Ndi Ẹmeben̄e Idem Ndika Ufọkn̄wed?
1. Nso ifet ke ẹdinyene ke ini ẹtọn̄ọde ufọkn̄wed?
1 Edide emi edi akpa isua mbufo ke ufọkn̄wed m̀mê idịghe, mbufo mme uyen Christian ẹyesobo mbufa mfịna ye nsịn̄ede ke ufọkn̄wed. Edi emi oyonyụn̄ ọnọ mbufo mbufa ifet ‘nditie ntiense nnọ akpanikọ.’ (John 18:37) Ndi ẹmeben̄e idem ndinọ ikọ ntiense?
2. Didie ke mbufo eben̄e idem ẹnọ ufọkn̄wed?
2 Jehovah, ete ye eka mbufo, ye ofụn emi anamde akpanikọ onyụn̄ enyenede ọniọn̄, ẹmekpep mbufo ekese n̄kpọ emi ẹdin̄wamde mbufo ẹkụt unen ke kpukpru ikpehe uwem. (N̄ke 1:8; 6:20; 23:23-25; Eph. 6:1-4; 2 Tim. 3:16, 17) Ekeme ndidi ẹmedọdiọn̄ọ mme mfịna oro ẹdisobode ke ufọkn̄wed. Ẹda ukpep oro ẹbọde ẹban̄a se Abasi oyomde ye ifiọk oro ẹnyenede ẹban̄a se ẹdisobode ke ufọkn̄wed ẹtịm idem ndinọ ikọ ntiense. (N̄ke 22:3) Ẹnen̄ede ẹtie ẹkere item ye nti ekikere N̄wed Abasi emi ẹdude ke mme eboho n̄wed “N̄kparawa Owo Ẹbụp” mbiba ye mme ibuotikọ emi ẹdude ke Awake! oro ẹban̄ade n̄kparawa owo, emi ẹsimịn̄de kpukpru ini.
3. Ke mme usụn̄ ewe ke mbufo ẹkeme ndinọ ikọ ntiense?
3 Mbufo ẹyekeme ndinọ ikọ ntiense ke ediwak usụn̄ ke san̄asan̄a efakutom mbufo. Ke ini mbon en̄wen ẹkụtde nte mbufo ẹsisịnede n̄kpọ ọfọn ẹnyụn̄ ẹkamade idem, nte ẹdude uwem ye nte ẹtịn̄de ikọ, nte ẹkponode mme nsan̄a ubet ukpepn̄kpọ ye mme andikpep mbufo, idem nte ẹbede udomo ọfọn, ẹnyụn̄ ẹkụtde nte uwem mbufo ẹnyenede iwụk, ndusụk mmọ ẹkeme ndibụp, “Nsinam mbufo ẹdu uwem ata isio isio?” (Mal. 3:18; John 15:19) Ifet ekeme ndiberede ndinọ ikọ ntiense nnyụn̄ nnam se ẹnịmde ke akpanikọ an̄wan̄a. (1 Tim. 2:9, 10) Ke ofụri isua, ẹkeme ndidọhọ mbufo ẹtiene ẹbuana ke mme usọrọ ye mme usen nduọkodudu eke idụt. Edieke ẹbụpde fi ntak mûtieneke ubuana, ndi edidọhọ, “Enye atuaha ye ido ukpono mi; ami ndi kiet ke otu Mme Ntiense Jehovah,” mîdịghe, ke ọfọnde akan oro, ndi ayada ifet oro ọnọ ikọ ntiense aban̄a edima Ete fo, Jehovah? Ke ndausụn̄ Jehovah, eti ntịmidem ayanam ẹdu ke mben̄eidem ndinọ ekemmọ nditọ ufọkn̄wed, mme andikpep, ye mbon en̄wen eti ikọ ntiense.—1 Pet. 3:15.
4. Nsinam mbufo ẹnịm ke imekeme ndikụt unen ke isua ufọkn̄wed emi?
4 Okposụkedi emi mbufo ẹkemede ndikop esisịt ndịk ndifiak n̄ka ufọkn̄wed, ẹfiọk ẹte ke ẹmenyene ediwak owo oro ẹyomde mbufo ẹkụt unen ke isua ufọkn̄wed emi. Nnyịn n̄ko imetiene mbufo idara ke ifet oro ẹnyenede ndinọ mbon en̄wen ikọ ntiense ke san̄asan̄a efakutom mbufo. Mmọdo, ẹnyene uko ẹnyụn̄ ẹben̄e idem ndika ufọkn̄wed!