Da Ifet Oro Afo Enyenede Ndikwọrọ Ikọ ke Ọsọn̄urua N̄kpọ
1. Didie ke ediwak owo ke ererimbot ẹda utom ukwọrọikọ nnyịn?
1 Ediwak owo ke ererimbot Satan ẹda utom ukwọrọikọ nnyịn nte “ndisịme” n̄kpọ. (1 Cor. 1:18-21) Edieke nnyịn mîkpemeke, ukwan̄ ekikere emi ekeme ndinam idem emem nnyịn onyụn̄ anam itek ke ifịk. (N̄ke 24:10; Isa. 5:20) Mme ntak ewe ẹkpenam ida ifet edidi Mme Ntiense Jehovah ke ọsọn̄urua n̄kpọ?—Isa. 43:10.
2. Ntak emi ẹkemede ndidọhọ ke utom ukwọrọikọ edi “edisana utom”?
2 “Edisana Utom”: Apostle Paul ọkọdọhọ ke utom ukwọrọikọ edi “edisana utom.” (Rome 15:15, 16) Didie ke utom ukwọrọikọ edi “edisana utom”? Ndikwọrọ ikọ anam nnyịn idi “nsan̄autom” ye Jehovah emi “edide Edisana,” onyụn̄ etịp esịn ke ndinam enyịn̄ esie asana. (1 Cor. 3:9; 1 Pet. 1:15) Jehovah ada utom ukwọrọikọ nnyịn nte “uwa ekọm,” ke ntre utom ukwọrọikọ edi akpan ikpehe ke utuakibuot nnyịn.—Heb. 13:15.
3. Nso inam utom edikwọrọ eti mbụk edi akwa ifet?
3 Ndikwọrọ eti mbụk edi akwa ifet oro ẹnọde ibat ibat owo. Mme angel ẹkpedat esịt ndinam utom emi ẹkpenyụn̄ ẹnam enye edifọn edifọn. (1 Pet. 1:12) Edi, Jehovah emek nnyịn mme anana-mfọnmma owo, kpa “esombat,” ndinam anana-mbiet utom emi!—2 Cor. 4:7.
4. Didie ke ikeme ndiwụt ke imada ukwọrọikọ ke ọsọn̄urua n̄kpọ?
4 Ebeiso N̄kpọ: Sia inen̄erede ida ifet oro inyenede mi nte ọsọn̄urua n̄kpọ, ukwọrọikọ edi kiet ke otu n̄kpọ emi edide ‘akpan n̄kpọ akan’ ke uwem nnyịn. (Phil. 1:10) Mmọdo, nnyịn imesidiomi ini kpukpru urua nditiene n̄kwọrọ ikọ. Ebre ikwọ emi adade ifet edisịne ke otu n̄kaikwọ emi ẹdiọn̄ọde ke ofụri ererimbot ke ọsọn̄urua n̄kpọ eyetịm idem ọnọ kpukpru ikwọ onyụn̄ esịn ukeme ndifori usọ esie. Kpasụk ntre, nnyịn iyetịm idem mbemiso ikade ukwọrọikọ man ikeme ‘nditịm nsiak ikọ akpanikọ,’ iyonyụn̄ isịn ukeme ndifori “usọ unọ ukpep” nnyịn.—2 Tim. 2:15; 4:2.
5. Anie ama utom ukwọrọikọ nnyịn?
5 Kûyak nte mme owo ẹdade ukwọrọikọ anam idem emem fi. Ti ete ke ediwak owo ẹdu ke efakutom nnyịn oro ẹmade utom ukwọrọikọ nnyịn. Nte ededi, nnyịn iyomke uma owo. Se idide akpan n̄kpọ ikan edi nte Jehovah adade utom ukwọrọikọ nnyịn, ndien enye enen̄ede ama ifịk ifịk ukeme nnyịn.—Isa. 52:7.