Mme Item Oro Ẹnọde Mbon Emi Ẹsinamde N̄kpọ ke Esoputom
Ọtọn̄ọde ye nsiondi Utom Obio Ubọn̄ Nnyịn emi, ẹnam mme ukpụhọde ke ndutịm Esoputom. Mme item ye mme n̄kpọ editi oro ẹtienede mi ẹyedian n̄kpọ efen efen ke se ikenemede ke ibuotikọ oro “Nte Ikemede Nditịm Idem Nnọ Esoputom,” ke Utom Obio Ubọn̄ Nnyịn eke May 2009, ẹnyụn̄ ẹnam mmọ ẹtetịm ẹn̄wan̄a.
◼ Utịn̄ikọ: Emi edi utịn̄ikọ oro ọkọn̄ọde ke ibuotikọ emi ẹnọde, emi otuowo mîtieneke ibuana. Etịn̄ikọ ekpenyene ndiwụk ntịn̄enyịn ke n̄kpọ oro edinen̄erede inyene ufọn inọ esop.
◼ Mbụme ye Ibọrọ: Ukem nte ukpepn̄kpọ Enyọn̄-Ukpeme, ẹyebem iso ẹtọn̄ọ ikpehe emi ye ibio ibio ntọn̄ọikọ ẹnyụn̄ ẹberi ye ibio ibio utịtikọ. Kpukpru mme ikpehe ekikere ẹnyene mbụme. Owo oro ẹnọde ikpehe emi ikpenyeneke nditịn̄ ikọ awak akaha. Ẹkeme ndikot mme akpan itie N̄wed Abasi nte ini ayakde. Iyomke ẹkot mme ikpehe ekikere ibọhọke ẹdọhọ ẹnam ntre.
◼ Nneme: Emi edi utịn̄ikọ oro esịnede nneme otuowo. Enye idịghe utịn̄ikọ kpọt, inyụn̄ idịghe nneme mbụme ye ibọrọ.
◼ Mme Nnamn̄wụt ye Ndụn̄ọde: Ke ini ẹdọhọde nam wụt, emi ọwọrọ ke edi utom eyenete oro ẹnọde ikpehe emi ndidiomi nnamn̄wụt emi; idịghe enye enyene ndinam ke idemesie. Mbon oro enye emekde ẹn̄wam enye ẹkpenyene ndidi mbon oro ẹnịmde eti uwụtn̄kpọ, emi ẹdinyụn̄ ẹkemede ndinam se ẹyomde n̄wụt, enye n̄ko ekpenyene ndibabak nsian mmọ edieke ekemede. Ifọnke ndinọ mbufa mme asuanetop ye mbon oro mînen̄ekede inyene ifiọk nnamn̄wụt ẹnam n̄kukụre man ẹnọ mmọ ifet ndinam n̄kpọ ke mbot utịn̄ikọ, edi ndusụk mmọ ẹkeme ndidi mme enyeneufọk ke nnamn̄wụt. Mme asuanetop oro ẹnamde nnamn̄wụt ẹkpenyene ndikụt ẹte ke mmimọ imese otuowo. Mbon oro ẹdade ẹnam ndụn̄ọde ẹnyene ndida ke mbot utịn̄ikọ ntịn̄ ikọ, idịghe ke ebiet oro mmọ ẹtiede. Ẹkpenyene ndinam ndomonse ke mme nnamn̄wụt ye mme ndụn̄ọde. Edieke ẹdiade ini ke mbonoesop ndien ana eyenete anam utịn̄ikọ esie edi ibio ibio, enye ikpenyeneke ndisio mme nnamn̄wụt m̀mê ndụn̄ọde mfep. Mme asan̄autom unamutom ẹkpenyene ndibem iso nnam anam-ndutịm otu mbiowo m̀mê ebiowo en̄wen ọfiọk mbon emi mmọ ẹyomde ndinọ nnamn̄wụt ẹnam m̀mê oro mmọ ẹyomde ndida nnam ndụn̄ọde.
Edieke ẹnọde san̄asan̄a ndausụn̄ ke nte ẹkpenamde ikpehe edinam, ẹkpenyene nditiene enye ketket. Ke ini ẹnamde n̄kpọ ke Esoputom nte ẹtịn̄de ke enyọn̄ emi, nditọete ẹyetịp ẹsịn ke Esoputom oro ẹnamde n̄kpọ “ke ido nte eyede ye ke ndutịm.”—1 Cor. 14:40.