Ndikwọrọ Ikọ Nnọ Mbon Oro Ẹsemde Usem En̄wen
1. Nso ifet ke inyene nte ikwọrọde ikọ ke efakutom oro ẹnọde nnyịn?
1 Jesus Christ ama ebem iso etịn̄ ete ke ẹyekwọrọ eti mbụk ke ofụri isọn̄ “nte ntiense ẹnọ kpukpru mme idụt.” Kpukpru mme asan̄autom oro ẹkwọrọde ikọ ẹnyụn̄ ẹkpepde mme owo n̄kpọ ẹfiọk nte ikọ emi edide akpan n̄kpọ. (Matt. 24:14; 28:19, 20) Nnyịn imesisobo mbon oro ẹtode idụt en̄wen m̀mê idụt emi, oro ẹsemde usem en̄wen ke ini ikwọrọde ikọ inyụn̄ inamde mme mbet. Odot ẹkwọrọ etop Obio Ubọn̄ ẹnọ mmọ n̄ko man mmọ ẹsọn̄ọ ẹda ẹnam akpanikọ mbemiso enyene-ndịk usen Jehovah edisịm. (Mal. 3:18) Didie ke ikeme ndikwọrọ ikọ nnọ mbon oro ẹsemde usem en̄wen ke efakutom oro ẹnọde nnyịn.
2. Didie ke ikpebe Jehovah ke ini ikwọrọde ikọ inọ mbon oro ẹsemde usem en̄wen?
2 Se Mbon Oro Ẹsemde Usem En̄wen nte Jehovah Esede Mmọ: Man iwụt ke imama kpukpru orụk owo ke efakutom nnyịn nte Jehovah amade, ana enen̄ede ọdọn̄ nnyịn ndin̄wam mmọ ẹnyene nnennen ifiọk oro aban̄ade ata Abasi, Jehovah, inamke n̄kpọ m̀mê mmọ ẹsem ewe usem. (Ps. 83:18; Utom 10:34, 35) Okposụkedi oro isinen̄ede iwụk ntịn̄enyịn ke idem mbon oro ẹfiọkde usem esop nnyịn, ana ikere n̄ko iban̄a inyụn̄ iyom mme usụn̄ ndida n̄kwọrọ etop Obio Ubọn̄ Abasi nnọ mbon oro ẹsemde usem en̄wen. Ndifụmi mbon oro ẹsemde usem en̄wen idụhe ke n̄kemuyo ye uduak Jehovah oro edide ndinọ mme owo oro ẹtode kpukpru idụt ikọ ntiense. Didie ndien ke ikeme ndin̄wam mbon oro mîsemke usem nnyịn?
3. Ewe ekpri n̄wed ke ẹnọ nnyịn, ndien didie ke ikpetịm idem man ida enye ikwọrọ ikọ?
3 Kama Ekpri N̄wed Good News for People of All Nations Kwọrọ Ikọ: Ẹketịm ekpri n̄wed emi man ẹkama ẹkwọrọ ikọ ẹnọ mbon oro ẹsemde isio isio usem. Kama ekpri n̄wed emi kpukpru ini, mehe ye nsio nsio ikpehe oro enye enyenede, nyụn̄ ben̄e idem ndida enye n̄kwọrọ ikọ. Nịm idiọn̄ọ ke nsio nsio usem oro ẹsemde ke efakutom mbufo man ekeme ndisọp n̄kụt mmọ. Edieke mme n̄wed nnyịn ẹdude ke mme usem emi, ọkpọfọn akama mmọ man ọnọ mme owo emi ke ama okowụt mmọ mme n̄kpọ ke ẹkpri n̄wed oro.
4. Didie ke ẹkpeda ekpri n̄wed Nation ẹkwọrọ ikọ?
4 Ke ini ọfiọkde ke owo oro osobode ke an̄wautom esem esen usem wụt enye edem n̄wed oro, ekem kụbọde ka n̄wed ndise ofụri ererimbot oro odude ke esịt ikpaedem, tụk idemfo ye idụt oro odụn̄de, nyụn̄ nam idiọn̄ọ ndiwụt ke ikpama ndifiọk ebiet oro enye otode ye usem oro enye esemde. Ke ama ọkọfiọk usem enyeneufọk, kụbọde ka se isịnede, yom nnennen page oro usem oro odude, wụt enye udịmikọ oro ẹwetde ke ndodobi ubọkn̄wed ke enyọn̄ page oro, ndien ekem nam idiọn̄ọ ndiwụt ke ikpama enye okot etop oro. Ke enye ama okokot okụre, nọ enye tract oro odude ke usem esie mîdịghe wụt enye ntọn̄ ntọn̄ udịmikọ emi ọdọhọde ke ayada n̄wed oro ẹwetde ke usem esie ọsọk enye. Ekem wụt enye udịmikọ oro ẹwetde “enyịn̄ mi” ke ndodobi ubọkn̄wed, nyụn̄ siak enyịn̄ fo nọ enye. Wụt enye itie oro ẹwetde “enyịn̄ fo,” nyụn̄ bet enye asiak enyịn̄ esie. Nịm ini oro edifiakde ekese enye.
5. Ndutịm edifiak n̄kese ewe ke oyom ẹnam ẹnọ mbon oro ẹwụtde udọn̄ emi ẹsemde usem en̄wen?
5 Ndutịm Edifiak N̄kese: Se ededi usem oro owo esemde, akpana ẹsịn ukeme man ẹfiak ẹkese owo oro ekenyenede udọn̄ ke etop Obio Ubọn̄. Ke ndondo oro ikụtde ke owo oyom ndikpep n̄kpọ mban̄a Abasi ye Bible, ikpenyene ndiwet n̄kpọ nyọhọ babru Please Follow Up (S-43) inyụn̄ isọsọp ikpọn̄ enye inọ ewetn̄wed esop man enye ọnọ ẹsọk n̄kọk itieutom (m̀mê nnennen esop m̀mê otu oro ẹsemde m̀mê ẹsede ẹban̄a usem oro edieke enye ọdiọn̄ọde). Ndien n̄kọk itieutom ọyọnọ babru oro ẹsọk nnennen otu usem oro man eyenete oro ọfiọkde ndisem usem owo emi aka ekese enye. Ke ini ẹbọde babru emi ẹyeka ẹkese owo emi ke mîbịghike. Ewetn̄wed oro ekeme ndinọ esenyịn utom babru emi kiet man enye ọfiọk ke enyene owo ke otu usem kiet oro enyenede udọn̄. Ẹkpenyene ndida babru emi nnam n̄kpọ n̄kukụre edieke owo enen̄erede oyom ndikpep Bible.
6. Ke ini isobode owo emi enyenede udọn̄ emi esemde usem en̄wen, nso ke ikpanam?
6 Anyan ini ekeme ndibe tọn̄ọ nte ẹkekpọn̄ babru S-43 ẹnọ tutu esịm ini emi asuanetop oro ọfiọkde usem owo oro akade ekese enye. Ntre, man ẹka iso ẹn̄wam owo emi, asuanetop oro ekewetde n̄kpọ ọyọhọ babru S-43 ekeme ndisika mbịne enye tutu owo oro esemde usem esie edi. Ke ndusụk ini, ẹkeme nditọn̄ọ ukpepn̄kpọ Bible ye owo emi enyenede udọn̄ mi. Kan̄a ke emi, asuanetop emi edisan̄a didie ọbọ n̄wed ọsọk owo oro enyenede udọn̄ mi?
7. Nso ndutịm idu oro ẹkemede ndida nnyene mme n̄wed ke usem mme owo oro isobode?
7 Mme N̄wed Oro Ẹwetde ke Usem En̄wen: Mme esop ikpenyeneke ndibon ata ediwak n̄wed ke usem en̄wen. Edi edieke esenyịn utom okụtde ke enyene otu oro ẹsemde usem en̄wen emi ẹnyenede udọn̄ ndikpep Bible, enye ekeme ndinịm ibat ibat n̄wed ke usem oro man mme asuanetop ẹda ẹnam utom. Edieke n̄wed emi mîdụhe ke esop, ẹkeme nditobo mmọ. Ẹkeme ndibịghi ẹtinọ mme n̄wed emi ẹdi. Ntre ẹkeme ndisio enye ke ikpehe Intanet www.watchtower.org mmịn̄. Ediwak n̄wed nnyịn ẹdu ke nsio nsio usem ke ikpehe ndutịm Intanet emi, oro asuanetop oro m̀mê owo oro enyenede udọn̄ do ekemede ndika n̄kosion̄o. Eyịghe idụhe nte ke ndutịm emi eyenyene ufọn ke ini ẹn̄wamde mbon oro ẹnyenede udọn̄ emi ẹsemde usem en̄wen.
8. Nso ke esop akpanam ndika iso n̄wam mbon oro ẹnyenede udọn̄ emi ẹsemde usem en̄wen?
8 Se Esop Akpanamde: Ndusụk idaha, ke ebiet oro ediwak owo emi ẹsemde usem en̄wen ẹdude, ekeme ndidi idụhe esop oro odude ekpere oro ẹnịmde mme mbono esop ke usem oro. Ke ntre, ẹkpenyene ndikot mbon oro ẹnyenede udọn̄ emi ẹsemde usem en̄wen ẹtiene ẹdụk mbono esop mbufo. Nte ẹkọmde ẹnyụn̄ ẹnyenede ọkpọkpọ udọn̄ ke idem mmọ ẹkeme ndisịn udọn̄ nnọ mmọ ndisidi kpukpru ini. Ke ntọn̄ọ ntọn̄ọ, usem ye ido unam n̄kpọ ẹkeme ndidi mfịna; edi, Mme Ntiense Jehovah ke ofụri ererimbot isiyakke n̄kpọ ọbiọn̄ọ ata ima Christian mmọ. (Zeph. 3:9; John 13:35) Ndi enyene usem en̄wen oro esisemde udọn udọn—utọ nte usem French, German, Arabic, m̀mê esen usem en̄wen ekededi? Edieke enyenede onyụn̄ oyomde ndida enye n̄n̄wam owo en̄wen emi ọfiọkde usem oro, mbọk nam ewetn̄wed esop mbufo ọfiọk man enye asian n̄kọk itieutom. Emi eyenyene ufọn ke ini n̄kọk itieutom oyomde asuanetop oro edinọde owo oro enyenede udọn̄ un̄wam.
9. Ini ewe ke ekeme ndidiomi man mme asuanetop ẹkpep usem, ndien didie ke ẹkpenam emi?
9 Ndikpep Usem: Ke ini an̄wamde mbon oro ẹsemde usem en̄wen, ọfọn ndisịn udọn̄ nnọ mmọ ẹtọn̄ọ ndidụk mbono esop ke esop oro ẹsemde usem mmọ edieke odude ekpere. Edieke mmọ mîdikemeke ndinam emi, ndusụk mme asuanetop ẹkeme ndikpep usem oro man ẹkeme ndinen̄ede n̄n̄wam mbon oro ẹnyenede udọn̄ do. Edieke esop mîdụhe ikpere, ke ntak ediwak isenowo m̀mê mme amanaisọn̄, n̄kọk itieutom ekeme ndinyịme ẹtọn̄ọ ndikpep usem oro. Edieke edinamde emi, n̄kọk itieutom ekeme ndisian mme esop oro ẹdude ekpere se idude ẹnyụn̄ ẹnam ndutịm man ẹnọ ntọt ẹban̄a usem oro ẹditọn̄ọde ndikpep. Akpana mbon oro ẹyomde ndikpep usem emi ẹkere ẹban̄a ndiwọrọ n̄ka otu m̀mê esop oro man ẹn̄wam ke efakutom emi ẹsemde usem oro.
10. Ini ewe ke ẹkpesiak otu oro ẹsemde usem en̄wen, ndien nso ke ẹkpenam?
10 Ndisiak Obufa Otu: Mbemiso ẹsiakde obufa otu oro ẹsemde usem en̄wen, ana ẹnyene n̄kpọ inan̄. (1) Ediwak mbon oro ẹnyenede udọn̄ emi ẹkemede ndinam n̄kọri ke usem oro. (2) Mme asuanetop ifan̄ oro ẹfiọkde m̀mê ẹkpepde ndisem usem oro. (3) Ebiowo m̀mê asan̄autom unamutom ndida usụn̄ nnyụn̄ nnịm ke nsụhọde n̄kaha mbono esop kiet ke urua ke usem oro. (4) Otu mbiowo emi enyịmede ndise mban̄a otu oro. Ke ẹma ẹkenyene mme n̄kpọ emi, otu mbiowo ayada leta asian n̄kọk itieutom kpukpru n̄kpọ oro aban̄ade otu emi onyụn̄ ọdọhọ ke imoyom ẹdiọn̄ọ mmimọ nte esop oro esede aban̄a otu oro ẹsemde usem en̄wen. (Se n̄wed Etịm, page 106-107.) Edikot ebiowo m̀mê asan̄autom unamutom oro esede aban̄a otu emi, “esenyịn otu” m̀mê “asan̄autom otu.”
11. Ntak edide akwa ifet ndikwọrọ ikọ nnọ mbon oro ẹsemde usem en̄wen ke efakutom emi ẹnọde nnyịn?
11 Ndikwọrọ ikọ nnọ mbon oro ẹsemde usem en̄wen ke efakutom oro ẹnọde nnyịn edi akpan ikpehe utom ukwọrọikọ ofụri ererimbot oro Jesus Christ, kpa Uwụtn̄kpọ nnyịn, ọkọtọn̄ọde. Nnyịn ikpakam isịn ifịk inam udeme nnyịn inyụn̄ ise nte Jehovah edikade iso enyen̄e mme idụt man ada mbon oro enye amade edi. (Hag. 2:7) Iyenen̄ede ikop idatesịt edieke iberede ọyọhọ ọyọhọ ye ndutịm emi. Jehovah akpakam ọdiọn̄ nnyịn nte idianade kiet ikwọrọ ikọ inọ mbon oro ẹsemde usem en̄wen ke efakutom nnyịn sia imeti ke okposụkedi emi mme owo ẹsemde nsio nsio usem, Abasi ekeme ndinam n̄kọri odu!—1 Cor. 3:6-9.