Nte Ẹkpedade Babru Please Follow Up (S-43) Ẹnam N̄kpọ
Afo ekpenyene ndiwet n̄kpọ nyọhọ babru emi ke ini okụtde owo oro enyenede udọn̄, emi mîdụn̄ke ke efakutom mbufo m̀mê oro esemde usem en̄wen (edide usem esenidụt m̀mê usem n̄kann̄kụk). Ke ini edem, ikesida babru emi inam n̄kpọ ke ini isobode owo emi esemde usem en̄wen edide enye enyene udọn̄ m̀mê inyeneke, edi idahaemi ida enye inam n̄kpọ n̄kukụre ke ini owo oro enyenede udọn̄. N̄kukụre ini emi nnyịn mîdinamke ntre edi ke ini isobode ye owo emi edide inan. Edieke isobode ye owo emi edide inan, inyene ndiwet n̄kpọ nyọhọ babru S-43, edide enye enyene udọn̄ m̀mê inyeneke.
Nso ke ikpanam ke ima ikewet n̄kpọ iyọhọ babru oro? Ikpenyene ndikpọn̄ enye nnọ ewetn̄wed esop. Edieke enye ọdiọn̄ọde esop oro enye ọkpọnọde babru oro ẹsọk, utọ nte esop oro odude ekpere emi ẹsemde usem oro, enye ekeme ndinọ enye ẹsọk mbiowo esop oro man mmọ ẹnam ndutịm ndin̄wam owo oro ẹnyenede udọn̄ do. Edi edieke enye mîdiọn̄ọke, enye ọyọnọ babru oro ẹsọk n̄kọk itieutom.
Edieke owo oro enyenede udọn̄ do esemde usem en̄wen (edide usem esenidụt m̀mê usem n̄kann̄kụk) onyụn̄ odụn̄de ke efakutom mbufo, afo emekeme ndisụk n̄ka n̄kese enye man anam n̄kpọ aban̄a udọn̄ oro enye enyenede tutu asuanetop oro otode nnennen esop oro ẹsemde usem oro edika ebịne enye. Ke ndusụk idaha, ekeme ndidi esop oro ẹsemde usem owo oro idụhe ke n̄kann̄kụk oro. Edieke edide ntre, ka iso kese owo oro man anam n̄kpọ aban̄a udọn̄ oro enye enyenede; nọ enye n̄wed ekededi oro odude ke usem esie, nyụn̄ tọn̄ọ ukpepn̄kpọ Bible edieke ekemede.—Se Utom Obio Ubọn̄ Nnyịn eke November 2009, page 4.