini ẹdide usọp usọp? Nte ami mmenyene ntụhọ ndika iso ntan̄a eti mbụk ye unana edidop uyo?’
3 Mme Uwụtn̄kpọ Edikwọrọ Ikọ ye Unana Edidop Uyo eke Eyomfịn: Eyenete an̄wan kiet, owo unọmọ akpauben̄ nditọwọn̄, ekesida ukwak ibifịk okot ibifịk. Enye ikesikemeke ndika Ufọkmbono Obio Ubọn̄ m̀mê ndidụk mbono. Edi enye ama esisịn ifịk etieti ke ndikwọrọ eti mbụk. Ke isua 37 oro enye eketiede itie ọtọkiet mi, enye ama ekeme ndin̄wam owo 17 ẹkpep akpanikọ! Didie ke enye akanam oro? Okposụkedi mîkekemeke ndisan̄a to ke enyịnusụn̄ sịm enyịnusụn̄, enye ama okụt usụn̄ ndinyene nneme ke usen ke usen ye mbon oro ẹkesobode ye enye.
4 Nditọete nnyịn ke Bosnia ẹkenyene ndiyọ ekọn̄ ye unana. Kpa ye oro, mmọ ẹma ẹka iso ndikwọrọ ikọ nnọ mmọ en̄wen kpukpru ini. Ke Sarajevo mme asuanetop ẹsida hour 20 ke ọfiọn̄ kiet kiet ke ẹbaharede ukem ukem ẹnyene nneme ye mbon en̄wen ẹban̄a eti mbụk, mmọ owo kiet kiet ẹsinyụn̄ ẹnịm ukpepn̄kpọ Bible iba ke ẹbaharede ukem ukem. Kpa ye n̄kpọsọn̄ idaha mmọ, mmọ ẹsikwọrọ ikọ ẹnyụn̄ ẹkpep n̄kpọ ye unana edidop uyo.
5 N̄kpri owo n̄ko ẹsiwụt ifịk ke utom ukwọrọikọ. Ẹma ẹsịn ubon kiet ẹdide Mme Ntiense ke Rwanda ke ubet emi mbonekọn̄ ẹkeben̄ede idem ndiwot mmọ. Ubon oro ẹma ẹben̄e ẹte ẹyak mmimọ ibem iso ibọn̄ akam. Ẹma ẹnyịme emi, ndien Deborah, ekpri eyenan̄wan, ama ọbọn̄ akam uyo ọwọrọ ete: “Jehovah, urua emi ami ye Papa ima inịm magazine ition. Nnyịn idisan̄a didie ifiak ibịne mme owo ẹmi man ikekpep mmọ akpanikọ inyụn̄ in̄wam mmọ ẹnyene uwem?” Ke ntak ọkpọsọn̄ mbuọtidem esie ye ima emi enye enyenede ke utom ukwọrọikọ, ẹma ẹnịm ofụri ubon oro uwem.
6 Mfịn, oyom ẹnọ ntịn̄enyịn ke mme ifet ndinọ mbon en̄wen ikọ ntiense nnyụn̄ nyom mbon oro “ẹnyenede esịt akpanikọ kaban̄a nsinsi uwem.” (Utom 13:48, NW) Etienede mme idaha n̄kann̄kụk, mbiowo esop ẹsinam ndutịm ẹnọ unọ ikọ ntiense otu ke mme ini oro ẹdotde, edide ke usenubọk, uwemeyo, m̀mê mbubịteyo. Mme ibuotikọ ke Utom Obio Ubọn̄ Nnyịn ye mme ikpehe ke Esoputom, mme mbono circuit, ye mme mbono district ẹsinọ mme ekemini ekikere ye nsịnudọn̄ ndibuana ke nsio nsio usụn̄ unọ ikọ ntiense Obio Ubọn̄. Adianade ye emi, mme esenyịn circuit ye district ẹsinọ mme asuanetop ukpep ke unọ ikọ ntiense efak, ẹwụt nte ẹnamde utom ke efakutom mbubehe, ẹnyụn̄ ẹwụt mme usụn̄ en̄wen ndinọ ikọ ntiense ke ebiet ekededi emi ẹkụtde mme owo. Ofụri emi ọsọn̄ọ etịn̄ ete ke owo idopke uyo ke ndikwọrọ eti mbụk!
7 Mme apostle Jesus ẹketan̄a uko uko ẹte: “Nnyịn [ikemeke] nditre nditịn̄ se nnyịn ikokụtde inyụn̄ ikopde.” Didie ke mmọ ẹkeyọ kpa ye kpukpru n̄kpọ ubiọn̄ọ? Mmọ ẹma ẹben̄e Jehovah an̄wam mmimọ, enye ama onyụn̄ an̄wam, ndien “kpukpru mmọ ẹyọhọ ye Edisana Spirit, ẹnyụn̄ ẹtịn̄ ikọ Abasi uko-uko.” (Utom 4:20, 29, 31) Ekeme ndidi kpukpru owo idinyeneke n̄wọrọnda ifiọkutom ke utom ukwọrọikọ, edi edieke nnyịn inen̄ede iyom ndikwọrọ eti mbụk ye unana edidop uyo ndien edieke nnyịn ikam isịnde ukeme ndinam ntre ke usen ke usen, Jehovah eyen̄wam nnyịn.